យុគសម័យ - នាយឧត្តមសេនីយ៍ Yamazaki Koji នាយសេនាធិការនៃកងស្វ័យការពារជប៉ុន បានអញ្ជើញមកបំពេញទស្សនកិច្ចជាផ្លូវការនៅប្រទេសវៀតណាមចាប់ពីថ្ងៃទី ១ ដល់ថ្ងៃទី៤ ខែមិនាឆ្នាំ ២០២០ ។
នាយឧត្តមសេនីយ៍ Ngo Xuan Lich រដ្ឋមន្រ្តីក្រសួងការពារប្រទេសវៀតណាម និងនាយឧត្តមសេនីយ៍ Yamazaki Koji (រូបថត៖ vnanet)
នាព្រឹកថ្ងៃទី ២ ខែមីនា ពិធីទទួលបដិសណ្ឋារកិច្ចនាយឧត្តមសេនីយ៍ Yamazaki Koji និងសមាជិកគណៈប្រតិភូជប៉ុន បានប្រព្រឹត្តទៅនៅទីក្រុងហាណូយ។ នាព្រឹកថ្ងៃទី ២ ខែមីនា នាយឧត្តមសេនីយ៍ Yamazaki Koji បានចូលជួបសម្តែងការគួរសមជាមួយនាយឧត្តមសេនីយ៍ Ngo Xuan Lich រដ្ឋមន្រ្តីក្រសួងការពារប្រទេសវៀតណាម។
ក្នុងជំនួបនេះ នាយឧត្តមសេនីយ៍ Ngo Xuan Lich បានវាយតម្លៃខ្ពស់ចំពោះលទ្ធផលនៃជំនួបពិភាក្សារវាងគណៈប្រតិភូយោធាជាន់ខ្ពស់វៀតណាមដឹកនាំដោយឧត្តមសេនីយ៍ឯកបំរុង Phan Van Giang និងគណៈប្រតិភូយោធាជាន់ខ្ពស់ជប៉ុនដឹកនាំដោយនាយឧត្តមសេនីយ៍ Yamazaki Koji ។ទន្ទឹមនឹងនេះដែរ ភាគីទាំងពីរបានឯកភាពគ្នាពិចារណាការជម្រុញកិច្ចសហប្រតិបត្តិការលើវិស័យបណ្តុះបណ្តាលដែលមានជំនាញការ ដូចជាផ្នែកវេជ្ជសាស្ត្រក្រោមទឹក ជួយសង្គ្រោះគ្រោះថ្នាក់បន្ទាន់ ព្រមទាំងផ្តល់សំភារៈបរិក្ខាវេជ្ជសាស្រ្តដ់ម្បីជួយសង្គ្រោះជនរងគ្រោះនៅតាមសមុទ្រសំរាប់កងទ័ពជើងទឹកវៀតណាមជាដើម។
លោកនាយឧត្តមសេនីយ៍ Yamazaki Koji បានអះអាងថា កិច្ចសហប្រតិបត្តិការការពារជាតិជប៉ុន - វៀតណាមគឺជាសកម្មភាពមួយក្នុងចំណោមសកម្មភាពសំខាន់ៗដែលរួមចំណែកក្នុងការរឹតចំណងមិត្តភាពនិងកិច្ចសហប្រតិបត្តិការរវាងប្រទេសទាំងពីរ ដើម្បីសន្តិភាព កិច្ចសហប្រតិបត្តិការនិងការអភិវឌ្ឍន៍រួមក្នុងតំបន់និងពិភពលោកផងដែរ៕
(បកប្រែដោយ ហេង វុធ្ធី)
(ប្រភពព័ត៌មាន: vietnamplus.vn)
មតិពីមិត្តអ្នកអាន