Trending now

វៀតណាមសម្រេចផ្តល់ថាមពលអគ្គិសនីបន្ថែមពី២០០-២៥០មេហ្គាវ៉ាត់ ខណៈ៥០មេហ្គាវ៉ាត់នឹងបញ្ជូនមកដល់កម្ពុជា

13:01 | 14/04/2019 (ប្រភព៖ Fresh News)

នៅក្នុងឱកាសចូលឆ្នាំប្រពៃណីជាតិខ្មែរនេះ នាយករដ្ឋមន្រ្តីវៀតណាមលោក Nguyen Xuan Phuc បានសម្រេចផ្តល់បន្ថែមនូវថាមពលអគ្គិសនីចំនួនពី២០០ ទៅ ២៥០មេហ្គាវ៉ាត់ ដល់កម្ពុជាដែលកំពុងខ្វះខាត ខណៈការបន្ថែម៥០មេហ្គាវ៉ាត់ នឹងបញ្ជូនមកដល់កម្ពុជានៅថ្ងៃនេះតែម្តង ដើម្បីឲ្យបងប្អូនប្រជាពលរដ្ឋកម្ពុជា ប្រើប្រាស់ក្នុងឱកាសបុណ្យចូលឆ្នាំប្រពៃណីជាតិខ្មែរ។ នេះបើតាមប្រសាសន៍របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ថ្លែងនៅក្នុងកិច្ចសម្ភាសន៍ជាមួយលោក លឹម ជាវុត្ថា នាយកប្រតិបត្តិអង្គភាពព័ត៌មាន Fresh News នាព្រឹកថ្ងៃទី១៣ ខែមេសា ឆ្នាំ២០១៩។

សម្តេចប្រមុខរាជរដ្ឋាភិបាលកម្ពុជា បានមានប្រសាសន៍ឲ្យដឹងថា នៅព្រឹកថ្ងៃទី១៣ ខែមេសា ឆ្នាំ២០១៩នេះ នាយករដ្ឋមន្រ្តីវៀតណាមបានទូរស័ព្ទមកដោយថ្លែងផ្ញើសារថ្វាយ ពរចំពោះព្រះមហាក្សត្រ ប្រធានព្រឹទ្ធសភា ប្រធានរដ្ឋសភា រាជរដ្ឋាភិបាល និងប្រជាជនកម្ពុជាទាំងអស់ នៅក្នុងឱកាសចូលឆ្នាំប្រពៃណីជាតិខ្មែរនេះ។ សម្តេចតេជោបានបន្ថែមថា ក្រៅពីថ្លែងសារជូនពរនាយករដ្ឋមន្រ្តីវៀតណាម ក៏បានពិភាក្សាជាពិសេសលើទំនាក់ទំនងកិច្ចសហប្រតិបត្តិការ និងអំពីទំហំពាណិជ្ជកម្មរវាងប្រទេសទាំងពីរ ដើម្បីបង្កើនការ វិនិយោគទុនបន្ថែមទៀត ហើយជាពិសេសបំផុតនោះគឺវៀតណាមបានសម្រេចផ្តល់ថាមពលអគ្គិសនីបន្ថែមដល់កម្ពុជាពី២០០ ទៅ ២៥០មេហ្គាវ៉ាត់។

ការសម្រេចផ្តល់ភ្លាមៗរបស់វៀតណាមនេះជាដំណឹងដ៏ល្អ និងក្តីរីករាយសម្រាប់ប្រជាជនកម្ពុជា ដែលកំពុងទទួលរងនូវការខ្វះខាតចរន្តអគ្គិសនីប្រើប្រាស់នៅតាមគេហដ្ឋាន នៅក្នុងឱកាសចូលឆ្នាំប្រពៃណីជាតិ។

ការសម្រេចផ្តល់បន្ថែមថាមពលអគ្គិសនីពីរដ្ឋាភិបាលវៀតណាមចំនួន៥០មេហ្គាវ៉ាត់ ធ្វើឡើងតាមសំណើរបស់សម្តេចតេ ជោ ហ៊ុន សែន តាមរយៈសារលិខិតកាលពីចុងខែមិនា ឆ្នាំ២០១៩ កន្លងទៅ។

បច្ចុប្បន្នកម្ពុជា បាននឹងកំពុងខ្វះខាតថាមពលអគ្គិសនីប្រមាណ៤០០មេហ្គាវ៉ាត់ នៅក្នុងរដូវប្រាំងដោយសារបញ្ហាខ្វះ ខាតទឹក ប៉ុន្តែតាមការឲ្យដឹងពីអគ្គិសនីកម្ពុជា បញ្ហានេះនឹងត្រឡប់មករកភាពប្រក្រតីវិញ នៅចុងខែឧសភាខាងមុខ។

សម្តេចតេជោ ហ៊ុន សែន បានថ្លែងអំណរគុណចំពោះនាយករដ្ឋមន្ត្រីវៀតណាម សម្រាប់ការជូនពរ និងជាពិសេសសម្រាប់ការផ្តល់បន្ថែមនូវអគ្គិសនី៥០មេហ្គាវ៉ាត់បន្ថែមលើចំនួន ២០០មេហ្គាវ៉ាត់ ដែលបាននិងកំពុងផ្គត់ផ្គង់កន្លងមកដែលសម្តេចតេជោបានសង្កត់ធ្ងន់ថា វៀតណាមតែងជួយដល់កម្ពុជាគ្រប់ពេលដែលកម្ពុជាជួបការលំបាក៕

(ប្រភព៖ Fresh News)

(ប្រភព៖ Fresh News)

ព័ត៌មានថ្មីៗ

យោធភូមិភាគទី៩ (កងទ័បប្រជាជនវៀតណាម) ស្វែងរក និងប្រមូលអដ្ឋិធាតុនៃយុទ្ធជនពលីបានចំនួន ៣,៨៤២ អដ្ឋិធាតុ
ប្រធានរដ្ឋសភាវៀតណាមលោក Vuong Dinh Hue ​ អញ្ជើញអបអរសាទរឧត្ដមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា
សហគមន៍វៀតណាមនៅឥណ្ឌារួបរួមគ្នាឆ្ពោះទៅមាតុភូមិ
៧០ ឆ្នាំនៃជ័យជំនះ Dien Bien Phu៖ ការផ្លាស់ប្តូរប្រវត្តិសាស្រ្ត និងការចងចាំនៅប្រទេសបារាំង
មហោស្រពផ្លូវវប្បធម៌កូរ៉េឆ្នាំ ២០២៤៖ ដើរជុំវិញប្រទេសកូរ៉េនៅកណ្តាលទីក្រុងហាណូយ