យុគសម័យ - នាថ្ងៃទី ៦ ឧសភា នៅការិយាល័យរដ្ឋាភិបាល តាមសំណើរបស់សហរដ្ឋអាមេរិក លោកនាយករដ្ឋមន្រ្តី Nguyen Xuan Phuc បានជួបសន្ទនា តាមទូរស័ព្ទជាមួយ លោកប្រធានាធិបតីអាមេរិក Donald Trump ។
លោកនាយករដ្ឋមន្រ្តីNguyen Xuan Phuc (រូបថត៖ VNA)
នៅក្នុងការសន្ទនានេះ លោកប្រធានាធិបតីអាមេរិក Donald Trump បានវាយតម្លៃខ្ពស់ចំពោះសមត្ថភាពរបស់វៀតណាម ក្នុងការប្រឆាំងនឹងជំងឺ Covid-19 និងថ្លែងអំណរគុណជូនដល់វៀតណាមដែលបានជួយឧបត្ថម្ភនិងដឹកជញ្ជូនសម្ភារៈបរិក្ខាពេទ្យ ក៏ដូចជាការប្រគល់ម៉ាស់ជូនដល់សហរដ្ឋអាមេរិក។
លោកប្រធានាធិបតី Donald Trump បានជូនដំណឹងពីការត្រៀមខ្លួនជាស្រេច ក្នុងការជួយឧបត្ថម្ភឱ្យប្រទេសវៀតណាមនូវម៉ាស៊ីនជំនួយដកដង្ហើមមួយចំនួន សំដៅគាំទ្រដល់ការព្យាបាលអ្នកជំងឺ Covid-19 ។ ជាមួយគ្នានេះដែរ លោកប្រធានាធិបតី Donald Trump បានស្នើឱ្យប្រទេសទាំងពីរបន្តសហប្រតិបត្តិការកាន់តែជិតស្និទ្ធថែមទៀត ក្នុងការប្រឆាំងនឹងជំងឺនេះ។
លោកប្រធានាធិបតី Donald Trump មានការសោកស្តាយចំពោះកិច្ចប្រជុំកំពូលពិសេសរវាងសហរដ្ឋអាមេរិកនិងអាស៊ានដែលត្រូវបានពន្យារពេល ដោយសារការរីករាលដាលនៃ Covid-19 ហើយបានបង្ហាញនូវបំណងចង់លើកកម្ពស់ទំនាក់ទំនងរវាងសហរដ្ឋអាមេរិកនិងអាស៊ាន នាពេលខាងមុខ។
លោកនាយករដ្ឋមន្រ្តី Nguyen Xuan Phuc បានជូនដំណឹងអំពីការធ្វើបច្ចុប្បន្នភាពស្ថានភាពនៃការគ្រប់គ្រងជំងឺ Covid-19 នៅប្រទេសវៀតណាម ហើយក្នុងពេលជាមួយគ្នានេះដែរ លោក នាយករដ្ឋមន្ត្រីបានចែករំលែកនូវការខាតបង់និងការលំបាកដែលប្រជាជនអាមេរិកកំពុងរងទុក្ខ ដោយទុកចិត្តថា ក្រោមការដឹកនាំរបស់លោកប្រធានាធិបតី Donald Trump សហរដ្ឋអាមេរិកនឹងគ្រប់គ្រងជំងឺនេះដោយជោគជ័យ ឆាប់ៗនេះហើយចាប់ផ្តើមការស្តារសេដ្ឋកិច្ចឡើងវិញ។
លោកនាយករដ្ឋមន្រ្តីបានថ្លែងអរគុណដល់សុឆន្ទៈរបស់លោកប្រធានាធិបតី Donald Trump ដែលបានជួយឧបត្ថម្ភម៉ាស៊ីនជំនួយដកដង្ហើម។ ព្រមទាំង ក៏សូមអរគុណសហរដ្ឋអាមេរិកចំពោះការគាំទ្រផ្នែកហិរញ្ញវត្ថុដល់អាស៊ាន ក្នុងនោះប្រទេសវៀតណាមទទួលបាន ១០ លានដុល្លារអាមេរិក ដើម្បីលើកកម្ពស់សមត្ថភាពសុខាភិបាលនិងការស្តារសេដ្ឋកិច្ចឡើងវិញ បន្ទាប់ពីបញ្ចប់ជំងឺនេះ។
លោកនាយករដ្ឋមន្ត្រី Nguyen Xuan Phuc និងលោកប្រធានាធិបតី Donald Trump បានឯកភាពជំរុញទំនាក់ទំនងសេដ្ឋកិច្ចនិងពាណិជ្ជកម្មថែមទៀតនិងបន្តបើកទីផ្សារសម្រាប់ទំនិញគ្នាទៅវិញទៅមក នាពេលខាងមុខ។
មេដឹកនាំទាំងពីរក៏បានពិភាក្សាពីវិធានការណ៍នានា ដើម្បីនាំមកនូវកិច្ចសហប្រតិបត្តិការលើគ្រប់ជ្រុងជ្រោយឱ្យកាន់តែស៊ីជម្រៅជាពិសេស ក្នុងឱកាសអបអរសាទរខួបលើកទី ២៥ នៃការបង្កើតទំនាក់ទំនងការទូត ដោយហេតុនេះបានចូលរួមចំណែកយ៉ាងជាក់ស្តែង ដើម្បីរក្សាសន្តិភាពនិងស្ថិរភាព កិច្ចសហប្រតិបត្តិការនិងការអភិវឌ្ឍនៅក្នុងតំបន់។
លោកប្រធានាធិបតី Donald Trump បានបញ្ជាក់ថា សហរដ្ឋអាមេរិកយកចិត្តទុកដាក់យ៉ាងខ្លាំងចំពោះភាពជាដៃគូគ្រប់ជ្រុងជ្រោយជាមួយវៀតណាម ដោយវាយតម្លៃលើទំនាក់ទំនងវៀតណាម - អាមេរិកបានអភិវឌ្ឍន៍យ៉ាងខ្លាំង ក្នុងរយៈពេល ២៥ ឆ្នាំកន្លងមកហើយជឿជាក់ថាទំនាក់ទំនងនេះនឹងបន្តរីកចម្រើនកាន់តែខ្លាំងក្លា ។ នាពេលអនាគត។ លោកក៏បានបង្ហាញនូវបំណងចង់ជួបលោកនាយករដ្ឋមន្រ្តី Nguyen Xuan Phuc នាពេលឆាប់ៗនេះ./.
(ប្រែសម្រូលដោយឌីណា)
(ប្រភពព័ត៌មាន: thoidai.com.vn)
មតិពីមិត្តអ្នកអាន