យុគសម័យ - នារសៀលថ្ងៃទី ១៤ ខែវិច្ឆិកា នៅទីស្នាក់ការនៃក្រសួងការពារជាតិ ឧត្តមសេនីយ៍ឯក Phan Van Giang សមាជិក គណៈកម្មការអចិន្រ្តៃយ៍យោធាមជ្ឈិម នាយអគ្គសេនាធិការ អនុរដ្ឋមន្រ្តីក្រសួងការពារជាតិ បានទទួលជួបនាយឧត្តមសេនីយ៍ សឹង សំណាង មេបញ្ជាការកងទ័ពអាកាស នៃកងយោធពលខេមរភូមិន្ទកម្ពុជាក្នុងឱកាសលោកបានអញ្ជើញបំពេញដំណើរទស្សនកិច្ចនិងធ្វើការមកកាន់ប្រទេសវៀតណាម។
នាយឧត្តមសេនីយ៍ សឹង សំណាង និង ឧត្តមសេនីយ៍ឯក Phan Van Giang។(ប្រភព៖ qdnd)
នាយឧត្តមសេនីយ៍ សឹង សំណាង បានថ្លែងអំណរគុណយ៉ាងជ្រាលជ្រៅចំពោះការគាំទ្រនិងជំនួយដ៏ធំធេងដែលប្រទេសវៀតណាមបានផ្តល់ដល់ប្រទេសកម្ពុជាក្នុងបុព្វហេតុរំដោះប្រទេសជាតិនិងប្រជាជនកម្ពុជាពីរបបប្រល័យពូជសាសន៍ប៉ុលពត។ នាយឧត្តមសេនីយ៍ សឹង សំណាង បានជម្រាបជូន ឧត្តមសេនីយ៍ឯក Phan Van Giang ពីលទ្ធផលនៃកិច្ចប្រជុំជាមួយបញ្ជាការដ្ឋានការពារអាកាស កងទ័ពអាកាសវៀតណាម។ ដូច្នោះភាគីទាំងពីរបានរួមគ្នាវាយតម្លៃលទ្ធផលនៃកិច្ចសហប្រតិបត្តិការនាពេលកន្លងមកនិងបានដាក់ទិសដៅសម្រាប់កិច្ចសហប្រតិបត្តិការនាពេលខាងមុខ ជាពិសេសលើវិស័យផ្លាស់ប្តូរគណៈប្រតិភូការ ផ្លាស់ប្តូរមន្រ្តីវ័យក្មេង និងការបណ្តុះបណ្តាល។
ឧត្តមសេនីយ៍ឯក Phan Van Giang បានយល់ព្រមនិងវាយតម្លៃខ្ពស់ចំពោះលទ្ធផលនៃកិច្ចប្រជុំនេះ។ ឧត្តមសេនីយ៍ឯក Phan Van Giang បានលើកឡើងថា លទ្ធផលល្អនៃកិច្ចសហប្រតិបត្តិការរវាងកងទ័ពអាកាសនៃប្រទេសទាំងពីរបានរួមចំណែកដល់ការពង្រឹងទំនាក់ទំនងសាមគ្គីភាពរវាងកងទ័ពនិងប្រជាជនវៀតណាម - កម្ពុជា។ ទន្ទឹមនឹងនេះលោកឧត្តមសេនីយ៍ឯកមានជំនឿថាភាគីទាំងពីរបន្តមានវិធានការសហប្រតិបត្តិការប្រកបដោយប្រសិទ្ធភាពដើម្បីចូលរួមចំណែកក្នុងការកសាងកងទ័ពអាកាសនៃប្រទេសទាំងពីរឱ្យកាន់តែរឹងមាំថែមទៀត។ ឧត្តមសេនីយ៍ឯក Phan Van Giang បានអះអាងថាថ្នាក់ដឹកនាំក្រសួងការពារជាតិវៀតណាមតែងតែគាំទ្រនិងបង្កើតលក្ខខណ្ឌអំណោយផលបំផុតសម្រាប់កងទ័ពអាកាសនៃប្រទេសទាំងពីរបន្តសហប្រតិបត្តិការល្អជាមួយគ្នានាពេលអនាគត៕
（ប្រែសម្រូលដោយវិច្ឆិកា）
មតិពីមិត្តអ្នកអាន