យុគសម័យ - ថ្លែងសុន្ទរកថាក្នុងពិធីអបអរសាទរខួប ៦០ ឆ្នាំនៃទំនាក់ទំនងការទូតវៀតណាម - គុយបា សមាជិកការិយាល័យនយោបាយលោកឧបនាយករដ្ឋមន្ត្រីនិងជារដ្ឋមន្ត្រីក្រសួងការបរទេស Pham Binh Minh បានបញ្ជាក់ថា៖“ សព្វថ្ងៃនេះគុយបានៅ គឺជាដៃគូសំខាន់និងទុកចិត្តបានរបស់វៀតណាម ... “ ទំនាក់ទំនងមិត្តភាពពិសេស សាមគ្គីភាពនិងការទុកចិត្តគ្នារវាងវៀតណាមនិងគុយបាគឺកម្រមានណាស់ ក្នុងទំនាក់ទំនងអន្តរជាតិ” ។
ទំនាក់ទំនងមិត្តភាពរវាងវៀតណាមនិងគុយបាបានក្លាយជានិមិត្តរូបដ៏រស់រវើកនៃសាមគ្គីភាពរវាងប្រជាជននៃបណ្តាប្រទេសក្នុងការតស៊ូ ដើម្បីឯករាជ្យ សេរីភាព អធិបតេយ្យភាពនិងសិទ្ធិជ្រើសរើសរបស់ប្រជាជន។
លោកស្រីប្រធានសម្ព័ន្ធអង្គការមិត្តភាពវៀតណាម Nguyen Phuong Nga បានថ្លែងសុន្ទរកថាក្នុងពិធីនោះ។ (រូបថត៖ TV)
លោកស្រីប្រធានសម្ព័ន្ធអង្គការមិត្តភាពវៀតណាម Nguyen Phuong Nga បានមានប្រសាសន៍ថា៖ ការរួបរួមនៃមនោគតិ ដ៏ខ្ពង់ខ្ពស់នៃយុគសម័យនេះបានបង្កើតការយោគយល់គ្នារវាងប្រជាជាតិទាំងពីរ បង្កើតទំនាក់ទំនងវៀតណាម –គុយបា ប្រកបដោយអត្ថន័យ។ ក្នុងរយៈពេល ៦០ ឆ្នាំកន្លងមកនេះ ប្រជាជននៃប្រទេសទាំងពីរតែងតែរួបរួមគ្នា ជំនះរាល់ការលំបាកនិងឧបសគ្គ ដោយបន្តការអនុវត្តយ៉ាងរឹងមាំលើមាគ៌ាដែលបានជ្រើសរើស ...
យោងតាមលោកស្រី Nguyen Phuong Nga អស់រយៈពេលជាច្រើនឆ្នាំមកហើយ សម្ព័ន្ធអង្គការមិត្តភាពវៀតណាមនិងវិទ្យាស្ថានគុយបាមិត្តភាពជាមួយបណ្តាជនជាតិ (ICAP) សម្ព័ន្ធអង្គការមិត្តភាពនិងអង្គការប្រជាជននៃប្រទេសទាំងពីរបានរៀបចំសកម្មភាពមិត្តភាពជាច្រើនដែលអាចផ្សព្វផ្សាយយ៉ាងខ្លាំងក្លាដល់មហាជន ជាពិសេសស្រទាប់យុវជន។ សកម្មភាពទាំងនេះបានរួមចំណែកយ៉ាងសំខាន់ក្នុងការពង្រឹងនិងពង្រីកសាមគ្គីភាព មិត្តភាពពិសេសនិងកិច្ចសហប្រតិបត្តិការគ្រប់ជ្រុងជ្រោយរវាងប្រជាជននៃប្រទេសទាំងពីរវៀតណាម - គុយបា។ សូម្បីតែ នៅឆ្នាំ ២០២០ ទោះបីជួបការលំបាកជាច្រើនដោយសារការរីករាលដាលនៃជំងឺ COVID-19 ក៏ដោយ ក៏ភាគីទាំងពីរនៅតែមានសកម្មភាពដ៏សំបូរបែបជាមួយនឹងខ្លឹមសារនិងអត្ថន័យយ៉ាងជ្រាលជ្រៅ ជាពិសេសសកម្មភាពជាបន្តបន្ទាប់ដើម្បីអបអរខួប ៦០ ឆ្នាំនៃទំនាក់ទំនងការទូតវៀតណាម - គុយបា។
លោកស្រី Lianys Torres Rivera ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋគុយបាប្រចាំនៅប្រទេសវៀតណាមបានសម្តែងនូវគោលបំណងថា ប្រទេសទាំងពីរបន្តពង្រឹងទំនាក់ទំនងនយោបាយពិសេសរ។ (រូបថត៖ TV)
លោកស្រី ឯកអគ្គរដ្ឋទូតគុយបា Lianys Torres Rivera បានអះអាងថា ទំនាក់ទំនងពិសេសរវាងវៀតណាមនិងគុយបាបានបង្កើតក្នុងគ្រាលំបាកបំផុត ប៉ុន្តែបក្ស រដ្ឋាភិបាលនិងប្រជាជននៃប្រទេសទាំងពីរតែងតែគាំទ្រនិងជួយគ្នាទៅវិញទៅមក ក្នុងកំឡុងពេល ៦ ទសវត្ស នៃសម័យប្រយុទ្ធនិងតស៊ូ ដើម្បីការពារនិងកសាងប្រទេសជាតិ។ នេះត្រូវបានបង្ហាញយ៉ាងច្បាស់ នៅក្នុងបរិបទនៃជំងឺ COVID-19 គុយបាបានទទួលការគាំនូវសំភារៈនិងបរិក្ខាវេជ្ជសាស្រ្តពីបក្ស រដ្ឋនិងប្រជាជនវៀតណាម ដែលចូលរួមចំណែកក្នុងការបង្ការនិងគ្រប់គ្រងជំងឺរាតត្បាតនៅកោះសេរី នៅពេលសេដ្ឋកិច្ចគុយបាកំពុងប្រឈមមុខនឹងការលំបាកជាច្រើន ដោយសារតែផលប៉ះពាល់នៃគោលនយោបាយឡោមព័ទ្ធនិងការដាក់ទណ្ឌកម្មរបស់រដ្ឋាភិបាលសហរដ្ឋអាមេរិក ដែលប្រឆាំងនឹងប្រទេសគុយបា អស់រយៈពេលជាងកន្លះសតវត្សរ៍។
លោកឧបនាយករដ្ឋមន្ត្រីនិងរដ្ឋមន្ត្រីក្រសួងការបរទេស Pham Binh Minh អញ្ជើញថ្លែងសុន្ទរកថា នៅឯពិធីអបអរសាទរខួប ៦០ ឆ្នាំនៃទិវាបង្កើតទំនាក់ទំនងការទូតរវាងវៀតណាមនិងគុយបា។ (រូបថត៖ TV)
លោកឧបនាយករដ្ឋមន្ត្រីនិងរដ្ឋមន្ត្រីក្រសួងការបរទេស Pham Binh Minh បានអះអាងថា វៀតណាមជានិច្ចកាលគោរពនូវសាមគ្គីភាពនិងគាំទ្រឆន្ទៈរបស់គុយបាចំពោះវៀតណាមក្នុងការតស៊ូ ដើម្បីរំដោះប្រទេសជាតិ ក៏ដូចជាក្នុងបុព្វហេតុ កសាងនិងការពារជាតិ។ ទោះក្នុងស្ថានភាពណាក៏ដោយគុយបាតែងតែនាំមុខគេក្នុងចលនាអន្តរជាតិដែលគាំទ្រវៀតណាម។ កាយវិការប្រកបដោយភាពថ្លៃថ្នូរនិងខ្ពង់ខ្ពស់របស់គុយបាឆ្ពោះទៅវៀតណាមត្រូវបានគេមើលឃើញច្បាស់នៅក្នុងសេចក្តីថ្លែងការណ៍ជាប្រវត្តិសាស្ត្ររបស់លោកប្រធាន Fidel Castro នៅពេលដែលលោកអញ្ជើញបានបំពេញទស្សនកិច្ចនៅខេត្ត Quang Trị ក្នុងសម័យប្រឆាំងនឹងសហរដ្ឋអាមេរិក៖ "ដើម្បីវៀតណាម គុយបាសុខចិត្តលះបង់ឈាមរបស់ខ្លួន! "។
ទន្ទឹមនឹងការគាំទ្រនិងលើកទឹកចិត្តខាងនយោបាយនិងការទូតដ៏អស្ចារ្យនេះ គុយបាបានបញ្ជូនវិស្វករ កម្មករ វេជ្ជបណ្ឌិតនិងអ្នកជំនាញរាប់ពាន់នាក់មកជួយប្រទេសវៀតណាម។ គុយបានបានជួយឧបត្ថម្ភប្រទេសវៀតណាមនូវគ្រឿងបរិក្ខារពេទ្យ ម៉ាស៊ីន អាហារថ្នាំពេទ្យនិងជំនួយដ៏មានតំលៃជាច្រើន ទោះបីជាប្រទេសគុយបាមានការលំបាកខ្លាំងក៏ដោយ។ គុយបាបានជួយវៀតណាមកសាងកសិដ្ឋាន រោងចក្រ សាលារៀន មន្ទីរពេទ្យជាច្រើន ... ហើយបានបណ្តុះបណ្តាលនិស្សិតវៀតណាមរាប់ពាន់នាក់។
ប្រតិភូបានថតរូបទុកជាអនុស្សាវរីយ៍។
យោងតាមលោកឧបនាយករដ្ឋមន្ត្រីនិងរដ្ឋមន្ត្រីក្រសួងការបរទេស Pham Binh Minh បានឱ្យដឹងថាសព្វថ្ងៃនេះគុយបាជាដៃគូសំខាន់និងគួរឱ្យទុកចិត្តរបស់វៀតណាម។ ភាគីទាំងពីរបានកសាងនូវចំណងមិត្តភាពនិងកិច្ចសហប្រតិបត្តិការកាន់តែស៊ីជម្រៅរវាងបក្សទាំងពីរ រដ្ឋាភិបាល រដ្ឋសភានិងគ្រប់ជាន់ថ្នាក់ពីកណ្តាលទៅមូលដ្ឋានរវាងអង្គការមហាជនអង្គការនយោបាយ- សង្គម។
“ ចំណងមិត្តភាពពិសេស សាមគ្គីភាពជិតស្និទ្ធនិងការ ទុកចិត្តគ្នារវាងវៀតណាមនិងគុយបាគឺកម្រមានណាស់ក្នុងទំនាក់ទំនងអន្តរជាតិ។ វៀតណាម - គុយបាប្តេជ្ញាអនុវត្តកិច្ចព្រមព្រៀងកំពូល បន្តនាំមកទំនាក់ទំនងប្រទេសទាំងពីរកាន់តែស៊ីជម្រៅ ស្ថិរភាពនិងនិរន្តរភាព ហើយពង្រឹងកិច្ចសហប្រតិបត្តិការសេដ្ឋកិច្ច - ពាណិជ្ជកម្មទ្វេភាគីទៅរកការអភិវឌ្ឍដែលស្របទៅនឹងសក្តានុពលនិងទំនាក់ទំនងនយោបាយរបស់ប្រទេសទាំងពីរដើម្បីបុព្វហេតុនៃការសាងសង់និងការអភិវឌ្ឍន៍ ក្នុងប្រទេសនីមួយៗ ដើម្បីសន្តិភាព ស្ថិរភាព កិច្ចសហប្រតិបត្តិការនិងការអភិវឌ្ឍន៍ក្នុងតំបន់ពីរនិងលើពិភពលោក “ ។ឧបនាយករដ្ឋមន្ត្រី Pham Binh Minh បានសង្កត់ធ្ងន់./.(បកប្រែដោយឌីណា)
(ប្រភពព័ត៌មាន: thoidai.com.vn)
មតិពីមិត្តអ្នកអាន