យុគសម័យ - នៅថ្ងៃទី ១ ខែមីនា ទីស្តីការគណៈរដ្ឋមន្រ្តីនៃប្រទេសកម្ពុជាបានអនុម័តលើសេចក្តីព្រាងច្បាប់ស្តីពីវិធានការណ៍នានាដើម្បីការពារទប់ស្កាត់ការរីករាលដាលនៃជំងឺរាតត្បាតកូវីដ-១៩។
ប្រទេសកម្ពុជាអនុម័តលើវិធានការណ៍ការពារនិងទប់ស្កាត់ជំងឺរាតត្បាត
រាជរដ្ឋាភិបាលកម្ពុជា បានតាក់តែងសេចក្តីព្រាងច្បាប់ថ្មីមួយទៀត គឺ «សេចក្តីព្រាងច្បាប់ស្តីពីវិធានការទប់ស្កាត់ការឆ្លងរាលដាលជំងឺកូវីដ-១៩ និងជំងឺឆ្លងកាចសាហាវប្រកបដោយគ្រោះថ្នាក់ធ្ងន់ធ្ងរផ្សេងទៀត»។ សេចក្តីព្រាងច្បាប់នេះ បានឆ្លងកាត់ការអនុម័តក្នុងកិច្ចប្រជុំគណៈរដ្ឋមន្ត្រី ដែលដឹកនាំដោយសម្តេចនាយករដ្ឋមន្ត្រី ហ៊ុន សែន កាលពីថ្ងៃទី២៨ ខែកុម្ភៈ ឆ្នាំ២០២១។
សេចក្តីព្រាងច្បាប់នេះ មាន៦ជំពូក និង១៨មាត្រា ដោយក្នុងនោះ ក៏មានមាត្រា ដែលកំណត់ពីការដាក់ទោសទណ្ឌដែរ។ សេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រី អំពីខ្លឹមសារនៃកិច្ចប្រជុំគណៈរដ្ឋមន្ត្រី បានបញ្ជាក់ថា សេចក្តីព្រាងច្បាប់ស្តីពីវិធានការទប់ស្កាត់ការឆ្លងរាលដាលជំងឺកូវីដ-១៩ និងជំងឺឆ្លងកាចសាហាវប្រកបដោយគ្រោះថ្នាក់ធ្ងន់ធ្ងរផ្សេងទៀត ត្រូវបានតាក់តែងឡើង ក្នុងកាលៈទេសៈ ដែលពិភពលោក កំពុងប្រឈមនឹងការរាលដាលជំងឺកូវីដ-១៩ កាន់តែសាហាវ ហើយបានបង្កឲ្យមានផលប៉ះពាល់យ៉ាងធ្ងន់ធ្ងរដល់សុខភាពសាធារណៈ វិស័យសេដ្ឋកិច្ច ព្រមទាំងជីវភាពរស់នៅរបស់មនុស្សជាតិ។
ម្យ៉ាងទៀត សេចក្តីព្រាងច្បាប់នេះ ក៏លេចរូបរាងឡើង ក្នុងបរិបទ ដែលកម្ពុជា កំពុងមានករណីជំងឺកូវីដ-១៩ ឆ្លងចូលសហគមន៍សាជាថ្មីដែរ (ព្រឹត្តិការណ៍សហគមន៍២០កុម្ភៈ)។ រដ្ឋាភិបាលកម្ពុជា ចាត់ទុកការឆ្លងជំងឺកូវីដ-១៩ ចូលសហគមន៍លើកនេះ ថាមានលក្ខណៈទ្រង់ទ្រាយធំនិងធ្ងន់ធ្ងរជាងលើកមុនៗ។
សេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រី បានឲ្យដឹងទៀតថា សេចក្តីព្រាងច្បាប់នេះ បានកំណត់ពីវិធានការសុខាភិបាល និង វិធានការរដ្ឋបាល ជាដើម សម្រាប់អនុវត្តក្នុងការប្រយុទ្ធប្រឆាំងនឹងជំងឺកូវីដ-១៩ និងជំងឺកាចសាហាវផ្សេងទៀត ដើម្បីការពារអាយុជីវិតប្រជាជន សុខភាពសាធារណៈ សណ្តាប់សាធារណៈ ហើយក៏ដើម្បីកាត់បន្ថយការប៉ះពាល់វិស័យសេដ្ឋកិច្ចនៅកម្ពុជាផងដែរ។
សេចក្តីប្រកាសព័ត៌មាន អះអាងថា៖«សេចក្តីព្រាងច្បាប់នេះ បង្កើតឲ្យមានមូលដ្ឋានគតិយុត្តិរឹងមាំបន្ថែមទៀត ដល់ការគ្រប់គ្រងស្ថានការណ៍នៃការឆ្លងរាលដាលជំងឺកូវីដ-១៩ និងជំងឺឆ្លងកាចសាហាវប្រកបដោយគ្រោះថ្នាក់ធ្ងន់ធ្ងរផ្សេងទៀត នៅក្នុងព្រះរាជាណាចក្រកម្ពុជា»។
(ប្រែសម្រួលដោយ ហេងវុធ្ធី)
(ប្រភពព័ត៌មាន: vtv.vn)
មតិពីមិត្តអ្នកអាន