យុគសម័យ - នាព្រឹកថ្ងៃទី ១៩ ខែកុម្ភៈ ក្នុងក្របខ័ណ្ឌនៃកិច្ចប្រជុំរដ្ឋមន្ត្រីការពារជាតិ អាស៊ានចង្អៀតឆ្នាំ ២០២០ (ADMM ចង្អៀត) ដែលបានប្រារព្ធធ្វើឡើងនៅទីក្រុងហាណូយ នាយឧត្តមសេនីយ៍ Ngo Xuan Lich រដ្ឋមន្រ្តីក្រសួងការពារប្រទេសវៀតណាម បានអញ្ជើញជួបពិភាក្សាការងារជាមួយលោកនាយឧត្តមសេនីយ៍ទៀបាញ់ឧបនាយករដ្ឋមន្រ្តីនិងជារដ្ឋមន្រ្តីក្រសួងការពារជាតិនៃព្រះរាជាណាចក្រកម្ពុជា។
នាយឧត្តមសេនីយ៍ Ngo Xuan Lich រដ្ឋមន្រ្តីក្រសួងការពារប្រទេសវៀតណាម និងលោកនាយឧត្តមសេនីយ៍ទៀបាញ់ឧបនាយករដ្ឋមន្រ្តីនិងជារដ្ឋមន្រ្តីក្រសួងការពារជាតិនៃព្រះរាជាណាចក្រកម្ពុជា (រូបថត៖ baotintuc)
ក្នុងជំនួបនេះ នាយឧត្តមសេនីយ៍ Ngo Xuan Lich និងនាយឧត្តមសេនីយ៍ទៀបាញ់បានសម្តែងនូវការសប្បាយរីករាយចំពោះការអភិវឌ្ឍដ៏ល្អប្រពៃនៃទំនាក់ទំនងមិត្តភាពជាប្រពៃណីនិងកិច្ចសហប្រតិបត្តិការគ្រប់ជ្រុងជ្រោយរវាងប្រទេសទាំងពីរ និងកងទ័ពទាំងពីរ។ ក្នុងរយៈពេលប៉ុន្មានឆ្នាំកន្លងមក កិច្ចសហប្រតិបត្តិការការពារជាតិវៀតណាម - កម្ពុជាបានបន្តនាំមកនូវប្រសិទ្ធភាពជាក់ស្តែងនិងជាសរសរស្តម្ភស្នូលនៃទំនាក់ទំនងទ្វេភាគី។ ភាគីទាំងពីរបានផ្លាស់ប្តូរគណៈប្រតិភូគ្រប់ជាន់ថ្នាក់ជាប្រចាំដោយរក្សាប្រសិទ្ធភាពនៃយន្តការសហប្រតិបត្តិការ ក្នុងនោះមានកិច្ចសន្ទនាគោលនយោបាយការពារជាតិនិងការសម្របសម្រួលគ្នាយ៉ាងល្អក្នុងការបណ្តុះបណ្តាលធនធានមនុស្សគ្រប់គ្រងនិងការពារខ្សែព្រំដែនជាដើម។
ទន្ទឹមនឹងនេះ លោក នាយឧត្តមសេនីយ៍ទៀបាញ់ក៏បានវាយតម្លៃខ្ពស់ចំពោះការរៀបចំរបស់វៀតណាមចំពោះសកម្មភាពនៃកិច្ចប្រជុំរដ្ឋមន្ត្រីការពារជាតិអាស៊ានក៏ដូចជាសន្និសីទនិងសកម្មភាពយោធា - ការពារ ក្រោមអធិបតីភាពរបស់ក្រសួងការពារប្រទេស វៀតណាម ព្រមទាំងសំដែងការជឿជាក់ថា យន្តការសហប្រតិបត្តិការដូចជា ADMM និង ADMM + នឹងបន្តមានប្រសិទ្ធភាពនិងដើរតួនាទីយ៉ាងសំខាន់នៅក្នុងនិម្មាបនកម្មសន្តិសុខក្នុងតំបន់ផងដែរ។
ក្នុងឱកាសនេះ រដ្ឋមន្រ្តីទាំងពីរក៏បានឯកភាពបន្តដឹកនាំបណ្តាស្ថាប័ន និងអង្គភាពនានារបស់ក្រសួងការពារជាតិ ដើម្បីអនុវត្តប្រកបដោយប្រសិទ្ធភាពនូវយន្តការសហប្រតិបត្តិការដែលបានចុះហត្ថលេខា ព្រមទាំងជំរុញការផ្សព្វផ្សាយឃោសនាសម្រាប់ប្រជាជនអំពីអំពីទំនាក់ទំនងប្រពៃណីដ៏ល្អប្រពៃរវាងប្រទេសទាំងពីរ ដើម្បីរួមចំណែកដល់ការវាយបរាជ័យលើរាល់ឧបាយកលបំបែកបាក់របស់កម្លាំងអរិភាពទាំងអស់ផង ដែរ៕(បកប្រែដោយ ហេង វុធ្ធី)
មតិពីមិត្តអ្នកអាន