យុគសម័យ- បន្ទាប់ពីលោកនាយករដ្ឋមន្រ្តី Nguyen Xuan Phuc បានចេញសេចក្តីណែនាំលេខ ១៩ ស្តីពីការបន្តអនុវត្តវិធានការណ៍ នានា ដើម្បីការពារនិងប្រយុទ្ធប្រឆាំងនឹងការរីករាលដាលនៃកូវីដ-១៩ រួម ទាំងការបន្ធូរបន្ថយការរក្សាគម្លាតសង្គមដើម្បីបំពេញភារកិច្ចពីរ ក្នុងពេលតែមួយនោះ មានមនុស្សមួយចំនួនបានធ្វើប្រហែសហើយ ជាពិសេសប្រជាជននៅតាមតំបន់ព្រំដែន។
ករណីដែលបុរសម្នាក់បានធ្វើតេស្តិ៍វិជ្ជមានវីរុស SARS-CoV-2 នៅថ្ងៃទី ១៥ ខែឧសភា ឆ្នាំ២០២០ (អ្នកជំងឺលេខ ៣១៥) ពេលគាត់ចូលមកប្រទេសវៀតណាមដោយខុសច្បាប់នៅខេត្ត Tay Ninh រួមទាំងការដឹកមនុស្សឆ្លងដែនខុសច្បាប់ នាពេលថ្មីៗនេះបានបង្ហាញឲ្យឃើងញថា ការទប់ស្កាត់និងការប្រយុទ្ធប្រឆាំងនឹងការរាតត្បាតនៅតាមតំបន់ព្រំដែន នៅតែមានភាពស្មុគស្មាញណាស់។ កម្លាំងមានសមត្ថកិច្ចដែលឈរជើងនៅតាមខ្សែព្រំដែនត្រូវខិតខំយ៉ាងខ្លាំងក្លា ដើម្បីការពារទប់ស្កាត់ការចូលមកប្រទេសដោយខុសច្បាប់ ដើម្បីប្រយុទ្ធប្រឆាំងនឹងជំងឺរាតត្បាតកូវីដ-១៩ ។
ពុះពារការលំបាក ដើម្បីយាមល្បាតនៅតំបន់ព្រំដែន
នៅថ្ងៃដំបូងនៃខែមិថុនាដែលជាខែដែលមានអាកាសធាតុក្តៅខ្លាំង នៅពេលដែលយើងបានមកដល់ប៉ុស្តិ៍ការពារព្រំដែន Chang Riec មានទីតាំងស្ថិតនៅក្នុងស្រុក Tan Bienh ខេត្ត Tay Ninh យើងបានដឹងពីការលំបាកទាំងអស់របស់កងទ័ពការពារព្រំដែនដែលកំពុងប្រចាំការយាមល្បាត នៅតាមកន្លែងបោះតង់ជាបណ្តោះអាសន្ន ដើម្បីទប់ស្កាត់ការឆ្លងដែនខុសច្បាប់។
កម្លាំងការពារព្រំដែននៅប៉ុស្តិ៍ការពារព្រំដែន Chang Riec កំពុងបំពេញភារកិច្ច ប្រចាំការយាមល្បាត ២៤ ម៉ោងក្នុងមួយថ្ងៃ នៅតំបន់ព្រំដែនដើម្បីទប់ស្កាត់ការឆ្លងដែនខុសច្បាប់។ (រូបថត៖ VNA)
កម្លាំងការពារព្រំដែននៅប៉ុស្តិ៍ការពារព្រំដែន Chang Riec កំពុង បំពេញភារកិច្ច ប្រចាំការយាមល្បាត ២៤ ម៉ោងក្នុងមួយថ្ងៃ នៅតំបន់ព្រំដែនដើម្បីទប់ស្កាត់ការឆ្លងដែនខុសច្បាប់។
ខេត្ត Tay Ninh ដែលមានព្រំប្រទល់ជាប់នឹងប្រទេសកម្ពុជាមានប្រវែង ២៤០ គីឡូម៉ែត្រ ដែលក្នុងនោះមានតែ ៤៥.៥ គីឡូម៉ែត្រជាទន្លេទេ ហើយឯប្រវែងនៅសល់នោះគឺជាដីគោគរាបស្មើវិញ។ ដោយមានច្រកផ្លូវលំរាប់រយ ខេត្ត Tay Ninh ត្រូវបានចាត់ទុកដូចជាតំបន់សំខាន់មួយក្នុងការការពារ និងប្រយុទ្ធប្រឆាំងនឹងការរីករាលដាលនៃកូវីដ-១៩ នៅតាមខ្សែព្រំដែន។
មានវត្តមាននៅប៉ុស្តិ៍ការពារព្រំដែន Chang Riec ពីព្រឹកព្រលឹម ពេលដែលយើងមកទាក់ទងការងារគឺមានតែប្រធាននយោបាយប៉ុស្តិ៍ម្នាក់កត់ដែលត្រូវបានចាត់អោយប្រចាំការនៅប៉ុស្តិ៍។ អ្នកទាំងអស់ ទាំងប្រធានប៉ុស្តិ៍ ទាំងកម្មាភិបាល និងយុទ្ធជននៃប៉ុស្តិ៍ការពារព្រំដែន Chang Riec កំពុងឈរយាមល្បាត និងបំពេញភារកិច្ចនៅតាមកន្លែងបោះតង់បណ្តោះអាសន្ននានាហើយ។
លោកវរសេនីយ៍ទោ Bui Trung Uy ប្រធានប៉ុស្តិ៍ការពារព្រំដែន Chang Riec បានមានប្រសាសន៍ថា ប៉ុស្តិ៍ការពារព្រំដែន Chang Riec ត្រូវគ្រប់គ្រងតំបន់ព្រំដែនមួយដែលមានប្រវែង ១៩.៥ គីឡូម៉ែត្រ ក្នុងនោះមានច្រកផ្លូវលំប្រហែល ១៨ ទៅ ២២ ច្រកផ្លូវ។ អង្គភាពត្រូវចាត់ចែងកម្លាំងឱ្យប្រចាំការយាមល្បាត ២៤ ម៉ោងក្នុងមួយថ្ងៃនៅតាមខ្សែព្រំដែន។
កងទ័ពការពារព្រំដែននៅប៉ុស្តិ៍ការពារព្រំដែណ Chang Riec កំពុងបំពេញភារកិច្ច ២៤ ម៉ោងក្នុងមួយថ្ងៃនៅតាមខ្សែរព្រំដែនដើម្បីទប់ស្កាត់ការឆ្លងដែនខុសច្បាប់។(រូបថត៖ VNA)
“ដោយកងកំលាំងមានចំនួនតិច ហើយតែត្រូវធ្វើការយាមល្បាត ២៤ម៉ោងក្នុងមួយថ្ងៃនោះ យុទ្ធជនទាំងឡាយក៏ប្រឈមនឹងការលំបាកជាច្រើនដែរ ជាពិសេសបញ្ហាសុខភាព។ ទោះបីជាយ៉ាងណា នាយទាហាន និងពលទាហានទាំងអស់នៃប៉ុស្តិ៍ការពារព្រំដែន Chang Riec ក៏ប្តេជ្ញាចិត្តខ្ពស់ ដើម្បីជំនះរាល់ការលំបាកនេះដែរ” នេះជាការចែករំលែករបស់លោកអនុសេនីយ៍ឯក Nguyen Hoang Bao Huy
ការចូលមកប្រទេសវៀតណាមដោយខុសច្បាប់ ដើម្បីគេចពិការដាក់ឲ្យនៅដាច់ដោយឡែក
បន្ទាប់ពីលោកនាយករដ្ឋមន្រ្តីបានចេញសារាចរណែនាំនៅថ្ងៃទី ១៩ ខែមេសាឆ្នាំ ២០២០ ស្តីពីការបន្តអនុវត្តវិធានការបង្ការ និងទប់ស្កាត់ការរីករាលដាលនៃជំងឺរាតត្បាត ដែលរួមមានការបន្ធូរបន្ថយការរក្សាគម្លាតសង្គមនោះ ប្រជាជនជាច្រើននាក់បានធ្វើប្រហែសហើយ។ ពួកគេបានស្វះស្វែងភ្ជាប់ទំនាក់ទំនងជាមួយអ្នករត់ម៉ូតូឌុប ដើម្បីធ្វើដំណើរតាមច្រកផ្លូវលំ គេចពីការត្រួតពិនិត្យរបស់កម្លាំងមានសមត្ថកិច្ច ដោយការចូលមកប្រទេសវៀតណាមខុសច្បាប់ ដើម្បីគេចពីការដាក់ឲ្យនៅដាច់ដោយឡែកដូចតាមការកំណត់។
ជាក់ស្តែងនៅថ្ងៃទី ១ ខែឧសភា ឆ្នាំ ២០២០ LE VAN T. (កើតឆ្នាំ ១៩៨១) បានចូលមកប្រទេសវៀតណាមដោយខុសច្បាប់តាមច្រកផ្លូវផ្លូវលំ ដែលស្ថិតក្រោមការគ្រប់គ្រងរបស់ប៉ុស្តិ៍ការពារព្រំដែន Chang Riec ដើម្បីទៅសួរសុខទុក្ខសាច់ញាតិនៅភូមិ Tan Dong ឃុំ Tan Thanh ស្រុក Tan Chau ខេត្ត Tay Ninh។ បុរសឈ្មោះ T. មួយនេះ ធ្វើតេស្តរកវីរុស SARS-CoV-2 នៅថ្ងៃទី ១៥ ខែឧសភា ឆ្នាំ ២០២០ ហើយត្រូវបានគេកំណត់ថា ជាអ្នកជំងឺឆ្លងកូវីដ-១៩ លេខ ៣១៥ ។
កងកំលាំងការពារព្រំដែននៃប៉ុស្តិ៍ការពារព្រំដែន Chang Riec កំពុងឃោសនាដល់ប្រជាជននៅតាមតំបន់ព្រំដែនអោយគោរពតាមបទប្បញ្ញត្តិស្តីពីការការពារ និងប្រយុទ្ធប្រឆាំងនឹងការរីករាលដាលនៃជំងឺកូវីដ-១៩ ។។ (រូបថត៖ VNA)
លោកវរសេនីយ៍ឯក Le Hong Vuong មេបញ្ជាការបញ្ជាការដ្ឋានកងទ័ពការពារព្រំដែនខេត្តតៃនិញបានមានប្រសាស៍ថា៖ កម្លាំងប្រយុទ្ធប្រឆាំងនឹងការរីករាលដាលនៃជំងឺរាតត្បាតកូវីដ - ១៩ នៅតាមព្រំដែននៅតែត្រូវបានរក្សាដដែល ទាំងចំនួនទ័ព ទាំងការសម្របសម្រួលបានល្អជាមួយកំលាំងបង្ការទប់ស្កាត់ជំងឺរាត្បាតទាំងឡាយ។ រហូតមកដល់ពេលនេះ ស្ថានភាពនៃការបង្ការនិងទប់ស្កាត់នឹងការរីករាលដាលជំងឺរាតត្បាតនៅក្នុងខេត្ត Tay Ninh និយាយរួម ក៏ដូចជានៅតាមខ្សែព្រំដែននិយាយដោយឡែកត្រូវបានរក្សាគ្រប់គ្រងយ៉ាងល្អដែរ./.
（បកប្រែដោយឌីណា）
មតិពីមិត្តអ្នកអាន