ក្នុងឱកាសខួបអនុស្សាវរីយ៍លើកទី៧៥ នៃថ្ងៃឯករាជ្យជាតិវៀតណាម សម្តេចវិបុលសេនាភក្តី សាយ ឈុំ ប្រធានព្រឹទ្ធសភាកម្ពុជាបានផ្ញើសារលិខិតជូនពរជូនចំពោះលោកជំទាវ ង្វៀន ធិគីងិន ប្រធានរដ្ឋសភាវៀតណាម។ ក្នុងសារលិខិតនេះ សម្តេច សាយ ឈុំបានវាចា៖
សម្តេចវិបុលសេនាភក្តី សាយ ឈុំ
"ខ្ញុំសូមធ្វើការវាយតម្លៃខ្ពស់និងកោតសរសើរដ៏ស្មោះស្ម័គ្របំផុតចំពោះការខិតខំប្រឹងប្រែងរបស់ប្រជាជនកងទ័ពវៀតណាមចំពោះការតស៊ូរំដោះជាតិពីការឈ្លានពានរបស់ពួកចក្រពត្តិនិយមប្រកបដោយជោគជ័យរយៈពេល៧៥ឆ្នាំកន្លងមកនេះ។ ក្រោមការដឹកនាំប្រកបដោយគតិបណ្ឌិតដោយបក្សកុម្មុនីស្តវៀតណាម រដ្ឋសភានិងរដ្ឋាភិបាលវៀតណាម ប្រទេសវៀតណាមមានការអភិវឌ្ឈន៍លើគ្រប់វិស័យនាំមកនូវវឌ្ឍនភាព វិបុលភាព និងជីវភាពរស់នៅរបស់ប្រជាជនវៀតណាមកាន់តែសម្បូរសប្បាយឡើងថែមទៀត។ ការរីកចម្រើនរបស់រៀតណាមបានលើកកិត្យានុភាពវៀតណាមនៅក្នុងតំបន់ និងអន្តរជាតិ ហើយបានរួមចំណែកដល់សន្តិភាព ស្ថិរភាពនិងសន្តិសុខក្នុងតំបន់ទាំងមូល។
ខ្ញុំសូមវាយតម្លៃខ្ពស់ចំពោះចំណងមិត្តភាព សាមគ្គីភាពនិងកិច្ចសហប្រតិបត្តិការជាប្រពៃណីដ៏ល្អរវាងប្រជាជននិងប្រទេសយើងទាំងពីរ ក៏ដូចជារវាងរដ្ឋសភានៃសាធារណរដ្ឋសង្គមនិយមវៀតណាម និងព្រឹទ្ធសភានៃព្រះរាជាណាចក្រកម្ពុជា ដែលត្រូវបានបន្តពូនជ្រុំ និងរីកចម្រើនឡើងឥតឈប់ឈរ។
ខ្ញុំមានក្តីជំនឿជឿជាក់ថា ចំណងមិត្តភាព សាមគ្គីភាព និងកិច្ចសហប្រតិបត្តិការលើគ្រប់វិស័យរវាងប្រជាជននិងប្រទេសយើងទាំងពីរនឹងនៅស្ថិតស្ថេរគង់វង្សជារៀងដរាប និងបន្តពង្រឹងពង្រីកអោយកាន់តែស៊ីជម្រៅថែមទៀតទាំងពេលបច្ចុប្បន្ននិងពេលអនាគត"៕
(យោងតាមស្ថានទូតវៀតណាមប្រចាំកម្ពុជា)
មតិពីមិត្តអ្នកអាន