រដ្ឋាភិបាលច្រានចោលការចោទប្រកាន់របស់អតីតបក្សប្រឆាំងជុំវិញការកំណត់ព្រំដែនកម្ពុជា-វៀតណាមដោយផ្អែកតាមផែនទីថ្មីខ្នាត«១លើ២៥ពាន់»ដែលប្រទេសទាំងពីរបានចុះហត្ថលេខាទទួលយកនាពេលថ្មីៗនេះ។
មន្ត្រីគណៈកម្មាធិការចម្រុះកិច្ចការព្រំដែនកម្ពុជា បានជួបពិភាក្សាជាមួយភាគីវៀតណាមកាលពីថ្ងៃសៅរ៍ នៅខេត្តតៃនិញ ប្រទេសវៀតណាមដើម្បីពិនិត្យ និងឯកភាពទៅលើផែនទី។(ប្រភព៖ postkhmer)
គណៈកម្មាធិការចម្រុះ កិច្ចការព្រំដែនកម្ពុជាបានចេញសេចក្ដីថ្លែងការណ៍មួយកាលពីថ្ងៃម្សិលមិញដោយបានទាត់ចោលចំពោះការលើកឡើងដែលថា ផែនទីខ្នាត ១ លើ ២៥ ពាន់គូសដោយវៀតណាម ធ្វើឱ្យកម្ពុជាត្រូវបាត់បង់ទឹកដីដោយចាត់ទុកអ្នកលើកឡើងបែបនេះថា ការប្រឌិតរឿងដោយក្រុមឧទ្ទាមក្រៅច្បាប់ប៉ុណ្ណោះ។
មន្ត្រីគណៈកម្មាធិការចម្រុះកិច្ចការព្រំដែនកម្ពុជា បានជួបពិភាក្សាជាមួយភាគីវៀតណាមកាលពីថ្ងៃសៅរ៍ នៅខេត្តតៃនិញ ប្រទេសវៀតណាមដើម្បីពិនិត្យ និងឯកភាពទៅលើផែនទី។
ផែនទីដែលបានគូរនោះ គឺជាផ្នែកមួយនៃសន្ធិសញ្ញាកំណត់ព្រំដែនរដ្ឋដែលបានចុះហត្ថលេខាកាលពីថ្ងៃទី ៥ ខែតុលា ឆ្នាំមុន ក្នុងដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់ទីក្រុងហាណូយ ដែលភាគីទាំងពីរបានផ្តល់សច្ចាប័ន ៨៤ ភាគរយនៃការងារបោះបង្គោលព្រំដែនដែលបានបញ្ចប់រវាងកម្ពុជា និងវៀតណាម។
ផែនទីភូមិសាស្ត្រព្រំដែននេះ ក៏ជាផ្នែកមួយនៃសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥។
លោក អ៊ុំ សំអាន ប្រធានគណៈកម្មការកិច្ចការព្រំដែន និងអន្តោប្រវេសន៍របស់គណបក្សសង្គ្រោះជាតិ ដែលត្រូវរំលាយដោយតុលាការកំពូល បាននិយាយថា អតីតគណបក្សប្រឆាំងមិនទទួលស្គាល់ផែនទីភូមិសាស្ត្រព្រំដែនថ្មីនេះទេ ដោយចោទប្រកាន់ថា វាត្រូវបានគូរដោយភាគីវៀតណាមតែម្ខាង។
នៅក្នុងសេចក្ដីថ្លែងការណ៍មួយ អតីតគណបក្សសង្គ្រោះជាតិក៏បានអំពាវនាវ ឲ្យ រដ្ឋាភិបាលបើកបង្ហាញ និងផ្ទៀងផ្ទាត់ផែនទីខ្នាត ១/២៥ ០០០ ជាមួយផែនទីបោនខ្នាត ១/១០០ ០០០ របស់បារាំងជាសាធារណៈ ។
អតីតគណបក្សសង្គ្រោះជាតិ ក៏បាននិយាយដែរថា គណៈបក្សនេះ បដិសេធមិនទទួលស្គាល់ ការងារបោះបង្គោលព្រំដែនសម្រេចបាន ៨៤ ភាគរយ ដែលបានធ្វើឡើងរវាងកម្ពុជានិងវៀតណាមនោះឡើយ។
យោងតាមរដ្ឋធម្មនុញ្ញ ផែនទីខ្នាត ១/១០០.០០០ ត្រូវបានធ្វើឡើងនៅចន្លោះឆ្នាំ ១៩៣៣-១៩៥៣ ហើយត្រូវបានទទួលស្គាល់ជាអន្តរជាតិចន្លោះឆ្នាំ ១៩៦៣-១៩៦៩ ។
កិច្ចប្រជុំនៅប្រទេសវៀតណាមនៅថ្ងៃសៅរ៍សប្ដាហ៍មុនរវាងគណៈប្រតិភូកម្ពុជាដឹកនាំដោយលោកទេសរដ្ឋមន្ត្រី វ៉ា គឹមហុង ប្រធានគណៈកម្មាធិការកិច្ចការព្រំដែនកម្ពុជា បានជួបជាមួយគណៈប្រតិភូវៀតណាមដែលដឹកនាំដោយ លោក Le Hoai Trung អនុរដ្ឋមន្ត្រីក្រសួងការបរទេសនិងជាប្រធានគណៈកម្មាធិការចម្រុះព្រំដែនកម្ពុជា-វៀតណាម។
ភាគីទាំងពីរបានឯកភាពគ្នានូវផែនទីភូមិសាស្ត្រព្រំដែនចំនួន ៥០០ ច្បាប់ ដោយមាន ២៥០ ច្បាប់ ជាភាសាខ្មែរ ហើយភាគីនីមួយៗរក្សាផែនទីដើមចំនួន ២៥០ ច្បាប់។
ថ្លែងបន្ទាប់ពីពិធីបានបញ្ចប់ ដែលត្រូវបានចាក់ផ្សាយតាមរយៈទូរទស្សន៍ជាតិកម្ពុជាកាលពីថ្ងៃចន្ទ លោក វ៉ា គីមហុង បាននិយាយថា មន្ត្រីកម្ពុជាបានផ្ទៀងផ្ទាត់ផែនទីជាច្រើនដងមុនពេលអនុម័តលើផែនទីផ្លូវការ។
លោកនិយាយថា៖ «ជាថ្ងៃប្រវត្តិសាស្ត្រដែលខ្ញុំតំណាងឱ្យរដ្ឋាភិបាលដើម្បីយកផែនទីដែលត្រូវបានចងក្រងដោយប្រទេសវៀតណាម។ វាជាផែនទីទ្វេភាគី ប៉ុន្តែយើងត្រូវការឱ្យពួកគេចងក្រងផែនទីជាអាល់ប៊ុម ឬសៀវភៅពីព្រោះពួកគេមានជំនាញក្នុងការធ្វើដូច្នេះ» ។
លោកបន្តថា៖ «រដ្ឋាភិបាលវៀតណាមបាននិងកំពុងជួយក្នុងរឿងនេះ» ។
លោក វ៉ា គីមហុង បាននិយាយថា ផែនទីចុងក្រោយបំផុតលម្អិតអំពីការសម្របសម្រួលបង្គោលព្រំដែន ក៏ដូចជាខ្សែព្រំដែនជាក់លាក់ និងទីតាំងភូមិសាស្ត្រ។
លោកស្រី កុយ ពិសី អនុប្រធានលេខាធិការដ្ឋានអចិន្ត្រៃយ៍នៃអាជ្ញាធរជាតិទទួលបន្ទុកកិច្ចការព្រំដែន។ (ប្រភព៖ khmertimeskh)
លោកនិយាយថា៖ «ទោះបីយើងបាត់បង់បង្គោលនាពេលអនាគត យើងនៅតែអាចរកទីតាំងរបស់វាបាន»។ លោក វ៉ា គីមហុង បានបន្ថែមថា៖ «ផែនទីនេះ ត្រូវបានបង្កើតឡើងដោយកម្ពុជា ដែលមានអធិបតេយ្យភាពនិងឯករាជ្យភាព មិនស្ថិតក្រោមអាណានិគមរបស់ប្រទេសបរទេសណាទេ។ យើងបានចរចាជាមួយប្រទេសជិតខាងដែលមានអធិបតេយ្យភាពដើម្បីផលិតផែនទីដែលមានមាត្រដ្ឋាន ១/២៥.០០០។
លោកស្រី កុយ ពិសី អនុប្រធានលេខាធិការដ្ឋានអចិន្ត្រៃយ៍នៃអាជ្ញាធរជាតិទទួលបន្ទុកកិច្ចការព្រំដែនដែលបានអមដំណើរលោក វ៉ា គឹមហុង ដើម្បីទទួលផែនទីនៅប្រទេសវៀតណាមក៏បានបដិសេធផងដែរថា ផែនទីនេះមិនត្រូវបានគូរដោយប្រទេសវៀតណាមប៉ុណ្ណោះទេ ប៉ុន្តែដោយភាគីទាំងពីរ។
លោកស្រីបានប្រាប់វិទ្យុក្នុងស្រុកថា ផែនទីទាំងនេះមិនមែនជាផែនទីថ្មីទេ តែជាផលិតថ្មីដែលផលិតដោយប្រើបច្ចេកវិទ្យាឌីជីថល ៤.០ ហើយត្រូវបានបោះពុម្ពនៅប្រទេសដាណឺម៉ាក។
បន្ថែមលើនេះ លោក វ៉ា គីមហុង បានលើកឡើងថា ក្នុងជំនួបនោះ ភាគីទាំងពីរក៏បានពិភាក្សាគ្នាដើម្បីដោះស្រាយបញ្ហាព្រំដែនដែលនៅសេសសល់រវាងប្រទេសទាំងពីរ។
លោកនិយាយថា៖ «ខ្ញុំក៏បានពិភាក្សាជាមួយសមភាគីវៀតណាមរបស់ខ្ញុំដែរ គឺលោក Le Hoai Trung ស្តីពីបញ្ហាព្រំដែន ១៦ ភាគរយដែលនៅសេសសល់» ។ លោក វ៉ា គីមហុង បន្ថែមថា នាយករដ្ឋមន្ត្រីនៃប្រទេសទាំងពីរក៏ប្តេជ្ញាបញ្ចប់បញ្ហាព្រំដែនដែលនៅសេសសល់ឱ្យបាននៅពេលឆាប់ៗនេះ។
លោកនិយាយថា៖ «បន្ទាប់ពីវិបត្តិកូវីត១៩ បានបញ្ចប់ទៅ យើងនឹងចាប់ផ្តើមការចរចារបស់យើងដើម្បីរកវិធីដើម្បីដោះស្រាយបញ្ហាដែលនៅសល់» ។ លោកបន្ថែមទៀតថា ភាគីទាំងពីរត្រូវការ «សុឆន្ទៈ» ដើម្បីបញ្ចប់បញ្ហា។
លោក ផៃ ស៊ីផាន ប្រធានអង្គភាពអ្នកនាំពាក្យរាជរដ្ឋាភិបាលបាននិយាយកាលពីម្សិលមិញថា ការងារព្រំដែនត្រូវបានធ្វើដោយតម្លាភាព និងគណនេយ្យភាព។
លោកនិយាយថា៖ «ទាំងប្រទេសវៀតណាម និងប្រទេសកម្ពុជា មិនមានឆន្ទៈផ្តល់ដីឱ្យគ្នាទៅវិញទៅមកនោះឡើយ»។
លោក ផៃ ស៊ីផាន បានព្រមានក្រុមសកម្មជនកុំឲ្យប្រមូលផ្តុំរាល់ចលនាប្រឆាំងនឹងកិច្ចខិតខំប្រឹងប្រែងរបស់រដ្ឋាភិបាលជុំវិញកិច្ចការព្រំដែន។
លោកនិយាយថា៖ «គ្មានអង្គការក្រៅរដ្ឋាភិបាល ឬសកម្មជនណាមួយ មានសិទ្ធិជ្រៀតជ្រែកក្នុងរឿងនេះទេ។ ការប្រើប្រាស់ចលនាប្រជាជនដើម្បីដោះស្រាយបញ្ហាព្រំដែនមិនអាចទៅរួចទេ»។
កាលពីពេលថ្មីៗនេះ អាជ្ញាធរក៏បានចាប់ខ្លួនមេដឹកនាំសហជីព លោក រ៉ុង ឈុន ពីបទ«ញុះញង់» ជុំវិញការលើកឡើងរបស់លោកទាក់ទងនឹងបញ្ហាព្រំដែន។
គាត់ត្រូវបានសាលាដំបូងរាជធានីភ្នំពេញចោទប្រកាន់ពីបទ «ញុះញង់បង្កឲ្យមានភាពវិកវរធ្ងន់ធ្ងរដល់សន្តិសុខសង្គម» តាមមាត្រា ៤៩៥ នៃក្រមព្រហ្មទណ្ឌ ហើយប្រឈមនឹងការជាប់ពន្ធនាគាររយៈពេល ២ ឆ្នាំនិងពិន័យជាប្រាក់រហូតដល់ ១០០០ ដុល្លារប្រសិនបើរកឃើញថាមានពិរុទ្ធភាព៕
(ប្រែសម្រូលដោយវិច្ឆិកា)
មតិពីមិត្តអ្នកអាន