សម្តេចព្រះសង្ឃរាជ ទេព វង្ស កំពុងអាពាធ ហើយគង់ព្យាបាល នៅមន្ទីរពេទ្យមួយ ក្នុងទីក្រុងហូជីមិញ ប្រទេសវៀតណាម។
នៅថ្ងៃទី២៩ ខែមេសា ឆ្នាំ២០០៦ សម្ដេចព្រះសង្ឃរាជ ទេព វង្ស ត្រូវបានតែងតាំងជា "សម្ដេចព្រះអគ្គមហាសង្ឃរាជាធិបតី សម្ដេចមហាសង្ឃរាជ នៃព្រះរាជាណាចក្រកម្ពុជា"។
ក្នុងឱកាសបំពេញទស្សនកិច្ចនៅសាធារណរដ្ឋសង្គមនិយមវៀតណាម នៅព្រឹកថ្ងៃទី១៩ ខែមករា ឆ្នាំ២០២០នេះ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ និងគណៈតិភូ បានអញ្ជើញចូលក្រាបថ្វាយបង្គំសាកសួរសុខទុក្ខ សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស ដែលកំពុងសម្រាកព្យាបាលព្រះរោគ នៅទីក្រុងហូជីមិញនៃសាធារណរដ្ឋសង្គមនិយម វៀតណាម។ នេះបើតាមការចុះផ្សាយនៅលើទំព័រ Facebook សម្តេចក្រឡាហោម ស ខេង។
សម្តេចក្រឡាហោម ស ខេង អញ្ជើញចូលក្រាបថ្វាយបង្គំសាកសួរសុខទុក្ខ សម្តេចព្រះសង្ឃរាជ ទេព វង្ស។ (រូបថត៖ freshnewsasia)
នៅក្នុងឱកាសនោះ សម្តេចក្រឡាហោម ស ខេង បានថ្វាយនូវបច្ច័យចំនួន ១០០០០ដុល្លារសហរដ្ឋអាមេរិក និងប្រាក់វៀតណាមចំនួន២០លានដុង សម្រាប់ការព្យាបាលព្រះរោគសម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស និងបានថ្វាយព្រះពរសម្ដេចមានព្រះសុខភាពល្អបរិបូរណ៌ ដើម្បីបានយាងគង់ជាម្លប់ដ៏ត្រជាក់ និងដឹកនាំទ្រទ្រង់វិស័យព្រះពុទ្ធសាសនានៅកម្ពុជាផងដែរ៕
(បូកសរុបដោយឌីណា)
មតិពីមិត្តអ្នកអាន