យុគសម័យ - ក្នុងក្របខ័ណ្ឌនៃដំណើរទស្សនកិច្ចនៅព្រះរាជាណាចក្រកម្ពុជា នាព្រឹកថ្ងៃទី១០ខែមករា ឆ្នាំ២០១៩ គណៈប្រតិភូជាន់ខ្ពស់នៃគណៈកម្មាធិការត្រួតពិនិត្យមជ្ឈិមបក្ស ដឹកនាំដោយលោក Tran Cam Tu លេខាមជ្ឈិមបក្ស និងជាប្រធានគណៈកម្មាធិការត្រួតពិនិត្យមជ្ឈឹមបក្សកុម្មុយនីស្តវៀតណាម បានអញ្ជើញចូលជួបសម្តែងការគួរសម ចំពោះ សម្តេចអគ្គមហាពញាចក្រី ហេង សំរិន។
ក្នុងឱកាសនោះ សម្តេចប្រធានរដ្ឋសភាកម្ពុជាបានលើកឡើងថា កាលពីថ្ងៃអាទិត្យកន្លងទៅ ពោលគឺនៅថ្ងៃទី៧ ខែមករា ឆ្នាំ២០១៩ កម្ពុជាបានរៀបចំពិធីអបអរសាទរខួបទី៤០ ថ្ងៃជ័យជម្នះ ៧មករា (៧មករា ១៩៧៩-៧មករា ២០១៩ ) យ៉ាងអធិកអធម។ សម្តេចបានគូសបញ្ជាក់ថា ៧មករា ឆ្នាំ១៩៧៩ ត្រូវបានប្រជាពលរដ្ឋកម្ពុជាចាត់ទុកថាជាថ្ងៃកំណើតទី២ ជាសករាជថ្មី ដែលនាំឲ្យ កម្ពុជា បានស្គាល់សុខសន្តភាពនិងការអភិវឌ្ឍដូចសព្វថ្ងៃនេះ។
សម្តេចប្រធានរដ្ឋសភាកម្ពុជា បានថ្លែងអំណរគុណចំពោះបក្សកម្មុយនីស្តវៀតណាម ប្រជាជន និងកងទ័ពស្ម័គ្រចិត្តវៀតណាម ដែលបានរួមចំណែកយ៉ាងធំធេង ក្នុងការជួយរំដោះប្រជាជនកម្ពុជា ឲ្យរួចផុតពីរបបប្រល័យពូជសាសន៍ប៉ុលពតនៅថ្ងៃទី៧ខែមករាឆ្នាំ ១៩៧៩។ សម្តេចអគ្គមហាពញាចក្រី ហេង សំរិន បានគូសបញ្ជាក់ថា រយៈ ៤០ឆ្នាំមកនេះ កម្ពុជាបានខិតខំយ៉ាងលំបាក ក្នុងការស្តា កសាង និងអភិវឌ្ឍប្រទេសជាតិ ឱ្យមានការរីកចម្រើនដូចពេលបច្ចុប្បន្ន ដោយមានការជួយឧបត្ថម្ភ គាំទ្រ ពីមិត្តភ័ក្តិ ប្រទេសជាមិត្តជិតឆ្ងាយ ជាពិសេសគឺ រដ្ឋាភិបាល និងប្រជាជនវៀតណាម។
ប្រធានគណៈប្រតិភូវៀតណាមលោក Tran Cam Tu បានសម្តែងការអបអរសាទរចំពោះការអភិវឌ្ឍរបស់កម្ពុជាលើគ្រប់វិស័យ។ លោក Tran Cam Tu ក៍បានអបអរសាទរផងដែរចំបោះលទ្ធផលបោះឆ្នោតជ្រើសតំាងសមាជិករដ្ឋសភានីតិកាលទី៦ នាពេលកន្លងទៅ និងបានសម្តែងសុទិដ្ឋិនិយមថាក្រោមម្លប់របស់ព្រះករុណាព្រះមហាក្សត្រ និងក្រោមការដឹកនាំរបស់សភា រាជរដ្ឋាភិបាល ប្រទេសកម្ពុជានឹងទទួលបានជោគជ័យថ្មីៗបន្តទៀត។
នារសៀល ថ្ងៃទី១០ ខែមករា ឆ្នាំ២០១៩ លោកជំទាវ កិត្ដិសង្គហបណ្ឌិត ម៉ែន សំអន ឧបនាយករដ្ឋមន្ដ្រី រដ្ឋមន្ដ្រីក្រសួងទំនាក់ទំនង ជាមួយរដ្ឋសភា ព្រឹទ្ធសភា និងអធិការកិច្ច បានអនុញ្ញាតទទួលជួបជាមួយ លោក Tran Cam Tu លេខាធិការមជ្ឈឹមបក្ស និងជាប្រធានគណៈកម្មាធិការត្រួតពិនិត្យ មជ្ឈឹមបក្សកុម្មុយនីស្តវៀតណាម ដើម្បីពិភាក្សាការងារ និងសម្តែងការគួរសម នៅទ៏ស្តីការក្រសួងផងដែរ។
នៅខាងក្រោមនេះគឺជារូបភាពមួយចំនួននៃសកម្មភាពរបស់គណៈប្រតិភូជាន់ខ្ពស់នៃគណៈកម្មាធិការត្រួតពិនិត្យមជ្ឈិមនៅកម្ពុជា៖
សម្តេចអគ្គមហាពញាចក្រី ហេង សំរិន ប្រធានកិត្តយសគណបក្សប្រជាជនកម្ពុជា (CPP) និងជាប្រធានរដ្ឋសភាកម្ពុជាអញ្ជើញទទួលជួបជាមួយគណៈប្រតិភូ (រូបថតៈ TTXVN)
ឧបនាយករដ្ឋមន្ដ្រី រដ្ឋមន្ដ្រីក្រសួងទំនាក់ទំនង ជាមួយរដ្ឋសភា ព្រឹទ្ធសភា និងអធិការកិច្ច លោកជំទាវ ម៉ែន សំអន អញ្ជើញទទួលជួបជាមួយគណៈប្រតិភូ (រូបថតៈ TTXVN)
អនុប្រធានគណបក្សប្រជាជនកម្ពុជា (CPP) ប្រធានព្រឹទ្ធសភាកម្ពុជា សម្តេច សាយ ឈុំ អញ្ជើញទទួលជួបជាមួយគណៈប្រតិភូ (រូបថតៈ TTXVN)
លោក Tran Cam Tu លេខាមជ្ឈិមបក្ស និងជាប្រធានគណៈកម្មាធិការត្រួតពិនិត្យមជ្ឈិមអញ្ជើញថ្លែងមតិ
ឯកឧត្តម ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) ទទួលស្វាគមគណៈប្រតិភូ (រូបថតៈ TTXVN)
ឯកឧត្តម ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) ឧទ្ទេសនាមជាមួយគណៈប្រតិភូអំពីទីស្នាក់ការនិងមុខងារភារកិច្ចរបស់ ACU។ (រូបថតៈ TTXVN)
ទិដ្ឋភាពនៃជំនួបពិភាក្សាជាមួយ ACU (រូបថតៈ TTXVN)
(សរុបព័ត៌មាន ដោយ ស្រីព្រេជ)
មតិពីមិត្តអ្នកអាន