យុគសម័យ - នាថ្ងៃទី២៥ ខែមិថុនា នៅទីក្រុងហាណូយ អនុប្រធានអចិន្ត្រៃយ៍នៃគណៈកម្មាធិការប្រជាជនទីក្រុងហាណូយ លោក Nguyen Van Suu បានទទួលជួបជាមួយ គណៈប្រតិភូបញ្ជាការដ្ឋានយោធភូមិភាគពិសេសនៃកងយោធពលខេមរៈភូមិន្ទ ដឹកនាំដោយលោកនាយឧត្តមសេនីយ៍ ពូ សាប៊ុតឌី មេបញ្ជាការរងកងទ័ពជើងគោក និងជាមេបញ្ជាការ យោធភូមិភាគពិសេសនៃកងយោធពលខេមរៈភូមិន្ទ។
អនុប្រធានអចិន្ត្រៃយ៍នៃគណៈកម្មាធិការប្រជាជនទីក្រុងហាណូយ លោក Nguyen Van Suu បានទទួលជួបជាមួយលោកនាយឧត្តមសេនីយ៍ ពូ សាប៊ុតឌី មេបញ្ជាការរងកងទ័ពជើងគោក និងជាមេបញ្ជាការ យោធភូមិភាគពិសេសនៃកងយោធពលខេមរៈភូមិន្ទ (Thuy Linh)
ជំនួបនេះបានប្រារព្ធធ្វើឡើងក្នុងក្របខ័ណ្ឌដែលគណៈប្រតិភូបានមកកាន់ទីក្រុងហាណូយដើម្បីចូលរួមសន្និសីទត្រីភាគី រវាងបញ្ជាការដ្ឋានរដ្ឋធានីហាណូយ, បញ្ជាការយោធភូមិភាគពិសេសនៃកងយោធពលខេមរៈភូមិន្ទនិងបញ្ជការដ្ឋានយោ ធាវៀងច័ន្ទ (ឡាវ) ដែលប្រព្រឹត្តទៅចាប់ពីថ្ងៃទី ២៤ ដល់ថ្ងៃទី ២៩ ខែមិថុនាឆ្នាំ ២០១៩។
ក្នុងជំនួបនេះ លោក Nguyen Van Suu បានវាយតម្លៃខ្ពស់ ចំពោះសារៈសំខាន់នៃដំណើរទស្សនកិច្ចរបស់គណៈប្រតិភូកម្ពុជា ដោយបានសង្កត់ធ្ងន់ថា ដំណើរទស្សនកិច្ចនេះ ជាសកម្មភាពបញ្ជាក់ពីកិច្ចខិតខំប្រឹងប្រែងរបស់ភាគីទាំងពីរ ក្នុងការកសាងទំនាក់ទំនងមិត្តភាពនិងកិច្ចសហប្រតិបត្តិការដ៏ល្អប្រពៃ។ ជាពិសេស រដ្ឋធានីហាណូយកំពុងដំណើរការអភិ វឌ្ឍន៍យ៉ាងខ្លាំងលើវិស័យជាច្រើន ហេតុដូច្នេះ ហាណូយត្រៀមជាស្រេច សហការជាមួយបណ្តាតំបន់របស់កម្ពុជាដើម្បីរួមគ្នាអភិវឌ្ឍន៍។
ចំណែកឯ លោកនាយឧត្តមសេនីយ៍ ពូ សាប៊ុតឌី បានមានប្រសាសន៍ថា នេះគឺជាសកម្មភាពមានអត្ថន័យពិសេស ដើម្បីពង្រឹងទំនាក់ទំនងជាប្រពៃណីដែលត្រូវបានពូនជ្រុំក្នុងរយៈពេលជាច្រើនមកនិងជាឱកាសសម្រាប់ភាគីនានាដើម្បីផ្លាស់ប្តូរបទពិសោធន៍និងរៀនសូត្រពីគ្នាទៅវិញទៅមក។
ឆ្លៀតពេលនេះ លោកពូ សាប៊ុត ឌី បានលើកឡើងថា កងទ័ពនិងប្រជាជនកម្ពុជាតែងតែចងចាំជានិច្ចចំពោះពលីកម្មក៏ដូចជាគុណបំណាចរបស់កងទ័ពស្ម័គ្រចិត្តវៀតណាម ដែលបានជួយផ្តួលរលំរបបប្រល័យពូជសាសន៍ប៉ុលពតដើម្បី ឱ្យកម្ពុជាអាចរស់រានមានជីវិតនិងកំពុងអភិវឌ្ឍន៍ដូចសព្វថ្ងៃនេះ។ លោកនាយឧត្តមសេនីយ៍ ពូ សាប៊ុត ឌី ក៏បានថ្លែងអំណរគុណចំពោះកិច្ចសហប្រតិបត្តិការនិងការជួយឧបត្ថម្ភរបស់បញ្ជាការដ្ឋានរដ្ឋធានីហាណូយ ក៏ដូចជាទីក្រុងហាណូយនាពេលកន្លងមកផងដែរ៕
(សរុបព័ត៌មានដោយ ស្រីពេជ្រ)
មតិពីមិត្តអ្នកអាន