សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានចាត់ទុកជារឿងអកុសលបំផុត ចំពោះការលើកពីបញ្ហា «កែវ សុខផេង មានម្តាយជាជនជាតិវៀតណាម នៅពេលកម្ពុជា ប្រកួតចាញ់វៀតណាម» ក្នុងព្រឹត្តិការណ៍កីឡា SEA Games 2019 លើកទី៣០ នៅប្រទេសហ្វីលីពីនកាលពីរាត្រីថ្ងៃសៅរ៍ ទី០៧ ខែធ្នូនៃវគ្គពាក់កណ្តាលផ្តាច់ព្រ័ត្រ។
សម្តេចតេជោ ហ៊ុន សែន ចាត់ទុកជារឿងអកុសលបំផុតចំពោះការលើកបញ្ហាកីឡាករ កែវ សុខផេង មានម្តាយជាជនជាតិវៀតណាម នៅពេលកម្ពុជាប្រកួតចាញ់វៀតណាម។
សម្តេចតេជោ ហ៊ុន សែន ចាត់ទុកអ្នករិះគន់លើកីឡាករបាល់ទាត់ជម្រើសជាតិ កែវ សុខផេង ថា ជាក្រុមប្រឆាំង និងលាបពណ៌ បន្ទាប់ពីមានការរិះគន់តាមបណ្ដាញហ្វេសប៊ុកទៅលើកីឡាកររូបនេះក្រោយក្រុមជម្រើសជាតិកម្ពុជាចាញ់ក្រុមវៀតណាម និងមីយ៉ាន់ម៉ាក្នុងការប្រកួតស៊ីហ្គេម។
កីឡាករ កែវ សុខផេង បានរងការរិះគន់បន្ទាប់ពីបរាជ័យក្នុងការទាត់បាល់ពិន័យ ១១ ម៉ែត្រក្នុងព្រឹត្តិការណ៍ប្រកួតស៊ីហ្គេមជាមួយវៀតណាម និងមីយ៉ាន់ម៉ាដោយភ្ជាប់កីឡាកររូបនេះទៅរឿងពូជសាសន៍ ដោយសារ សុខផេង ជាប់សាច់ឈាមវៀតណាម។
សម្តេចតេជោ ហ៊ុន សែន ថ្លែងក្នុងពិធីចែកសញ្ញាបត្រនៅកោះពេជ្រពីម្សិលមិញថា៖ «អារឿងលាបពណ៌ហ្នឹងគឺជាវប្បធម៌របស់ក្រុមប្រឆាំងផ្កាប់មុខនិយាយឲ្យច្បាស់អីចឹងតែម្ដងទៅ ហើយក្រុមនេះជាក្រុមចង្រៃបំផុតដែលនាំឲ្យប្រទេសលិចលង់នោះ។ ឲ្យតែចង់ [ចោទ] អ្នកណាដូចជាទម្លាក់សម្ដេចព្រះនរោត្តមសីហនុ ចោទសម្ដេចសីហនុថាចូលដៃជាមួយវៀតណាម វៀតកុង»។
សម្តេចតេជោ ហ៊ុន សែន បន្តថា៖ «ចង់ប្រឆាំងរដ្ឋាភិបាល ហ៊ុន សែន គឺចោទរដ្ឋាភិបាល ហ៊ុន សែន ថា លក់ដីឲ្យវៀតណាម កាត់ដីឲ្យវៀតណាម គឺវារឿងតែប៉ុណ្ណឹង វាអត់មានទៅណាឆ្ងាយទេ ហើយបើអីចឹងៗទៅនៅជាមួយគ្នាយ៉ាងម៉េច? វាមានតែមានឯង អត់អញ មានអញ អត់ឯង តែប៉ុណ្ណឹង។ នយោបាយទឹកឡើងត្រីស៊ីស្រមោច ទឹកហោចស្រមោចស៊ីត្រី មិនមែនជាគោលនយោបាយរបស់ខ្ញុំទេណា»។
សម្តេចតេជោ ហ៊ុន សែន បញ្ជាក់ថា នយោបាយបែបហិង្សានេះមានតាំងពីឆ្នាំ ២០០៣ គឺពេលនោះមានអ្នកនយោបាយលើកឡើងថា មានស៊ីអត់សែន មានសែន អត់ស៊ី។
សម្តេចតេជោ ហ៊ុន សែន ថាលោកធ្លាប់បានយកនយោបាយបែបហិង្សានេះប្រាប់ទៅមន្ត្រីការទូតអន្តរជាតិរួចហើយ។ ប៉ុន្តែពួកគេមិនបានថ្កោលទោសសារនយោបាយហិង្សារបស់ក្រុមប្រឆាំងទេ មានតែអ្នករាយការណ៍ពិសេសរបស់អង្គការសហប្រជាជាតិ លោកស្រី រ៉ូណា ស្ម៊ីត ទេបានចេញមុខព្រមាននូវសារនយោបាយបែបហិង្សានោះ។
សម្តេចតេជោ ហ៊ុន សែនបន្តថា៖ «សូម្បីតែប៉ុណ្ណឹងយើងឃើញក្រយៅមនុស្សវាយ៉ាងម៉េចហើយ តើជាតិរបស់យើងបានសុខទេ បើអានេះជាខ្ញុំអាមេរិក អានេះជាខ្ញុំចិន អានេះជាខ្ញុំវៀតណាម អានេះជាខ្ញុំបារាំង។ អ៊ីចឹងជាតិសាសន៍របស់យើងវាទៅជាស្អី...»។
លោក សុខ ទូច ប្រធានរាជបណ្ឌិត្យសភាកម្ពុជាបានថ្លែងថា ការលើកពីជាតិសាសន៍នេះ មិនត្រឹមត្រូវទេ ព្រោះប្រជាជនកម្ពុជាភាគច្រើនមិនមានអ្នកណាឈាមជ័រជាខ្មែរសុទ្ធទេ គឺមានកាត់ចិន កាត់វៀតណាម និងកាត់សាសន៍ដទៃទៀត៕
(សរុបដោយវិច្ឆិកា)
មតិពីមិត្តអ្នកអាន