នៅល្ងាច ថ្ងៃទី៤ ខែតុលា ឆ្នាំ២០១៩នេះ សម្តេចអគ្គមហាសេនាបតីតេជោ ហ៊ុន សែន នាយករដ្នមន្ត្រីនៃព្រះ រាជាណាចក្រកម្ពុជា បានអញ្ជើញចូលរួមក្នុងកពិធីលៀងសាយភោជន៍ ដែលរៀបចំឡើងដោយ ឯកឧត្តម Nguyen Xuan Phuc នាយករដ្នមន្ត្រី នៃសាធារណរដ្នសង្គមនិយមវៀតណាម ដែលពិធីនេះត្រូវបានធ្វើឡើងនៅវិមានរដ្ឋាភិបាល វៀតណាម។
ទិដ្ឋភាពនៃពិធីលាងសោយភាជន៍
នៅក្នុងឱកាសនោះផងដែរ សម្ដេចតេជោនាយករដ្ឋមន្ត្រី បានអញ្ជើញឡើងថ្លែងសុន្ទរកថាចំណាប់អារម្មណ៍ដែលមានខ្លឹមសារសំខាន់ៗថា៖ សម្តេចសូមថ្លែងអំណរគុណចំពោះការស្វាគមន៍ និងបដិសណ្ឋារកិច្ចយ៉ាងកក់ក្តៅ ព្រមទាំងពិធីលៀង សាយភោជន៍ប្រកបដោយបរិយាកាសអធិកអធម ដែលឯកឧត្តមនាយករដ្នមន្ត្រី Nguyen Xuan Phuc បានរៀបចំជូនសម្ដេច និងគណៈប្រតិភូកម្ពុជានាពេលនេះ។
សម្តេចតេជោនាយករដ្ឋមន្ត្រី បានអបអរសាទចំពោះការរីកចម្រើន និងសមិទ្ធផលដ៏ធំធេងដែលប្រទេសវៀតណាម សម្រេចបាន ក្នុងនោះកំណើនសេដ្ឋកិច្ចខ្ពស់។ ក្នុងរយៈពេល១០ឆ្នាំចុងក្រោយនេះ ការអភិវឌ្ឍន៍យ៉ាងរហ័សក្នុងវិស៏យហេដ្ឋារចនាសម្ព័ន្ធទន់ និងរឹង វិស័យសង្គមកិច្ច ការបណ្តុះបណ្តាលធនធានមនុស្សប្រកបដោយគុណភាពខ្ពស់ ការរីកចម្រើនផ្នែកវិទ្យាសាស្ត្រ និងបច្ចេកវិទ្យា និងពិសេសគឺការបែងចែកធនធានសេដ្ឋកិច្ចប្រកបដោយបរិយាប័ន្ន ក្រោមការដឹកនាំដ៏ឈ្លាសវៃ ត្រឹមត្រូវ របស់បក្សកុម្មុនីស្ត និងរដ្ឋាភិបាលវៀតណាម។
សម្តេចក៏សូមសម្តែងនូវការអបអរសាទផងដែរចំពោះវៀណាម ដែលបានជាប់ឆ្នោតជាសមាជិកមិនអចិន្ត្រៃនៃក្រុមប្រឹក្សាសន្តិសុខអង្គការសហប្រជាជាតិសម្រាប់អាណត្តិ ២០២០-២០២១ ជាមួយសម្លេងគាំទ្រដ៏លើសលុប គឺ ១៩២ លើ ១៩៣។ នេះបញ្ជាក់ឲ្យឃើញពីការគាំទ្ររបស់ពិភពលោកចំពោះតួនាទី និងការរួមចំណែកដ៏សំខាន់របស់វៀតណាមក្នុងកិច្ចខិតខំដោះស្រាយបញ្ហាតំបន់ និងពិភពលោក។ ជាមួយនេះកម្ពុជាត្រៀមខ្លួន ផ្តល់ការគាំទ្រ និងកិច្ចសហប្រតិបត្តិការយ៉ាងពេញទំហឹង ចំពោះវៀណាម ក្នុងតួនាទីជាម្ចាស់ផ្ទះ និងជាប្រធាន ASEAN នាឆ្នាំ ២០២០ ខាងមុខនេះ។
សម្តេចបន្តថា កម្ពុជា-វៀតណាម នឹងរួមគ្នាអនុវត្តឲ្យបានម៉ឺងម៉ាត់បំផុតនូវរាលទិសដៅដែលបានដាក់ចេញ និងការព្រមព្រៀងគ្នាទាំងអស់ ហើយនឹងប្រឹងប្រែបន្តដោះស្រាយបញ្ចប់ឲ្យបានឆាប់នូវបញ្ហាដែលមាន ដូចជាការងារ ខណ្ឌសីមា និងបោះបង្គោលព្រំដែនគោកដែលនៅសេសសល់១៦%ដើម្បី កសាងព្រំដែនប្រទេសទាំងពីរឲ្យទៅជាតំបន់សន្តិភាព មិត្តភាព សហប្រតិបត្តិការនិងវិបុលភាពជានិរន្តរ៍។ យើងនឹងបន្តពង្រីកទំហំពាណិជ្ជកម្មទ្វេភាគីឲ្យលើសពីផែនការ ៥ពាន់លាន ដុល្លាអាមេរិកនៅឆ្នាំ ២០២០ ហើយខិតខំបង្កើនទំនាក់ទំនងសេដ្ឋកិច្ចជាមួយគ្នាដោយរៀបចំឲ្យបានឆាប់នូវផែនការមេតភ្ជាប់សេដ្ឋកិច្ចរវាងប្រទេសទាំងពីរ។
សម្តេចក៏បានអរគុណចំពោះ ការឧបត្ថម្ភគាំទ្ររបស់កងទ័ពស្ម័គ្រចិត្តវៀតណាម ក្នុងការរំដោះកម្ពុជាចេញពីរបបប្រល័យ ពូជសាសន៍ ប៉ុល ពត ព្រមទាំងការរួមចំណែករបស់វៀតណាមដល់សន្តិភាព និងការស្តារនិងអភិវឌ្ឍកម្ពុជា គឺជាសច្ចធម៌ប្រវត្តិសាស្ត្រដែលត្រូវបានកត់ត្រាទុក មិនអាចបដិសេធ ឬក៏បំភ្លេចបានឡើយ៕
(យោងតាម FB Samdech Hun Sen)
មតិពីមិត្តអ្នកអាន