យុគសម័យ - បណ្តាប្រទេសអាស៊ាននិងចិនបានបញ្ជាក់ពីសាមគ្គីភាពនិងការគាំទ្រចំពោះកិច្ចខិតខំប្រឹងប្រែងរបស់ប្រទេសចិនក្នុងការដោះស្រាយការរីករាលដាលនៃ Covid-19 ក្នុងក្របខ័ណ្ឌនៃកិច្ចប្រជុំពិសេសរបស់រដ្ឋមន្ត្រីការបរទេសអាស៊ាន - ចិនស្តីពីកិច្ចសហប្រតិបត្តិការក្នុងការបង្ការប្រឆាំង Covid-19។
អាស៊ាននិងចិនរួមគ្នាដើម្បីប្រយុទ្ធប្រឆាំងនឹងការរីករាលដាលនៃ Covid-19
នៅក្នុងកិច្ចប្រជុំនេះ បណ្តារដ្ឋមន្ត្រីការបរទេសអាស៊ានបានបញ្ជាក់ពីសាមគ្គីភាពនិងការគាំទ្រចំពោះកិច្ចខិតខំប្រឹងប្រែងរបស់រដ្ឋាភិបាលចិនក្នុងការដោះស្រាយការរីករាលដាលនៃជំងឺរាតត្បាតនេះ។ ចែករំលែកការខាតបង់សំខាន់ៗដែលប្រទេសចិនកំពុងជួបប្រទះដោយសារការរីករាលដាលនៃជំងឺរាតត្បាត និងជឿជាក់ថាជាមួយនឹងការប្តេជ្ញាចិត្តសមត្ថភាពនិងវិធានការរឹងមាំរបស់រដ្ឋាភិបាលចិននឹងជំនះការលំបាកឆាប់ៗនិងគ្រប់គ្រងដោយជោគជ័យនូវជំងឺរាតត្បាត។
រដ្ឋមន្ត្រីការបរទេសចិន លោក Wang Yi បានជូនដំណឹងអំពីស្ថានភាពនិងលទ្ធផលវិជ្ជមានក្នុងការបង្ការប្រឆាំងជំងឺរាតត្បាតនៅទីក្រុង Wuhan ខេត្ត Hubei និងនៅទូទាំងប្រទេសចិន និងថ្លែងអំណរគុណចំពោះការគាំទ្រគ្រប់យ់ាងនៃបណ្តាប្រទេសក្នុងតំបន់និងសហគមន៍អន្តរជាតិសម្រាប់ប្រទេសចិនក្នុងគ្រាលំបាក ហើយបានបញ្ជាក់ថានឹងខិតខំធានានូវសុវត្ថិភាពនិងការគាំទ្រជាអតិបរមាដល់ពលរដ្ឋនៃបណ្តាប្រទេសអាស៊ានដែលកំពុងរស់នៅសិក្សានិង ធ្វើការនៅប្រទេសចិន។
បណ្តារដ្ឋមន្រ្តីការបរទេសអាស៊ាននិងចិនបានឯកភាពជំរុញការសម្របសម្រួលព័ត៌មាននិងការចែករំលែកបទពិសោធន៍គាំទ្រដល់ការពង្រឹងសមត្ថភាពក្នុងការធ្វើរោគវិនិច្ឆ័យស្រាវជ្រាវនិងអភិវឌ្ឍថ្នាំព្យាបាលនិងវ៉ាក់សាំងបង្ការជំងឺរាតត្បាត និងឯកភាពទាញយកអត្ថប្រយោជន៍ពីយន្តការសហប្រតិបត្តិការរវាងអាស៊ាននិងចិន។
យោងតាម Reuters រដ្ឋមន្ត្រីការបរទេសមកពីបណ្តាប្រទេសអាស៊ាននិងចិនបានរួមដៃគ្នាហើយស្រែកពាក្យស្លោកថា “ចូររឹងមាំឡើង Wuhan! ចូររឹងមាំឡើង ចិន! ចូររឹងមាំឡើង អាស៊ាន!!”
នៅចុងបញ្ចប់នៃកិច្ចប្រជុំនេះ បណ្តារដ្ឋមន្ត្រីការបរទេសអាស៊ាន - ចិនបានអនុម័តសេចក្តីថ្លែងការណ៍រួមនៃកិច្ចប្រជុំរដ្ឋមន្រ្តីពិសេសអាស៊ាន - ចិនស្តីពីកិច្ចសហប្រតិបត្តិការដើម្បីឆ្លើយតបទៅនឹងការរីករាលដាលនៃ Covid-19 ៕
(ប្រែសម្រូលដោយវិច្ឆិកា)
មតិពីមិត្តអ្នកអាន