ងាកមកស្គាល់តំបន់ទេសចរណ៍ធម្មជាតិដែលស្ថិតនៅជាប់ព្រំដែនកម្ពុជាឡាវនៅតែបង្ហាញសម្រស់ទាក់ទាញដល់អ្នកទេសចរក្នុងដំណើរកម្សាន្ត។អ្នកទេសចរបើបានទៅដល់ទីនោះតែងតែលាន់មាត់ថាគឺជាឋានសួគ៌មួយនៅប៉ែកឦសានប្រទេសកម្ពុជា។
ទឹកធ្លាក់ព្រះនិម្មិតនៅតែទាក់ទាញភ្ញៀវទេសចរក្នុងដំណើរកម្សាន្តមកកាន់ប៉ែកឦសានប្រទេស
ជួបជាមួយអ្នកលក់ដូរនៅទីនោះបានប្រាប់ឱ្យដឹងថាភ្ញៀវទេសចរតែងតែទៅកម្សាន្តនៅទឹកធ្លាក់ព្រះនិម្មិតជារៀងរាល់ថ្ងៃ។តែបើថ្ងៃបុណ្យជាតិឈប់សម្រាកភ្ញៀវទេសចរសម្រុកទៅកាន់តែច្រើន។ទឹកធ្លាក់ព្រះនិម្មិតស្ថិតក្នុងឃុំកំពង់ស្រឡៅ២ស្រុកឆែបខេត្តព្រះវិហារ។ដោយម្ខាងទៀតគឺជាទឹកដីព្រំដែនប្រទេសឡាវ។មួយទៀតជាប់ឃុំព្រះរំកិលស្រុកបុរីអូរស្វាយសែនជ័យរបស់ខេត្តស្ទឹងត្រែង។
ភ្ញៀវទេសចរតែងយល់ច្រឡំថាទឹកធ្លាក់ព្រះនិម្មិតស្តិតនៅខេត្តស្ទឹងត្រែង។តាមពិតគ្រាន់តែជាប់ព្រំប្រទល់ខេត្តស្ទឹងត្រែងតែប៉ុណ្ណោះ។តំបន់ទឹកធ្លាក់មួយនេះនៅកៀកនឹងព្រំដែនកម្ពុជាឡាវខណ្ឌចែកដោយទន្លេនិងជាតំបន់មួយដែលឆ្ងាយពីទីរួមខេត្តព្រះវិហារ។បើយើងធ្វើដំណើរពីក្រុងស្ទឹងត្រែងឆ្លងកាត់ស្ពានមេគង្គឆ្ពោះទៅតាមផ្លូវជាតិលេខ៩ស្រុកថាឡាបរិវ៉ាត់។
រួចបន្តតាមផ្លូវបត់ស្ដាំក្រាលគ្រួសក្រហមឃុំសំអាងស្រុកថាឡាបរិវ៉ាត់ឆ្ពោះទៅឃុំព្រះរំកិលស្រុកបុរីអូរស្វាយសែនជ័យ។នោះនឹងបន្តតាមផ្លូវកៅស៊ូនឹងទៅដល់តំបន់ទេសចរណ៍ធម្មជាតិទឹកធ្លាក់ព្រះនិម្មិតជាមួយសម្រស់ធម្មជាតិតាមដងផ្លូវការរស់នៅរបស់ប្រជាពលរដ្ឋស្រុកស្រែចម្ការ។តំបន់នោះស្ថិតនៅមិនឆ្ងាយប៉ុន្មានពីខេត្តស្ទឹងត្រែងឡើយ។
ហេតុនេះហើយបានជាអ្នកទេសចរតែងតែយល់ច្រឡំថាតំបន់ទឹកធ្លាក់ព្រះនិមិតស្ថិតនៅក្នុងទឹកដីខេត្តស្ទឹងត្រែង។យើងគ្រាន់តែធ្វើដំណើរពីខេត្តស្ទឹងត្រែងប្រមាណជិត១០០គីឡូម៉ែត្រនឹងទៅដល់តំបន់ទឹកធ្លាក់។ទឹកធ្លាក់ព្រះនិម្មិតគឺជាទឹកជ្រោះធម្មជាតិធ្លាក់ឮទាំងថ្មចូលជ្រោះយ៉ាងជ្រៅជម្រៅជាង១០ម៉ែត្រដ៏ស្រស់ស្អាតទាក់ទាញសម្រាប់អ្នកថតរូបទុកជាអនុស្សាវរីយ៍។
នៅទីនោះយើងអាចភ្លក់ម្ហូបអាហារដែលប្រជាពលរដ្ឋលក់តាមបែបខ្មែរឡាវនិងស្ដាប់ការនិយាយរដឺនបែបខ្មែរកាត់ឡាវ។ដោយសារមានការអភិវឌ្ឍផ្លូវទៅកាន់តំបន់នោះ។ទើបអ្នកទេសចរស្គាល់កាន់តែច្រើនឡើងហើយមានអ្នកលក់ដូរព្រោងព្រាតនឹងមានក្រុមហ៊ុនឯកជនកំពុងតែសាងសង់រៀបចំតំបន់ទាក់ទាញនៅទីនោះ៕
（ប្រភពព័ត៌មាន: rasmeinews）
មតិពីមិត្តអ្នកអាន