យុគសម័យ - រដ្ឋាភិបាលនិងប្រជាជនឡាវបានវាយតម្លៃខ្ពស់ចំពោះការជួយឧបត្ថម្ភរបស់រដ្ឋាភិបាលនិងប្រជាជនវៀតណាមដោយចាត់ទុកថានេះជាការលើកទឹកចិត្តនិងជួយជ្រោមជ្រែងដ៏ធំធេងនៅក្នុងគ្រាបង្ការនិងទប់ស្កាត់ជម្ងឺរាតត្បាតកូវីដ១៩ (Covid-19) ។
ទិដ្ឋភាពនៃពិធីទទួល-ប្រគល់គ្រឿងឧបករណ៍ពេទ្យ (រូបថត៖ vnanet)
នាថ្ងៃទី ៤ ខែមេសា នៅទីក្រុងវៀងចន្ទន៍ប្រទេសឡាវឯកអគ្គរដ្ឋទូត វៀតណាមប្រចាំនៅប្រទេសឡាវលោក Nguyen Ba Hung បានប្រគល់គ្រឿងបរិក្ខារពេទ្យស្មើនឹងទឹកប្រាក់ចំនួន ៧ ពាន់លានដុងដល់តំណាងរដ្ឋាភិបាលឡាវ។ នេះគឺជាអំណោយពីរដ្ឋាភិបាលនិងប្រជាជនវៀតណាមដើម្បីជួយរដ្ឋាភិបាលនិងប្រជាជនឡាវទប់ស្កាត់នឹងជំងឺរាតត្បាតកូវីដ១៩។
ថ្លែងមតិក្នុងពិធីប្រគល់នេះ លោកឯកអគ្គរដ្ឋទូត Nguyen Ba Hung បានសង្កត់ធ្ងន់ថាទោះបីស្ថានភាពនៃជំងឺរាតត្បាត Covid-19 កំពុងវិវត្តន៍ដ៏ស្មុគស្មាញទូទាំងពិភពលោក ប៉ុន្តែ រដ្ឋាភិបាលនិងប្រជាជនវៀតណាមបាននិងកំពុងព្យាយាមអនុវត្តវិធានការផ្សេងៗដើម្បីជួយឲ្យរដ្ឋាភិបាលនិងប្រជាជនឡាវ ក្នុងការទប់ទល់នឹងការរាតត្បាតនៃជំងឺឆ្លងដ៏កាចសាហាវនេះផងដែរ។
ក្នុងឱកាសនេះ តាងនាមឲ្យបក្ស រដ្ឋាភិបាលនិងប្រជាជនឡាវ ឧបនាយករដ្ឋមន្ត្រីរដ្ឋាភិបាលឡាវលោក Somdy Duangdy បានថ្លែងអំណរគុណយ៉ាងជ្រាលជ្រៅចំពោះបក្សរដ្ឋាភិបាលនិងប្រជាជនវៀតណាមក្នុងការជួយឧបត្ថម្ភដ៏ថ្លៃថ្នូរនិងទាន់ពេលវេលាសម្រាប់ប្រទេសឡាវនៅពេលដែលប្រទេសឡាវជួបការលំបាកព្រមទាំងប្តេជ្ញាថានឹងប្រើគ្រឿងឧបករណ៍វេជ្ជសាស្រ្តដែលវៀតណាមគាំទ្រលើកនេះប្រកបដោយប្រសិទ្ធភាពបំផុតផងដែរ៕
(បកប្រែដោយ ហេងវុធ្ធី)
(ប្រភពព័ត៌មាន: baoquocte.vn)
មតិពីមិត្តអ្នកអាន