អាណាចក្រអង្គរ ដែលជាមជ្ឈមណ្ឌលទេសចរណ៍កែច្នៃមួយនៅខេត្តសៀមរាប កំពុងតែបង្កប់នូវរោងមហោស្របជាមួយនឹងផ្ទាំងទស្សនីយភាព និង បច្ចេកវិទ្យាដ៏ទំនើបមួយ នៅក្នុងខេត្ត ដែលជាទឹកដីបុរាណដ្ឋានអង្គរ នៃប្រទេសកម្ពុជា ។
ឆាកសំដែងនៅមជ្ឈមណ្ឌលទេសចរណ៍កែច្នៃមួយនៅខេត្តសៀមរាប
ជារៀងរាល់ថ្ងៃ សិល្បករនិងសិល្បៈការនីកម្ពុជាប្រមាណជាជាង ១០០ នាក់ ដែលមកពីគ្រប់ សមាសភាព បានចាប់ដៃគ្នាទទួលការបណ្តុះបណ្តាល និង បំពាក់បំប៉នសមត្ថភាពសម្តែង របាំនិងប្រពៃណីខ្មែរដោយផ្សារភ្ជាប់ជាមួយនឹងបច្ចេកវិទ្យាដ៏ទំនើប ដើម្បីសម្តែងជូនភ្ញៀវទេសចរជាតិ និងអន្តរជាតិ ស្វែងយល់អំពីប្រពៃណី និង ដើមកំណើតនៃជាតិសាសន៍ខ្មែរ ដែលជាម្ចាស់នៃទីបុរាណដ្ឋានអង្គរវត្តដ៏ល្បីល្បាញ ។លោក លី យ៉ុងស៊ី (Li Yongxi) នាយកមហោស្របអាណាចក្រអង្គរ បានអះអាងថា រោងមហោស្របនេះ ជារោងមហោស្របដែលបំពាក់បច្ចេកវិទ្យា ប្រព័ន្ធសម្លេង និង ឧបករណ៍ ព្រមទាំង មានសិល្បៈករនិងសិល្បៈការនីខ្មែរដែលទទួលការបណ្តុះបណ្តាលត្រឹមត្រូវហើយអាចមាន សមត្ថភាពស្វាគមន៍អ្នកទេសចរជាតិ និងអន្តរជាតិប្រមាណជាជាង១.២០០ នាក់នៅក្នុងមួយថ្ងៃ។
អាណាចក្រអង្គរ ជាគម្រោងមជ្ឈមណ្ឌលទស្សនាចរណ៍កម្សាន្តតាមបែបវប្បធម៌
នៅក្នុងកម្មវិធីសម្តែងរៀងរាល់រាត្រីចាប់ពីម៉ោង ៧:៣០ នាទីយប់ ដល់ ម៉ោង ៨:៣០នាទីយប់ សិល្បៈករ និង សិល្បការនីខ្មែរ បានសម្តែងនូវឈុតឆាកជាច្រើន ដែលអាចនឹងផ្តល់ជូននូវអ្វីដែលជាអត្តសញ្ញាណ និង ការវិវត្តន៍នៃសង្គមខ្មែរចាប់តាំងពីកកើតទឹកដី រហូតដល់ការកសាង ប្រសាទអង្គរ ដែលគេដឹងថា គឺជាអច្ឆរិយៈវត្ថុមួយនៅលើពិភពលោកហើយបន្សល់ទុកនៅលើ ទឹកដីសៀមរាបរហូតដល់ពេលបច្ចុប្បន្ននេះ ។
នៅក្នុងរយៈពេលប្រហែលជា ជាង ១ម៉ោងកន្លះនេះ មានឈុតឆាកនៃការសម្តែងដោយលើក ឡើងអំពីធម្មជាតិ សត្វព្រៃ រហូតដល់ប្រពៃណីនិងរបៀបរបបនៃការស់នៅរបស់ពលរដ្ឋខ្មែរ សម័យបុរាណ រហូតដល់មានការឈ្លានពានពីសំណាក់ជនជាតិឈ្វា ហើយនិងការតស៊ូ របស់ បុព្វបុរសខ្មែរ រហូតដល់ទទួលជ័យជំនះ និង បានរួបរួមគ្នាកសាងនូវប្រាសាទអង្គរវត្តឡើង ។
អាណាចក្រអង្គរ ជាគម្រោងមជ្ឈមណ្ឌលទស្សនាចរណ៍កម្សាន្តតាមបែបវប្បធម៌
អ្នកស្រីទុំ សារិម អាយុ ៣៨ ឆ្នាំ ជាសិល្បៈការនី ដែលមានភារៈជាអ្នករាំរបាំអប្សរា នៅរោងមហោស្រប អាណាចក្រអង្គរ បានឲ្យដឹងថា មុននឹងសម្តែង អ្នកស្រីត្រូវបានបណ្តុះបណ្តាលដោយគ្រូបង្វឹកកម្ពុជានិងចិនអស់រយៈពេលជាងមួយឆ្នាំមុន ហើយ ត្រូវមកសមនឹងឈុតឆាក និង បច្ចេកវិទ្យានេះរាល់ថ្ងៃមុនពេល សម្តែងម្តងៗ ។ អ្នកស្រីបាននិយាយថា អ្នកស្រីរីករាយនឹងការងារដែលអ្នកស្រីអាចជួយ ផ្សព្វផ្សាយវប្បធម៌ខ្មែរទៅកាន់ពិភពលោកតាមរយៈរោងមហោស្របអាណាចក្រអង្គរនេះ។
ឈុតឆាកទាំងអស់គឺត្រូវបានសម្តែងយ៉ាងប្រត្យក្ស ដោយមានជំនួយពីបច្ចេកទេស និង ភាពប៉ិនប្រសព្វរបស់សិល្បៈករនិងសិល្បការនីខ្មែរ ។អាណាចក្រអង្គរ ជាគម្រោងមជ្ឈមណ្ឌលទស្សនាចរណ៍កម្សាន្តតាមបែបវប្បធម៌ និងប្រវត្តិសាស្ត្រមួយ ដែលស្ថាបនានៅលើផ្ទៃដីជាងមួយហិកតានៅតាមផ្លូវទៅអង្គរវត្ត ដើម្បីបង្ហាញពីទស្សនីយភាពចម្រុះច្រើនបែប ភោជនី យដ្ឋាននិងសួនទឹកដ៏ទំនើបជាដើម។
（ប្រភព៖ rasmeinews.com សរុបដោយ ហេង វុធ្ធី）
មតិពីមិត្តអ្នកអាន