ការថែទាំជីវភាពរស់នៅរបស់ប្រជាជននៅតំបន់ព្រំដែន និងជួយប្រជាជនរួចផុតពីភាពក្រីក្រគឺជាភារកិច្ចសំខាន់មួយរបស់កម្មាភិបាល យុទ្ធជននៃកងទ័ពការពារព្រំដែនវៀតណាម។ នៅក្នុងរយៈពេលជាច្រើនឆ្នាំកន្លងមក ប៉ុស្តិ៍ការពារព្រំដែនច្រកទ្វារព្រំដែន Loc Thinh (កងទ័ពការពារព្រំដែនខេត្ត Binh Phuoc) បានបំពេញល្អភារកិច្ចនេះ ចូលរួមចំណែកកសាងប្រព័ន្ធនយោបាយនៅមូលដ្ឋានឲ្យកាន់តែរឹងមាំ។
ប៉ុស្តិ៍ការពារព្រំដែនច្រកទ្វារព្រំដែន Loc Thinh ប្រគល់ជូនក្រុមគ្រួសារក្រីក្រនៅភូមិ Cha La
ក្នុងឱកាសរួមជាមួយលោកអនុសេនីយ៍ឯក Tran Van Nen ប្រធាននយោបាយ និងជាអនុប្រធានប៉ុស្តិ៍ការពារព្រំដែននៅច្រកទ្វារព្រំដែន Loc Thinh ទៅប្រគល់អង្ករជូនលោកស្រី Thi Ly ជនជាតិខ្មែរ ដែលជាក្រុមគ្រួសារក្រីក្រនៅភូមិ Cha La ឃុំ Loc Thinh ស្រុក Loc Ninh យើងខ្ញុំបានយល់ដឹងថែមទៀតនូវមនោសញ្ចេតនារវាងប្រជាជន និងកងទ័ពនៅតំបន់ព្រំដែន។ លោកអនុសេនីយ៍ឯក Tran Van Nen បានឲ្យដឹងថា ដើម្បីមានអង្ករសម្រាប់ជួយក្រុមគ្រួសារក្រីក្រនៅចុងខែ អង្គភាពត្រូវសំចៃអង្ករប្រហែល ២ ក្រាម នៃពេលបាយនីមួយៗ។ លោក Lam Liec លេខានៃគណៈកម្មាធិការបក្សភូមិ Cha La ថ្លែងថា អ្នកភូមិដឹងគុណកងទ័ពការពារព្រំដែនច្រើនណាស់។ គ្រួសារណានៅក្នុងភូមិនេះក៏ត្រូវបានកងទ័ពប្រគល់អង្ករ និងពូជគោ ដើម្បីរួចផុតពីភាពក្រីក្រ និងស្ថិរភាពសេដ្ឋកិច្ច។
ចំពោះលោក Lam Bung ជនជាតិខ្មែរ ជាក្រុមគ្រួសារក្រីក្រមួយនៅភូមិ Cha La ប៉ុស្តិ៍ការពារព្រំដែនច្រកទ្វារព្រំដែន Loc Thinh បានជួយកសាងផ្ទះ និងប្រគល់ពូជគោពីរក្បាល ហើយដល់បច្ចុប្បន្ននេះក្លាយជាហ្វូងគោមួយហើយ។ លោក Lam Bung បានចែករំលែកពីដំណើរការរួចផុតពីភាពក្រីក្រ និងការកសាងផ្ទះថ្មីរបស់គ្រួសារលោក ដែលឲ្យដឹងថា ក្រុមគ្រួសារលោកមានជីវភាពដូចសព្វថ្ងៃនេះគឺដោយសារទទួលបានការយកចិត្តទុកដាក់ និងជំនួយពីកម្មាភិបាល និងយុទ្ធជននៃប៉ុស្តិ៍ការពារព្រំដែនច្រកទ្វារព្រំដែន Loc Thinh។
ទន្ទឹមនឹងនោះ អង្គភាពក៏បានសហការជាមួយថ្នាក់ដឹកនាំតំបន់រៀបចំកម្មវិធីជួយប្រជាជនកាត់បន្ថយភាពក្រីក្រ លុបចោលផ្ទះទ្រុឌទ្រោម កសាងផ្ទះថ្មី ជំនះផលវិបាកដែលបណ្ដាលមកពីគ្រោះមហន្តរាយធម្មជាតិ អនុវត្តប្រកបដោយប្រសិទ្ធភាពនូវកម្មវិធីគោលដៅជាតិស្ដីពីការកសាងជនបទថ្មីនៅឃុំព្រំដែន ជួយប្រជាជនលើកកម្ពស់ការយល់ដឹង ការទទួលខុសត្រូវក្នុងការធានាបរិស្ថាន ការពារអធិបតេយ្យភាពទឹកដី និងសន្តិសុខនៅតំបន់ព្រំដែនជាតិ។ល៕
(យោងតាម កាសែតកងទ័ពប្រជាជន)
មតិពីមិត្តអ្នកអាន