យុគសម័យ - ទាំងនេះគឺជាពាក្យពេជ្រដែលចេញពីដួងចិត្តរបស់ជនបរទេសជាច្រើននាក់ នៅក្នុងប្រទេសវៀតណាម សម្រាប់ការជួយអស់ពីកម្លាំងកាយចិត្តរបស់គ្រូពេទ្យវៀតណាមទាំងមូល។
អ្នកជំងឺបានជាសេះស្បើយនិងអនុញាត្តិឲ្យចេញពីពេទ្យកាលពីព្រឹកថ្ងៃទី ៣០ ខែមីនា នៅមន្ទីរពេទ្យត្រូពិកមជ្ឈិម សាខាទី២ ។ (រូបថត៖ ទីភ្នាក់ងារសារព័ត៌មានវៀតណាម)
ក្នុងស្ថានភាពនៃការរីករាលដាលនៃ Covid-19 វិវឌ្ឍយ៉ាងស្មុគស្មាញ និងមិនអាចប៉ាន់ស្មានជាមុនបានទេ តែក្នុងស្មារតីនៃមនុស្សសាស្ត្រ កិច្ចសហប្រតិបត្តិការ និងការចែករំលែក រដ្ឋាភិបាលវៀតណាមបានដឹកនាំក្រសួង និងស្ថាប័នពាក់ព័ន្ធនានាឲ្យយកចិត្តទុកដាក់យ៉ាងខ្លាំងក្លា និងជួយគាំទ្រដល់ជនបរទេស នៅក្នុងប្រទេសវៀតណាមត្រូវបានធានានូវជីវភាពរស់នៅដ៏ធម្មតា និងមានសុវត្ថិភាព ត្រូវបានត្រួតពិនិត្យ ថែទាំសុខភាព និងការព្យាបាលយ៉ាងសកម្ម ក្នុងករណីចាំបាច់។ សកម្មភាពទាំងនេះរបស់រដ្ឋាភិបាល និងប្រជាជនវៀតណាមត្រូវបានប្រជាជនបរទេស និងសហគមន៍អន្តរជាតិវាយតម្លៃខ្ពស់។
“អរគុណណាស់វិស័យសុខាភិបាលវៀតណាម” - ទាំងនេះគឺជាពាក្យចេញពីដួងចិត្តរបស់ជនបរទេសជាច្រើនដែលឆ្លងជងឺ Covid-19 ឬត្រូវយកទៅដាក់ឲ្យនៅដាច់ដោយឡែកពីគេ នៅពេលមកដល់ប្រទេសវៀតណាម ហើយទទួលបានការយកចិត្តទុកដាក់យ៉ាងខ្លាំងពីគ្រូពេទ្យវៀតណាម។
លោកស្រី Shan (អាយុ ៦៧ ឆ្នាំ) - អ្នកជម្ងឺលេខ ២៤ មានក្តីសប្បាយរីករាយ ដែលជាអ្នកជម្ងឺម្នាក់ក្នុងចំណោមអ្នកជម្ងឺដែលត្រូវបានព្យាបាលឲ្យជាសេះស្បើយពីជំងឺ Covid-19 នៅមន្ទីរពេទ្យត្រូពិកមជ្ឈិម។
លោកស្រី Shan គឺជាអ្នកទេសចរអៀរឡង់ម្នាក់ មកប្រទេសវៀតណាមពីចក្រភពអង់គ្លេស តាមជើងហោះហើរ VN0054 នៅថ្ងៃទី ២ ខែមីនា។ លោកស្រីបានចែករំលែកថា “ ខ្ញុំជាគ្រូពេទ្យបានចូលនិវត្តន៍ម្នាក់ ខ្ញុំអាចស្លាប់ដោយជំងឺ Covid-19 តែគ្រូពេទ្យវៀតណាមបានជួយសង្គ្រោះខ្ញុំ។ ប្តីរបស់ខ្ញុំនៅតែមានសុខភាពខ្សោយហើយត្រូវការថែទាំពិសេស។ គ្រូពេទ្យកំពុងជួយគាត់ឱ្យប្រសើរឡើង។ ពួកគេខិតខំធ្វើការមិនចេះនឿហត់ ដើម្បីជួយសង្គ្រោះជិវិតមនុស្ស” ។
នៅលើបណ្តាញសង្គមនានាក៏ពោរពេញទៅដោយសំបុត្រ ឬពាក្យថ្លែងអំណរគុណពីជនបរទេសជូនដល់បុគ្គលិក ពេទ្យវៀតណាមដែរ។
“ខ្ញុំជាមនុស្សម្នាក់ដែលជិះយន្តហោះ VN54 នៅថ្ងៃទី ២ ខែមីនា និងស្នាក់នៅតំបន់ដាក់ឲ្យនៅដាច់ដោយឡែកពីគេ នៃមន្ទីរពេទ្យត្រូពិកមជ្ឈិម សាខា Kim Chung ចាប់ពីថ្ងៃទី ៧ ខែមីនា ។ ខ្ញុំសូមថ្លែងអំណរគុណយ៉ាងជ្រាលជ្រៅ ចំពោះគ្រូពេទ្យ និងគិលានុបដ្ឋាយិកា ដោយការខិតខំប្រឹងប្រែងអស់ពីកម្លាំងកាយចិត្តរបស់ពួកគេ នាពេលកន្លងមក” ។ នេះគឺជាសំបុត្រមួយផ្ញើទៅកាន់មន្ទីរពេទ្យត្រូពិករបស់អ្នកវិទ្យាសាស្ត្រអង់គ្លេសម្នាក់។
នៅលើបណ្តាញសង្គម ចុងភៅម្នាក់នៃប្រទេសនូវែលសេឡង់ លោក Bobby Chin ក៏បានចែករំលែកថា៖ “ ខ្ញុំសូមឱនក្បាល ដោយគោរពចំពោះគ្រូពេទ្យវៀតណាម ដែលធ្វើការនៅកន្លែងដាក់ឲ្យនៅដាច់ដោយឡែកពីគេដែលឪពុកខ្ញុំត្រូវបានថែទាំនៅទីនោះ។ នេះពិតជាការលះបង់ដ៏ថ្លៃថ្នូរ”។
ឯកអគ្គរដ្ឋទូតអង់គ្លេសប្រចាំនៅវៀតណាម លោក Gareth Ward។
ឯកអគ្គរដ្ឋទូតអង់គ្លេសប្រចាំនៅវៀតណាម លោក Gareth Ward បានឲ្យដឹងថា ក្នុងរយៈពេលប៉ុន្មានថ្ងៃកន្លងមកនេះ អ្នកទេសចរអង់គ្លេសជាច្រើនដែលឆ្លង Covid-19 ត្រូវបានទទួលការយកចិត្តទុកដាក់និងព្យាបាលពីគ្រូពេទ្យវៀតណាម។ ឯកអគ្គរដ្ឋទូតអង់គ្លេសប្រចាំនៅវៀតណាម លោក Gareth Ward បានថ្លែងអំណរគុណចំពោះការខិតខំប្រឹងប្រែងដែលក្រុមគ្រូពេទ្យ និងស្ថាប័ននានានៃរដ្ឋាភិបាលវៀតណាម ដោយបានខិតខំប្រឹងប្រែងអស់ពីកម្លាំងកាយចិត្តធ្វើការ ដើម្បីព្យាបាលដល់ពលរដ្ឋអង់គ្លេស។
លោកឯកអគ្គរដ្ឋទូតបានមានប្រសាសន៍ថា “ភ្ញៀវទេសចរអង់គ្លេសជាច្រើនបានសម្តែងការដឹងគុណចំពោះប្រទេសវៀតណាម។ លោកឯកអគ្គរដ្ឋទូត Gareth Ward និងស្ថានទូតអង់គ្លេសប្រចាំនៅវៀតណាម ក៏បានណែនាំអំពីច្បាប់និងទំនៀមទម្លាប់មួយចំនួនរបស់វៀតណាមដល់ពលរដ្ឋអង់គ្លេស ដើម្បីជនជាតិអង់គ្លាសអាចជៀសវាងការផាកពិន័យ។ យើងមានសំណាងណាស់ដែលបានរស់នៅ និងធ្វើការនៅទីនេះ កុំគិតថាយើងនឹងទទួលបានការព្យាបាលពិសេស បើប្រៀងធៀបនឹងអ្នកស្រុក ។ យើងត្រូវគោរពច្បាប់ និងបទដ្ឋានវប្បធម៌របស់វៀតណាម ហើយបង្ហាញថា អ្នកកំពុងរួមដៃក្នុងការទប់ស្កាត់ការរីករាលដាលនៃជំងឺរាតត្បាតនេះដែរ”។
នៅក្នុង video ដែលបានបង្ហោះនៅលើទំព័រហ្វេសប៊ុក របស់ អគ្គកុងស៊ុលអាមេរិកប្រចាំនៅទីក្រុង Ho Chi Minh ឯកអគ្គរដ្ឋទូតសហរដ្ឋអាមេរិក ប្រចាំនៅប្រទេសវៀតណាម លោក Daniel J. Kritenbrink ក៏បានថ្លែងអំណរគុណចំពោះកម្លាំងទាំងឡាយរបស់វៀតណាមដែលកំពុងប្រយុទ្ធប្រឆាំងនឹងជំងឺការរាតត្បាតនេះដោយផ្ទាល់។
ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសវៀតណាមលោក Daniel J. Kritenbrink ។
បើយោងតាមឯកអគ្គរដ្ឋទូតសហរដ្ឋអាមេរិកប្រចាំនៅប្រទេសវៀតណាម លោក Daniel J. Kritenbrink ឲ្យដឹងថា ជំងឺរាតត្បាត Covid-19 កំពុងជះឥទ្ធិពលអវិជ្ជមានដល់ប្រជាជនរាប់លាននាក់ ដល់សេដ្ឋកិច្ចនិងសង្គមនៅគ្រប់ទីកន្លែង ក្នុងនោះមានប្រទេសវៀតណាម។ លោកក៏បានវាយតំលៃខ្ពស់ចំពោះ រដ្ឋាភិបាលវៀតណាមដោយបានចាត់វិធានការណ៍ដ៏មានប្រសិទ្ធភាពនិងរឹងមាំ ក្នុងការប្រយុទ្ធប្រឆាំងនឹងជំងឺរាតត្បាត Covid-19 ហើយបានបន្តភាពម្ចាស់ការ កិច្ចសហប្រតិបត្តិការ និងតម្លាភាពក្នុងការប្រយុទ្ធប្រឆាំងនឹងជំងឺរាតត្បាតនេះ។
លោកឯកអគ្គរដ្ឋទូតក៏បានបញ្ជាក់ផងដែរថា បុគ្គលិកទាំងអស់នៃស្ថានបេសកកម្មការទូតអាមេរិកប្រចាំនៅប្រទេសវៀតណាម កំពុងធ្វើការនៅផ្ទះ តាមការណែនាំរបស់រដ្ឋាភិបាលវៀតណាម ក៏ដូចជាមជ្ឈមណ្ឌលគ្រប់គ្រងនិងបង្ការជំងឺឆ្លង (CDC) នៃសហរដ្ឋអាមេរិក ។ លោកឯកអគ្គរដ្ឋទូតសហរដ្ឋអាមេរិកបានសង្កត់ធ្ងន់លើថា៖
“ខ្ញុំដឹងថា យើងស្ថិតក្នុងគ្រាលំបាក។ ក្នុងនាមជាដៃគូសំខាន់ វៀតណាម និងអាមេរិកនឹងរួមគ្នា ឆ្លងកាត់គ្រាលំបាកនេះ។ ខ្ញុំសង្ឃឹមថា អ្នកនិងក្រុមគ្រួសាររបស់អ្នកនឹងមានសុខភាពល្អ និងសុខសន្តិភាព។ បណ្តាដៃគូតែងតែកៀកស្មានឹងគ្នា ហើយអាមេរិកតែងតែកៀកស្មានឹងវៀតណាម ក្នុងសមរភូមិនេះ។ សូមអរគុណ! ”(បកប្រែដោយឌីណា)
មតិពីមិត្តអ្នកអាន