អ្នកជំនាញកម្ពុជានិងវៀតណាមបាននិងកំពុងសហការយ៉ាងស្អិតរមួតក្នុងការរិះរកមធ្យោបាយនិងនីតិវិធីដើម្បីជំរុញការដឹកជញ្ជូនឆ្លងកាត់ព្រំដែនរវាងប្រទេសទាំងពីរឱ្យកាន់តែប្រសើរឡើងកាត់បន្ថយការកកស្ទះនៅតាមច្រកទ្វារអន្តរជាតិនិងបង្កើនបរិមាណរថយន្តដឹកទំនិញឆ្លងកាត់ព្រំដែនឱ្យកាន់តែកើនឡើង សំដៅជំរុញកំណើនសេដ្ឋកិច្ចនៃប្រជាជាតិទាំងពីរ។
លោក ឈៀង ពេជ្រអគ្គនាយកនៃអគ្គនាយកដ្ឋានភស្តុភារកម្មនិងជាប្រធានឧត្ដមមន្ត្រីដឹកជញ្ជូនកម្ពុជា
នេះជាប្រសាសន៍លើកឡើងរបស់លោក ឈៀង ពេជ្រអគ្គនាយកនៃអគ្គនាយកដ្ឋានភស្តុភារកម្មនិងជាប្រធានឧត្ដមមន្ត្រីដឹកជញ្ជូនកម្ពុជា ក្នុងកិច្ចប្រជុំស្ដីពីការធ្វើឱ្យប្រសើរឡើងការដឹកជញ្ជូនឆ្លងកាត់ព្រំដែនកម្ពុជានិងវៀតណាមជាពិសេសច្រកទ្វារព្រំដែនអន្តរជាតិបាវិត-ម៉ុកបៃ និងព្រៃវល្លិ-ប៊ិញហៀប នាថ្ងៃទី១៩ ខែកុម្ភៈ ឆ្នាំ២០២១ នៅទីស្ដីការក្រសួងសាធារណការ និងដឹកជញ្ជូន។
កិច្ចប្រជុំនេះធ្វើឡើងតាមរយៈប្រព័ន្ធវីដេអូពីចម្ងាយនិងដឹកនាំដោយសហប្រធាននៃប្រទេសទាំងពីរដោយមានការចូលរួមពីថ្នាក់ដឹកនាំនិងមន្ត្រីជំនាញនៃភាគីទាំងពីរដើម្បីពិនិត្យនិងបញ្ចប់កំណត់ហេតុកិច្ចប្រជុំទ្វេភាគីរវាងព្រះរាជាណាចក្រកម្ពុជានិងសាធារណរដ្ឋសង្គមនិយមវៀតណាមពិភាក្សាលើការបង្កើតក្រុមការងាររួមពិនិត្យនិងបញ្ចប់អនុស្សរណៈលើកូតាការចេញចូលរថយន្តដឹកទំនិញរបស់ប្រទេសទាំងពីរ។
លោកឈៀងពេជ្របានឱ្យដឹងទៀតថាតាមកិច្ចព្រមព្រៀងលើអនុស្សរណៈយោគយល់ប្រទេសទាំងពីរបានកំណត់កូតាអនុញ្ញាតឱ្យរថយន្តដឹកទំនិញឆ្លងកាត់ព្រំដែនចំនួន៨០០គ្រឿង។ជាមួយគ្នានោះយើងបានស្នើខាងភាគីវៀតណាឱ្យកំណត់កាលបរិច្ឆេទនៃកិច្ចប្រជុំលើកទីមួយរបស់ក្រុមការងាររួមនៃប្រទេសទាំងពីរនិងកំណត់កាលបរិច្ឆេទសម្ពោធបើកឱ្យដំណើរការជាផ្លូវការច្រកទ្វារព្រំដែនអន្តរជាតិព្រៃវល្លិ៍-ប៊ិញហៀបផងដែរ។
ជាការឆ្លើយតបភាគីវៀតណាមបានឱ្យដឹងថាវៀតណាមបានត្រៀមខ្លួនរួចជាស្រេចដើម្បីរៀបចំសម្ពោធបើកឱ្យដំណើរការជាផ្លូវការច្រកទ្វារព្រំដែនអន្តរជាតិព្រៃវល្លិ៍-ប៊ិញហៀបនេះប៉ុន្តែជាអកុសលបញ្ហាកូវីដ-១៩បានធ្វើឱ្យភាគីវៀតណាមរាំងស្ទះក្នុងការរៀបចំពីធីនេះតាមការគ្រោងទុក។ទោះជាយ៉ាងនេះក្ដីភាគីទាំងពីរបានប្ដេជ្ញាជំរុញរៀបចំពិធីសម្ពោធនេះឱ្យបានកាន់តែឆាប់តាមដែល អាចធ្វើបាន៕(ប្រភពព័ត៌មាន: rasmeinews.com)
មតិពីមិត្តអ្នកអាន