យុគសម័យ - នាព្រឹកថ្ងៃទី ៦ ខែវិច្ឆិកា នៅរាជធានីភ្នំពេញបានប្រព្រឹត្តទៅពិធីប្រគល់អំណោយពីស្ថានទូតវៀតណាមប្រចាំនៅកម្ពុជាជូនដល់ប្រជាជនកម្ពុជា ដែលរងគ្រោះដោយសារទឹកជំនន់តាមរយៈក្រសួងការបរទេសនិងសហប្រតិបត្តិការអន្តរជាតិកម្ពុជា។
លោកឯកអគ្គរដ្ឋទូតវៀតណាមប្រចាំនៅកម្ពុជា Vu Quang Minh និង លោកជំទាវ សឿង រដ្ឋចាវី រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជា
ពិធីនេះត្រូវបានធ្វើឡើងក្រោមសហអធិបតីភាពរបស់លោកឯកអគ្គរដ្ឋទូតវៀតណាមប្រចាំនៅកម្ពុជា Vu Quang Minh និង លោកជំទាវ សឿង រដ្ឋចាវី រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជា។ តាមរយៈក្រសួងការបរទេសនិងសហប្រតិបត្តិការអន្តរជាតិកម្ពុជាស្ថានទូតវៀតណាមប្រចាំនៅកម្ពុជា បានផ្តល់អំណោយដល់ប្រជាជនកម្ពុជានូវមីកញ្ចប់និងទឹកដោះគោឆៅ ដែលជាផលិតផលរបស់វៀតណាមក្នុងទឹកប្រាក់សរុបប្រមាណ ៣.០០០ ដុល្លារអាមេរិក។ ថ្លែងក្នុងពិធីនេះ លោកឯកអគ្គរដ្ឋទូត Vu Quang Minh បានផ្ញើសារចូលរួមរំលែកទុក្ខយ៉ាងខ្លាំងចំពោះការខូចខាតទាំងអាយុជីវិតមនុស្សនិងទ្រព្យសម្បត្តិ ដែលប្រជាជនកម្ពុជាបានរងគ្រោះដោយសារផលប៉ះពាល់នៃទឹកជំនន់ ដែលអូសបន្លាយក្នុងរយៈពេលវេងកន្លងមក។ ម្យ៉ាងវិញទៀតលោកក៏បញ្ជាក់ថា អំណោយទាំងនេះគឺជាទឹកចិត្តរបស់មន្រ្តីស្ថានទូតនិងបុគ្គលិកក៏ដូចជាប្រជាជនវៀតណាមជូនចំពោះប្រជាជនកម្ពុជាក្នុងគ្រាលំបាក ដែលជានិមិត្តរូបនៃទំនៀមទំលាប់នៃ“ ក្តីស្រឡាញ់គ្នាទៅវិញទៅមកដ៏ល្អប្រពៃ» នៃប្រជាជាតិទាំងពីរផងដែរ។
ទិដ្ឋភាពនៃជំនួបនេះ
ថ្លែងក្នុងពិធីនេះដែរ លោកជំទាវ សឿង រដ្ឋចាវី រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជា បានថ្លែងអំណរគុណយ៉ាងជ្រាលជ្រៅចំពោះជំនួយនិងឥរិយាបទថ្លៃថ្នូររបស់ស្ថានទូតវៀតណាម ជាពិសេសនិងប្រជាជនវៀតណាមជាទូទៅ។ ជាមួយគ្នានេះ លោកស្រីក៏បានមានប្រសាសន៍ថា លោកស្រីនឹងចែកអំណោយដល់ប្រជាជនកម្ពុជា ដែលកំពុងរងការខ្វះខាតក្នុងពេលឆាប់ៗនេះ។ ទន្ទឹមនឹងនេះដែរ លោកស្រីក៏បានសម្តែងនូវសមានទុក្ខចំពោះការបាត់បង់និងការខូចខាតដែលប្រជាជនវៀតណាមបានរងគ្រោះដោយសារជំនន់ទឹកភ្លៀងនៅតំបន់ភាគកណ្តាលវៀតណាមក្នុងរយៈពេលកន្លងមកផងដែរ៕
(បកប្រែដោយ ហេង វុធ្ធី)
(ប្រភពព័ត៌មាន: vov.vn)
មតិពីមិត្តអ្នកអាន