នាពេលថ្មីៗនេះ នៅក្នុងពិធីអបអរសាទរទិវាបុណ្យឯករាជ្យជាតិលើកទី ៧៤ របស់ឥណ្ឌានៅឯស្ថានទូតឥណ្ឌាប្រចាំនៅកម្ពុជា ឯកអគ្គរដ្ឋទូតឥណ្ឌាលោកស្រី Manika Jain បានមានប្រសាសន៍ថា ស្របនឹងទំនាក់ទំនងដ៏យូរអង្វែងរវាងប្រទេសទាំងពីរ ឥណ្ឌាប្តេជ្ញានឹងបន្តជួយគាំទ្រក្នុងការអភិរក្សប្រាសាទបុរាណនៅកម្ពុជា។
ឥណ្ឌាប្តេជ្ញាបន្តជួយគាំទ្រក្នុងការអភិរក្សប្រាសាទបុរាណនៅកម្ពុជា
លោកស្រីឯកអគ្គរដ្ឋទូត Manika Jain បានឱ្យដឹងថា ឥណ្ឌានិងកម្ពុជាបានកសាងទំនាក់ទំនងល្អជាមួយគ្នាអស់រយៈពេលជាច្រើនឆ្នាំ ហើយដោយសារហេតុនេះហើយ ប្រទេសឥណ្ឌាបានខិតខំចូលរួមចំណែកក្នុងការអភិរក្សបេតិកភណ្ឌជាតិរួមទាំងការថែរក្សាបណ្តាប្រាសាទបុរាណនៅក្នុងប្រទេសកម្ពុជា។
លោកស្រីថា រដ្ឋាភិបាលឥណ្ឌាបានគាំទ្រដល់កិច្ចខិតខំប្រឹងប្រែងអភិរក្សប្រាសាទរបស់កម្ពុជាជាយូរមកហើយ រួមទាំងការជួសជុលប្រាសាទអង្គរវត្តនៅពាក់កណ្តាលទសវត្សទី ៨០ ផងដែរ ។
ក្រៅពីគម្រោងជួសជុលតាព្រហ្ម ឯកអគ្គរដ្ឋទូតម៉ានីកា បាននិយាយថា ប្រទេសឥណ្ឌាក៏កំពុងចូលរួមចំណែកក្នុងការអភិវឌ្ឍប្រទេសកម្ពុជា តាមរយៈការផ្តល់ជំនួយក្នុងវិស័យមួយចំនួនរួមមានវិស័យសុខាភិបាល អប់រំ និងការអភិវឌ្ឍសហគមន៍។៕
(សរុបដោយសាមេត)
មតិពីមិត្តអ្នកអាន