នៅទីស្តីការក្រសួងបរិស្ថានកម្ពុជា កាលពីព្រឹកថ្ងៃទី៣០ ខែឧសភា ឆ្នាំ២០១៩ លោក David Kaatrud នាយកម្មវិធីស្បៀងអាហារពិភពលោក ប្រចាំតំបន់អាស៊ី និង ប៉ាស៊ីហ្វិក បានបញ្ជាក់ការគាំទ្រគំនិតផ្តួចផ្តើមបង្កើតប្រព័ន្ធសុវត្ថិភាពស្បៀងអាហារ។ការលើកឡើងនេះក្នុងឱកាសដែលលោកបានជួបពិភាក្សាការងារជាមួយលោក សាយ សំអាល់ រដ្ឋមន្ត្រីក្រសួងបរិស្ថាន។
អង្គការសហប្រជាជាតិគាំទ្រគំនិតផ្តួចផ្តើមគម្រោងប្រព័ន្ធសុវត្ថិភាពស្បៀងអាហារ
លោក DavidKaatrud បានឱ្យដឹងទៀតថាគម្រោងកម្មវិធីយុទ្ធសាស្ត្រនៃអង្គការWFPធ្វើការជាមួយរាជរដ្ឋាភិបាលកម្ពុជាបន្តទៀតសម្រាប់រយៈពេល៥ឆ្នាំទៅមុខ(២០១៩_២០២៣)ដើម្បីបង្កើនសមត្ថភាពរបស់ខ្លួនក្នុងការផ្តល់សេវាសង្គមនិងពង្រឹងប្រព័ន្ធចំណីអាហារនៅថ្នាក់ក្រោមជាតិក្នុងការកាត់បន្ថយហានិភ័យ នៃសន្តិសុខស្បៀង។
លោក David Kaatrud បានបង្ហាញការគាំទ្រចំពោះផែនការក្រសួងបរិស្ថាន ដែលលើកទឹកចិត្តឱយប្រជាពលរដ្ឋខិតខំបង្កបង្កើនផល ជាពិសេសការដាំដុះបន្លែបបង្ការ នៅជុំវិញផ្ទះតាមសហគមន៍ ដើម្បីផ្គត់ផ្គង់ស្បៀងដល់គ្រួសារគ្រប់គ្រាន់ កាត់បន្ថយចំណាយ និងផលិតផលមានសុវត្ថិភាពសម្រាប់សុខភាពល្អ។
ក្នុងឱកាសនោះ លោកសាយ សំអាល់ មានប្រសាសន៍ថា ប្រទេសកម្ពុជា មានសុខសន្តិភាព ស្ថេរភាពនយោបាយនិងការរីកចម្រើននៃការទទួលព័ត៌មានហើយសម្រេចបានកំណើនសេដ្ឋកិច្ចប្រកបដោយចីរភាព ក្នុងរយៈពេល ២ ទសវត្សរ៍កន្លងមកនេះ។
លោកបន្តថាសន្ដិសុខស្បៀងនិងអាហារូបត្ថម្ភ ប្រឈមនឹងវិប្បត្ដិបរិស្ថានម្ហូបអាហារដែលផ្លាស់ប្តូរយ៉ាងឆាប់រហ័សនិងសុវត្ថិភាពនៅក្នុងប្រព័ន្ធចំណីអាហារ ដែលបង្កប៉ះពាល់ដល់សុខភាពរបស់ប្រជាពលរដ្ឋផងដែរ។
សុវត្ថិភាពនៃប្រព័ន្ធស្បៀងអាហារលើកទឹកចិត្តឱ្យកសិករផលិតស្បៀងសរីរាង្គចូលរួមកាត់បន្ថយចំណាយនិងកាត់បន្ថយការបរិភោគអាហារមិនមានសុវត្ថិភាព ដូចជាបង្កើនទម្លាប់ដាំដំណាំផ្សេងៗនៅក្បែរផ្ទះ ចិញ្ចឹមសត្វជាដើម។
ជាមួយគ្នានេះលោករដ្ឋមន្ត្រីក្រសួងបរិស្ថាន បានស្នើឱ្យមានកិច្ចសហប្រតិបត្តិការ លើការផ្សព្វផ្សាយ និងបណ្តុះបណ្តាលប្រជាពលរដ្ឋនៅតាមសហគមន៍ នូវបច្ចេកទេស និងការដាំដុះដំណាំ ធានាសុវត្ថិភាពស្បៀង និងប្រកបសុវត្ថិភាព។
សូមបញ្ជាក់ថា អង្គការកម្មវិធីស្បៀងអាហារពិភពលោក World Food Programme (WFP) សហការជាមួយក្រសួងបរិស្ថាននិងរៀបចំកិច្ចពិភាក្សាជាមួយដៃគូអភិវឌ្ឍន៍ និងភាគីពាក់ព័ន្ធដើម្បីប្រមូលធាតុចូលថែមទៀតសម្រាប់ការបង្កើតគម្រោងប្រព័ន្ធសុវត្ថិភាពស្បៀងអាហារ។
ក្នុងនោះចំណុចអាទិភាពជំរុញឲ្យសហគមន៍ដែលងាយរងគ្រោះដោយការប្រែប្រួលអាកាសធាតុ នៅក្នុងប្រទេសកម្ពុជា អាចទិញ ឬទទួលបានអាហារដែលមានសុវត្ថិភាពចម្រុះ មានតម្លៃសមរម្យ៕
(ប្រភព៖ rasmeinews.com សរុបព័ត៌មានដោយសមុទ្រ)
មតិពីមិត្តអ្នកអាន