យុគសម័យ - នាព្រឹកថ្ងៃទី ២៦ ខែមីនា នៅទីស្នាក់ការនៃសម្ព័ន្ធអង្គការមិត្តភាពវៀតណាម (VUFO), ប្រធាន VUFO លោកស្រី Nguyen Phuong Nga បានអញ្ជើញទទួលជួបសន្ទនាជាមួយគណៈប្រតិភូសមាគមមិត្តភាពកូរ៉េខាងជើង - វៀតណាម ដឹកនាំដោយលោកស្រី Ri Kang Juk - អនុប្រធានសមាគមមិត្តភាពកូរ៉េខាងជើង - វៀតណាម ដែលកំពុងបំពេញទស្សនកិច្ចនៅវៀតណាម។
ប្រធាន VUFO លោកស្រី Nguyen Phuong Nga អញ្ជើញថតរូបអនុស្សាវរីយ៍ជាមួយគណៈប្រតិភូកូរ៉េខាងជើង-វៀតណាម (រូបថតៈ Viet Nguyen)
ក្នុងជំនួបនេះ លោកស្រីប្រធាន Nguyen Phuong Nga បានស្វាគមន៍យ៉ាងកក់ក្តៅចំពោះដំណើរទស្សនកិច្ចនៅវៀតណាមរបស់គណៈប្រតិភូ ព្រមទាំងសង្កត់ធ្ងន់ថា ប្រទេសទាំងពីរវៀតណាមនិងកូរ៉េខាងជើងមានទំនាក់ទំនងមិត្តភាពជាប្រពៃណី ហើយទំនាក់ទំនងយ៉ាងល្អប្រសើរនេះត្រូវបានលោកប្រធានហូជីមិញនិងលោកប្រធាន Kim Il Sung កសាងឡើងនិងត្រូវបានឆ្លងកាត់ការឡើងចុះជាច្រើននៃប្រវត្តិសាស្ត្រ។
ទិដ្ឋភាពនៃជំនួប (រូបថតៈ Viet Nguyen)
លោកស្រីប្រធាន VUFO បានវាយតម្លៃខ្ពស់ ចំពោះសកម្មភាពរបស់សមាគមមិត្តភាពកូរ៉េ ខាងជើង - វៀតណាម នារយៈពេលជាច្រើនឆ្នាំកន្លងមក ដោយរួមចំណែកជំរុញទំនាក់ទំនងមិត្តភាពរវាងប្រទេសទាំងពីរឲ្យមានការអភិវឌ្ឍន៍កាន់តែប្រសើរ។ ក្នុងពេលជាមួយគ្នានេះ លោកស្រីមានបំណងចង់ឱ្យសមាគមបន្តសកម្មភាពដ៏សម្បូរបែបថែមទៀត។ លោកស្រីក៏ជឿជាក់ថា ទំនាក់ទំនងមិត្តភាពរវាងប្រទេសទាំងពីរនឹងត្រូវបានអភិវឌ្ឍយ៉ាងឆាប់រហ័ស ស្របតាមយុគសម័យថ្មី ដើម្បីជាផលប្រយោជន៍របស់ប្រជាជននៃប្រទេសទាំងពីរ ដើម្បីសន្តិភាពនិងស្ថេរភាពនៃតំបន់និងលើពិភពលោក។
ប្អូនកុមារមកពីសាលាមតេយ្យ Kieng San ដែលចូលរួមក្នុងពិធី (រូបថតៈ Viet Nguyen)
តាងនាមឱ្យគណៈប្រតិភូ អនុប្រធានសមាគមមិត្តភាពកូរ៉េខាងជើង - វៀតណាមលោកស្រី Ri Kang Juk បានថ្លែងអំណរគុណដល់ប្រធាន VUFO លោកស្រី Nguyen Phuong Nga ដែលបានចំណាយពេលវេលាសម្រាប់ទទួលគណៈប្រតិភូនិងថ្លែងអំណរគុណចំពោះការជួយឧបត្ថម្ភទាំងខាងសម្ភារៈនិងខាងស្មារតី ដែលប្រជាជនវៀតណាមបានធ្វើសម្រាប់ប្រជាជនកូរ៉េខាងជើងអស់រយៈពេលច្រើនឆ្នាំមកហើយ។ ជាពិសេសគឺការដែល នាពេលថ្មីៗនេះ វៀតណាមបានដើរតួជាអ្នកសម្របសម្រួលដើម្បីរៀបចំប្រកបដោយជោគជ័យនូវកិច្ចប្រជុំកំពូលរវាងសហរដ្ឋអាមេរិកនិងសាធារណរដ្ឋប្រជាធិបតេយ្យប្រជាមានិតកូរ៉េ រួមចំណែកយ៉ាងសកម្មដល់សន្តិភាពក្នុងតំបន់និងពិភពលោក។
ទិដ្ឋភាពនៃការសំណេះសំណាល់រវាងថ្នាក់ដឹកនាំភាគីទាំងពីរជាមួយប្អូនៗកុមារ (រូបថតៈ Viet Nguyen)
លោកស្រី Ri Kang Juk បានចែករំលែកថា ដំណើរទស្សនកិច្ចផ្លូវការរបស់លោកប្រធានកូរខាងជើង Kim Jong-un គឺបានធ្វើឡើងក្រោយរយៈពេល ៦០ ឆ្នាំ នៃដំណើរទស្សនកិច្ចលើកដំបូងមកកាន់ប្រទេសវៀតណាមរបស់លោកប្រធាន គីមអ៊ីលស៊ុង កាលពីឆ្នាំ១៩៥៨ ដែលបានកត់សម្គាល់ចំណុចសំខាន់មួយក្នុងប្រវត្តិសាស្រ្តនៃទំនាក់ទំនងរវាងបក្សទាំងពីរនិងរដ្ឋទាំងពីរ។ លោកស្រីបានអះអាងថា ដំណើរទស្សនកិច្ចនេះបានបង្ហាញថា ប្រទេសកូរ៉េខាងជើងជានិច្ចកាលយកចិត្តទុកដាក់យ៉ាងខ្លាំងក្លា ចំពោះការពង្រឹងទំនាក់ទំនងប្រពៃណីជាមួយវៀតណាម ហើយទំនាក់ទំនងនេះនឹងត្រូវបានពង្រឹងនិងពង្រីកជានិច្ច។
ប្រធាន VUFO លោកស្រី Nguyen Phuong Nga អញ្ជើញជូនអំណោយដល់លោកស្រី Ri Kang Juk (រូបថត: Viet Nguyen)
ក្នុងក្របខ័ណ្ឌនៃដំណើរទស្សនកិច្ចនៅវៀតណាមលើកនេះ គណៈប្រតិភូនៃសមាគមមិត្តភាពកូរ៉េខាងជើង - វៀតណាម បានទទួលជួបសន្ទនាជាមួយ ប្រធាន VUFO និងអនុប្រធានរដ្ឋ លោកស្រី Dang Thi Ngoc Thinh ។ គណៈប្រតិភូក៏បានចូលរួមសកម្មភាពមួយចំនួន សំដៅបង្កើនការយល់ដឹងនិងជំរុញចំណងមិត្តភាពរវាងប្រជាជននៃប្រទេសទាំងពីរក៏ដូចជាកម្មវិធីផ្លាស់ប្តូររវាងសាលាមត្តេយ្យវៀតណាម-កូរ៉េខាងជើង Kieng San ផងដែរ៕
（អត្ថបទនិងរូបថតៈ Viet Nguyen）
មតិពីមិត្តអ្នកអាន