បច្ចុប្បន្ន សម្ពន្ធឧស្សាហកម្មកៅស៊ូ សម្ពន្ធថាឌី វៀតណាម និងក្រុមហ៊ុនចម្ការកៅស៊ូវៀតណាមនៅកម្ពុជា បានឹងកំពុងបោះទុនវិនិយោកលើការដាំកៅស៊ូនៅលើផ្ទៃដីប្រមាណជាង ២ម៉ឺនហិកតា នៅខេត្តរតនគិរី មណ្ឌលគិរី និងខេត្តក្រចេះ ដែលកំពុងមានតម្រូវការកម្លាំងពលកម្ម ឆ្នាំ២០២០-២០២១ មានជាង១សែន៥ពាន់នាក់។
តំណាំងថតរូបទុកជាអនុស្សាវរីយ៍ (រូបថត៖ propertyarea.asia)
កឧកញ៉ា ឡេង ឫទ្ធី ប្រធានសមាគមចំការកៅស៊ូវៀតណាមប្រចាំកម្ពុជា នៅក្នុងជំនួបពិភាក្សាការងារជាមួយលោក លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈនៅថ្ងៃទី ១៨ ខែមីនា ឆ្នាំ ២០២០នេះ ឱ្យដឹងថា
ទន្ទឹមនឹងការរីកចំរើនលើវិស័យដំណាំកៅ ក្រុមហ៊ុនក៏ត្រូវការកម្លាំងពលកម្មភ្លាមៗប្រមាណ ៩០០០នាក់បន្ថែមទៀត។
លោកឧកញ៉ាបន្តថា អ្នកដែលធ្វើការក្នុងចម្ការកៅស៊ូទាំងនោះ ទទួលបានប្រាក់ឈ្នួលទាបបំផុត ៨០ម៉ឺនរៀល សម្រាប់អ្នកជៀជ័រអាចរកចំណូលបានចាប់ពី ១លានរៀល ទៅ ១លាន៥សែនរៀល ហើយបងប្អូនកម្មករមានកន្លែងស្នាក់នៅសមរម្យ មិនបាច់ចំណាយថ្លៃទឹក និងថ្លៃភ្លើង។
លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានសំដែងនូវការពេញចិត្តនឹងគាំទ្រយ៉ាងខ្លាំងចំពោះការចូលរួមក្នុងការបណ្តាក់ទុនវិនិយោគរបស់វៀតណាមលើគ្រប់វិស័យ នៅកម្ពុជា ជាពិសេសទៅលើវិស័យកសិកម្ម ដូចជាដំណាំកៅស៊ូជាដើម បើទោះបីកំពុងប្រឈមនឹងជំងឺកូវិដ១៩ ក៏ដោយ។
លោករដ្ឋមន្ត្រីបានណែនាំឱ្យក្រុមហ៊ុនធ្វើការសហការជាមួយទីភ្នាក់ងារជាតិមុខរបរ និងការងារ (NEA) ដើម្បីចុះទៅផ្សព្វផ្សាយ និងជ្រើសរើសកម្លាំងពលកម្មទៅតាមមូលដ្ឋាន ឬកម្លាំងពលកម្មដែលបងប្អូនយើងបាត់បង់ការងារដោយសារតែសហគ្រាស គ្រឹះស្ថានរបស់ខ្លួនមិនអាចដំណើរការងារបានដោយបញ្ហាជំងឺកូវិដ១៩ជាដើម។
លោករដ្ឋមន្ត្រីបន្ថែមថា បច្ចុប្បន្នកម្ពុជាមានកម្លាំងពលកម្មសរុបទាំងអស់ ១០លាននាក់ ក្នុងនោះវិស័យកសិកម្មមាន ៤លាននាក់ វិស័យឧស្សាហកម្ម និងសិប្បកម្មមាន ១.៥លាននាក់ វិស័យសេដ្ឋកិច្ចក្រៅប្រព័ន្ធមាន ២.៤លាននាក់ ពលករទៅធ្វើការនៅក្រៅប្រទេសមានជាង ១.២លាននាក់ និងមន្ត្រីរាជការមាន ៥សែននាក់ ដែលទាំងនេះជាប្រភពដែលយើងអាចចល័តកម្លាំងពលកម្មទៅតាមតម្រូវការនៃវិស័យ។
របាយការណ៍របស់ក្រសួងរុក្ខាប្រមញ្ញ និងនេសាទ បានបង្ហាញកាលពីពេលថ្មីៗនេះ ថា កម្ពុជាបាននាំចេញកៅស៊ូចំនួន ២៨២ ០៧១ តោន ដែលមានតម្លៃ ៣៧៧ លានដុល្លារ កាលពីឆ្នាំ២០១៩ កើនឡើង ៣០ ភាគរយ បើធៀបនឹងឆ្នាំ ២០១៨។ ទិន្នន័យនេះបង្ហាញទៀតថា ផ្ទៃដីដាំកៅស៊ូនៅកម្ពុជាសរុប ៤០៦ ១៤២ ហិកតា កាលពីឆ្នាំមុនក្នុងនោះកៅស៊ូជាង ២៤៧ ១១៤ ហិកតា ត្រូវបានប្រមូលផល។
ទិដ្ឋភាពនៃជំនួប ((រូបថត៖ propertyarea.asia)
របាយការណ៍ដដែលបញ្ជាក់ថា កំណើននៃការនាំចេញនេះដោយសារតម្រូវការកៅស៊ូសកលកើនឡើង និង ការកើនឡើងនៃចំនួនដើមកៅស៊ូចៀរជ័រក៏បានជំរុញឲ្យបរិមាណនាំចេញកើនឡើងផងដែរ។
លោក ជាង ឡាំង ម្ចាស់ចម្ការកៅស៊ូនៅខេត្តរតនគីរី បានប្រាប់ឲ្យដឹងថា តម្លៃកៅស៊ូនៅឆ្នាំ២០១៩កន្លងទៅនេះ ហាក់មានភាពល្អប្រសើរគ្រាន់បើជាងឆ្នាំមុន ដោយតម្លៃសម្រាប់កៅស៊ូប្រភេទជ័រដុំធំៗមានតម្លៃចាប់ពី ២.៣៥០ រៀលក្នុងមួយគីឡូក្រាម ខណៈដែលប្រភេទជ័រដុំតូចៗដែលគេបង្កកដាក់ចានវិញ លក់បានក្នុងតម្លៃពី២.៧០០ រៀល ទៅ២.៨០០ រៀលក្នុងមួយគីឡូក្រាម។
លោក ជាង ឡាំង បានបន្ថែមទៀតថា ចំពោះតម្លៃកៅស៊ូប៉ុណ្ណេះ គឺជាតម្លៃសមរម្យអាចធ្វើឲ្យម្ចាស់ចម្ការកៅស៊ូអាចបន្ដរស់បាន តែបើសិនជាម្ចាស់ចម្ការកៅស៊ូដែលមានបំណុលធនាគារច្រើនគឺពិតជាលំបាក ហើយ។
បើតាមការអះអាងរបស់ម្ចាស់ចម្ការកៅស៊ូ ទិន្នផលកៅស៊ូភាគច្រើនត្រូវបានលក់ជាវត្ថុធាតុដើមទៅឲ្យប្រទេសជិតខាង ពិសេសគឺវៀតណាម។ ពួកគាត់ក៏សង្ឃឹមថា នឹងមានរោងចក្រកែច្នៃកៅស៊ូក្នុងស្រុកឲ្យបានកាន់តែច្រើន នោះទើបធ្វើឲ្យតម្លៃទីផ្សារកៅស៊ូក្នុងស្រុកមានលំនឹង។
បើតាមរបាយការណ៍ពីអគ្គនាយកដ្ឋានកៅស៊ូ បានបង្ហាញថា តម្លៃកៅស៊ូដែលប្រមូលទិញពីកសិករកៅស៊ូគ្រួសារនៅថ្ងៃទី ២០ ខែមករានេះ គិតជាមធ្យមសម្រាប់ប្រភេទកៅស៊ូទឹកជ័រ មានតម្លៃ តម្លៃ ៤.៦៥៣ រៀល ក្នុងមួយគីឡូក្រាម ខណៈដែលតម្លៃកៅស៊ូប្រភេទជ័រកក គិតជាមធ្យមមាន ២.៤០៤ រៀលក្នុងមួយគីឡូក្រាម។
សូមបញ្ជាក់ថា តាមរបាយការណ៍ពីក្រសួងកសិកម្មបង្ហាញថា កម្ពុជាមានផ្ទៃដីដាំដុះកៅស៊ូសរុបចំនួនជាង ៤៣ម៉ឺនហិកតា ក្នុងនោះ ផ្ទៃដីដែលចៀរជ័កៅស៊ូបានមានចំនួនជាង២៣ម៉ឺនហិកតា៕
（ប្រភពព័ត៌មាន: propertyarea.asia/）
មតិពីមិត្តអ្នកអាន