នៅពេលដែលប្រទេសកម្ពុជាត្រូវបានជ្រើសរើសជាលើកទី ១ ក្នុងការធ្វើជាម្ចាស់ផ្ទះរៀបចំព្រឹត្តិការណ៍ស៊ីហ្គេមលើកទី ៣២ ក្នុងឆ្នាំ ២០២៣ ប្រទេសនេះបានពង្រីកនិងផ្សព្វផ្សាយមុខមាត់ប្រទេសជាតិ ដែលនឹងប្រារព្ធពិធីបុណ្យនេះរាប់ថយក្រោយ ១០០០ ថ្ងៃ តាំងពីដើមនៃការប្រប្រព្រឹត្តទៅព្រឹត្តិការណ៍នេះ។
១០០០ ថ្ងៃមុនព្រឹត្តិការណ៍ស៊ីហ្គេមលើកទី ៣២ កម្ពុជាមានការផ្សព្វផ្សាយយ៉ាងខ្លាំងក្លា
តាមការគ្រោងទុក ប្រទេសកម្ពុជានឹងធ្វើជាម្ចាស់ផ្ទះនៃព្រឹត្តិការណ៍កីឡាស៊ីហ្គេមលើកទី ៣២ ឆ្នាំ ២០២៣ បន្ទាប់ពីទទួលបានសិទ្ធិធ្វើជាម្ចាស់ផ្ទះពីសមាគមកីឡាអាស៊ីអាគ្នេយ៍ហើយនឹងទទួលទង់កីឡាតំណាងជាផ្លូវការនៅក្នុងពិធីបិទការប្រកួតកីឡាស៊ីហ្គេមលើកទី ៣១ ដែលនឹងប្រព្រឹត្តិទៅនាខែវិច្ឆិកាឆ្នាំក្រោយពីប្រទេសវៀតណាម។ ភ្លាមៗនោះរាជរដ្ឋាភិបាលកម្ពុជា បានចាត់វិធានការនានាដើម្បីត្រៀមរៀបចំព្រឹត្តិការណ៍កីឡាមនេះក្នុងតំបន់ដ៏អស្ចារ្យនេះ ដែលគ្រោងនឹងប្រព្រឹត្តទៅចាប់ពីថ្ងៃទី ១០ ដល់ថ្ងៃទី ២១ ខែឧសភាឆ្នាំ ២៣២៣ នៅឯមជ្ឈមណ្ឌលកីឡាជាតិមរតកតេជោ។
ឯកឧត្តមបណ្ឌិត ថោង ខុន អនុប្រធានអចិន្រ្តៃយ៍ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ ហៅកាត់ គ.ជ.ប.អ (CAMSOC)បានដឹកនាំកិច្ចប្រជុំគណៈអចិន្ត្រៃយ៍ ដោយបន្តពិភាក្សាលើរបៀបវារៈសំខាន់ៗមួយចំនួនទៀត លើការពិនិត្យរបាយការណ៍ ផែនការសកម្មភាពរបស់គណៈកម្មការវប្បធម៌ បរិស្ថាន និងអប់រំកីឡា កាលពីថ្ងៃទី០៨ ខែកញ្ញា ឆ្នាំ២០២០ ដើម្បីបន្តសម្រួចគោលដៅឱ្យទទួលបានជោគជ័យ នៅក្នុងឋានៈជាម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣។
ឯកឧត្តមបណ្ឌិត ថោង ខុន មានប្រសាសន៍ថា «កម្ពុជាយើងមិនអាចដណ្តើមបានចំណាត់ថ្នាក់មេដាយស៊ីហ្គេម ២០២៣ បានលេខ១ លេខ២ លេខ៣ ឬលេខ៤ទេ ប៉ុន្តែយើងកំពុងខិតខំយ៉ាងខ្លាំង ដើម្បីប្រជែងឱ្យបានត្រឹមលេខ៥ ឬលេខ៦ ដោយក្នុងឯកឧត្តមបណ្ឌិតស្នើឲ្យគណៈកម្មការជំនាញ CAMSOC ផ្សព្វផ្សាយជូនដល់ប្រជាពលរដ្ឋខ្មែរទូទាំងប្រទេស ដើម្បីឱ្យទទួលជ្រាបនិងផ្តល់ការគាំទ្រដល់ស៊ីហ្គេម លើកទី៣២ ឆ្នាំ២០២៣»។ ឯកឧត្តមអនុប្រធានអចិន្រ្តៃយ៍បានលើកឡើងទៀតថា រឿងប្រជែងមេដាយជាបញ្ហាសំខាន់មួយ ប៉ុន្តែអ្វីដែលកាន់តែសំខាន់នោះ គឺយើងត្រូវរួមគ្នា ធ្វើឱ្យកម្ពុជាស្អាត តាមរយៈការអប់រំផ្សព្វផ្សាយលើកិច្ចការបដិសណ្ឋារកិច្ចល្អ បរិស្ថានល្អ អនាម័យស្អាត បញ្ហាគ្រោះថ្នាក់ចរាចរណ៍ បញ្ហាគ្រឿងញៀនត្រូវបានកាត់បន្ថយ ដើម្បីជំរុញឱ្យមានការប្រែប្រួលមួយថ្មី ក្នុងដំណើរឆ្ពោះទៅទទួលធ្វើម្ចាស់ផ្ទះ ស៊ីហ្គេម ឆ្នាំ២០២៣។ ឯកឧត្ដមបានបន្ដថា សម្រាប់ប្រព័ន្ធផ្សព្វផ្សាយ ដែលជាដៃគូសំខាន់ គឺទូរទស្សន៍ជាតិកម្ពុជា និងបណ្តាដៃគូផ្សព្វផ្សាយឯកជនដទៃៗទៀត ដើម្បីជំរុញផែនការផ្សព្វផ្សាយ និងព័ត៌មានបញ្ជ្រាបជូនដល់ប្រជាពលរដ្ឋទូទាំងប្រទេសឲ្យមានការចូលរួមអំពីតួនាទីភារកិច្ចរបស់ពលរដ្ឋគ្រប់រូប ក្នុងឋានៈជាម្ចាស់ផ្ទះ ស៊ីហ្គេម ទាំងមុនពេលស៊ីហ្គេម ក្នុងពេលស៊ីហ្គេម និងក្រោយពេលស៊ីហ្គេម ឆ្នាំ២០២៣។
១០០០ ថ្ងៃមុនព្រឹត្តិការណ៍ស៊ីហ្គេមលើកទី ៣២ កម្ពុជាមានការផ្សព្វផ្សាយយ៉ាងខ្លាំងក្លា
ឯកឧត្តម វ៉ាត់ ចំរើន អគ្គលេខាធិការ CAMSOC បានថ្លែងក្រោយបញ្ចប់កិច្ចប្រជុំថា ក្រោមការចង្អុលបង្ហាញពីសម្តេចពិជ័យសេនា ទៀ បាញ់ ប្រធាន CAMSOC និងឯកឧត្តមបណ្ឌិត ថោង ខុន អនុប្រធានអចិន្ត្រៃយ៍តែងតែយកចិត្ត ទុកដាក់ខ្ពស់ឱ្យគណៈកម្មការជំនាញរបស់ខ្លួនចំនួន១៤ធ្វើការងារទៅតាមប្រក្រតីទិនការងារឱ្យបានរលូន ដើម្បីឱ្យទទួលបាននូវវឌ្ឍនភាពការងារពីមួយសប្តាហ៍ទៅមួយសប្តាហ៍ ហើយការត្រួតពិនិត្យតាមដាន វាយតម្លៃជាប្រចំានេះ កំពុងជំរុញឱ្យកិច្ចការនានាមានសកម្មភាពយ៉ាងមមាញឹក។ ឯកឧត្តមអគ្គលេខាធិការលើកឡើងនូវបន្ថែមនូវរបៀបវារៈសំខាន់ៗចំនួន៣ ដូចជារបៀបវារៈទី១ ការ ប្រកាសស្តីពីការប្រើប្រាស់ស្លាកសញ្ញា-និមិត្តសញ្ញា (Logo-Mascot) ឱ្យខាងជំនាញយកទៅប្រើប្រាស់ផ្សព្វផ្សាយឱ្យបានច្បាស់លាស់ចៀសវាងការប្រើប្រាស់បន្លំ ឬក្លែងទម្រង់ទ្រព្សសម្បត្តិរបស់ ស៊ីហ្គេម ឆ្នាំ២០២៣របស់យើង។ របៀបវារៈទី២-ការពិភាក្សាលើគណៈកម្មការវប្បធម៌ បរិស្ថាន និងអប់រំកីឡា ដែលត្រៀមបើកយុទ្ធនាការអប់រំផ្សព្វផ្សាយ លើប្រធានបទចំនួនពីរ គឺប្រជាជនម្នាក់លេខកីឡាមួយមុខ ក្នុងមួយជីវិត និងប្រធានបទទីពីរ គឺកម្ពុជាស្អាត-បដិសណ្ឋារកិច្ចល្អ រួមទាំងការអប់រំកាត់បន្ថយនូវភាពអសកម្មក្នុងសង្គមដូចជាកាត់បន្ថយគ្រោះថ្នាក់ ចរាចរណ៍ និងកាត់បន្ថយគ្រឿងញៀនជាដើម។ ចំណុចនេះ ឯកឧត្តមបណ្ឌិត ថោង ខុន បានផ្តល់អនុសាសន៍ឱ្យគណៈកម្មការជំនាញរៀបចំសិក្ខាសាលាមួយ ដើម្បីអប់រំផ្សព្វផ្សាយលើការងារប្រកាសនូវយុទ្ធនាការសំខាន់ៗចំនួនពីរនេះ ចាប់ពីពេលនេះតទៅ ដើម្បីឱ្យកម្ពុជាមានរូបភាពវិជ្ជមាន សម្រាប់សមាជិកអាស៊ីអាគ្នេយ៍ចំនួន១០ប្រទេសផ្សេងទៀត ដែលត្រៀមចូលរួមប្រកួតកីឡាស៊ីហ្គេម ឆ្នាំ២០២៣ ក៏ដូចជាមតិអន្តរជាតិបានមើលឃើញពីសកម្ម ភាពវិជ្ជមាននៃដំណើរការអភិវឌ្ឍ សន្តិភាពរបស់កម្ពុជា ជាដើម។ ឯកឧត្ដមបានបន្ថែមថា តាមការគ្រោងទុក សិក្ខាសាលាដ៏ធំនេះយើងនឹងធ្វើបទបង្ហាញពីខ្លឹមសារសំខាន់ៗលើយុទ្ធនាការពីរនេះ ដោយមានសមាសភាពចូលរួមពីក្រសួងស្ថាប័នពាក់ព័ន្ធ រួមទាំងអាជ្ញាធរទាំង២៥រាជធានី-ខេត្តក្នុងគោល បំណងលើការផ្សព្វផ្សាយបញ្ជ្រាបជូនប្រជាពលរដ្ឋឱ្យមានការរស់នៅក្នុងឥរិយាបថថ្មីមួយ សម្រាប់សង្គមជាតិរបស់យើង។
ចំពោះរបៀបវារៈទី៣ គឺការពិភាក្សាគ្នាលើផ្នែកថវិកាបឋម ហើយគ្រោងនឹងបន្តពិភាក្សាគ្នា និងស្វែងរកអ្នកជំនាញការបន្ថែមទៀត លើផែនការលម្អិតនៃការចំណាយថវិកា ដើម្បីធ្វើយ៉ាងណាឱ្យមានភាពសន្សំសំចៃលើការប្រើ ប្រាស់ថវិកាជាតិឱ្យបានត្រឹមត្រូវបំផុត៕
(សរុបដោយ ហេង វុធី)
មតិពីមិត្តអ្នកអាន