ទេសភាពជួរភ្នំរំលេចនូវកម្រាលព្រំពណ៌បៃតងក្រាលរដិបរដុបជារលកផ្នត់ៗ អមដោយដើមឈើខ្ពស់ដុះអែបផ្លូវកៅស៊ូរលោងប្រិលព័ទ្ធពេនហាក់ដូចជាសរសៃខ្សែពន្លាវែងអន្លាយឆ្លងដែនផុតដីសុវណ្ណភូមិ បានទាក់អារម្មណ៍ភ្ញៀវឲ្យមានបំណងប្រាថ្នាចង់មកថតរូបអនុស្សាវរីយ៍ខេត្ដមណ្ឌលគិរីដោយផ្ទាល់។
ដាក់ដាំ គឺជាឈ្មោះឃុំមួយដែលប្រជុំទៅដោយជនជាតិភាគតិចពូនងរស់នៅ
ដាក់ដាំ គឺជាឈ្មោះឃុំមួយដែលប្រជុំទៅដោយជនជាតិភាគតិចពូនងរស់នៅ។ ឃុំនេះស្ថិតនៅក្នុងស្រុកអូររាំង ខេត្តមណ្ឌលគិរី ដែលមានចម្ងាយប្រមាណ ១៦គីឡូម៉ែត្រប៉ុណ្ណោះពីក្រុងសែនមនោរម្យ។ ត្រឹមតែជាឃុំតូចមួយប៉ុណ្ណោះ ប៉ុន្តែដាក់ដាំ មានឈ្មោះល្បីរន្ទឺ តាមរយៈវិស័យកសិកម្ម ផ្សារភ្ជាប់នឹងវិស័យទេសចរណ៍។ សព្វថ្ងៃនេះ ជនជាតិដើមភាគតិចពូនង ដែលរស់នៅតំបន់ដាក់ដាំ ភាគច្រើនប្រកបរបរកសិកម្ម ដាំស្រូវ ដាំបន្លែ ចិញ្ចឹមសត្វ និងរកអនុផលព្រៃឈើ។ បច្ចុប្បន្ន បើទោះបីជាជនជាតិដើមភាគតិចបានផ្លាស់ប្ដូររបៀបរបបរស់នៅខ្លះក៏ដោយ ប៉ុន្តែពួកគាត់នៅតែរក្សាបានប្រពៃណីវប្បធម៌របស់ខ្លួននៅដដែល ក្នុងនោះមានដូចជា ភាសា ម្ហូបអាហារ និងពិធីសែនព្រេនជាដើម។ នៅតាមផ្ទះនីមួយៗ មានតាំងពាងបុរាណ ផ្លែឃ្លោក និងឃ្មោះ ដែលជាវត្ថុដ៏មានតម្លៃសម្រាប់ជនជាតិភាគតិច។
រូបពីទីទួល បង្ហាញវាលបៃតង និងផ្លូវខ្វែងប្រសព្វគ្នា
នៅក្បែរសហគមន៍ឃុំដាក់ដាំ ភ្ញៀវទេសចរក៏អាចទៅកម្សាន្តទឹកធ្លាក់មួយកន្លែងដែលមានឈ្មោះថា ទឹកធ្លាក់ដាក់ដាំ ឬទឹកធ្លាក់ជ្រៃធំ។ទឹកធ្លាក់នៅទីនោះ មិនត្រឹមតែបម្រើឲ្យវិស័យទេសចរណ៍ប៉ុណ្ណោះទេ ថែមទាំងជាប្រភពទឹកសម្រាប់ស្រោចស្រប់ចម្ការដំណាំគ្រប់ប្រភេទប្រចាំតំបន់នេះផងដែរ។
ទីថតរូបសែលហ្វីដ៏ពេញនិយម។
ចម្ងាយប្រមាណ ២ គីឡូម៉ែត្រពីប៉ុស្ដិ៍ព្រំដែន អណ្ដូងស្នេហ៍គឺជាឈ្មោះតំបន់កម្សាន្ដស្ថិតនៅលើទីទួលភ្នំខ្ពស់គន់ទេសភាពដ៏ស្រស់ត្រកាលនៃជួរភ្នំ និងរុក្ខជាតិបៃតង ក្រោមខ្យល់អាកាសបរិសុទ្ធដែលបានអន្ទងចិត្ដទេសចរខំវេចខ្ចប់ចំណីចំណុកមកពិកនិកជួបជុំគ្រួសារ មិត្ដភក្ដិ និងគូសង្សារ។
ដោយមិនមានស្លាកសញ្ញាបញ្ជាក់ជាតម្រុយទីតាំង ភ្ញៀវទេសចរអាចនឹងធ្វើដំណើរទៅដល់ប៉ុស្ដិ៍ព្រំដែន រួចត្រឡប់ក្រោយប្រមាណ ២ គីឡូម៉ែត្រ នៅផ្នែកខាងស្ដាំដៃ នឹងមើលឃើញផ្លូវជម្រាលថ្មើរជើងឡើងភ្នំប្រមាណ ៥០ ទៅ ៦០ ម៉ែត្រ (សម្រាប់រដូវវស្សាដែលការបើកបរយានយន្ដអាចបង្កគ្រោះថ្នាក់ដោយរអិលស្លែ)។ ឡើងបណ្ដើរក្រឡេកមើលឯនាយឆ្វេងដៃបណ្ដើរ សម្រស់ធម្មជាតិភ្នំស្មៅមានព្រៃរ៉ុយៗ ផុសត្រដែតឡើងគួរឲ្យគយគន់។ ចំទើតនៅលើកំពូលភ្នំ អ្នកថតរូបសែលហ្វ៊ីប្រាកដជារីករាយនឹងប្លង់ថតរូបដ៏ស្រស់ស្អាតដែលយកសម្រស់ព្រៃភ្នំជាផ្ទៃខាងក្រោយដោយមិនភ្លេចគួបនឹងខ្សែផ្លូវកៅស៊ូឡើយ។
ទីថតរូបសែលហ្វីដ៏ពេញនិយម។
យ៉ាងណាមិញ ទីឋានរម្យនាធម្មជាតិដ៏ស្រស់ស្អាតរមែងត្រូវបានបំបិទសម្រស់ដោយសារតែបញ្ហាសំរាមដែលភ្ញៀវទេសចរមួយចំនួនតូចមកពិកនិកចោលពង្រាយ។ចុះចង្អូរបន្ដិចគន់ទៅកាន់ទីទួលភ្នំមួយទៀតដែលរំលេចរូបក្រឡាកង់រថយន្ដព្រែកជាចម្ពាម ភ្ញៀវទេសចរកាន់តែជក់ចិត្ដក្នុងការគន់ខ្សែផ្លូវអែបភ្នំដ៏ស្រស់ស្អាត។ ឈ្មោះអណ្ដូងស្នេហ៍ ត្រូវបានអ្នករស់នៅទីនោះបកស្រាយពីប្រភពជ្រលងជ្រៅមួយស្ថិតនៅខាងក្រោមជម្រាលភ្នំដែលស្រោបក្រាលដោយព្រៃឈើ។
ជាអ្នកចាំចម្ការកាហ្វេរបស់ម្ចាស់ជនជាតិកូរ៉េ លោក ហួរ ដែលទើបមករស់នៅជាមួយភរិយា និងកូនពីរនាក់ឯជើងភ្នំម្ខាងទៀតបានចង្អុលបង្ហាញពីចំណុចជ្រលងដែលប្រជាជនហៅឈ្មោះថា អណ្ដូងស្នេហ៍ស្ថិតនៅពីក្រោមទីទួលភ្នំគន់ទេសភាពដ៏ស្រស់ស្អាតនៃមណ្ឌលគិរី។ ក្រៅពីទាក់ទាញទេសចរណ៍តាមរយៈវិស័យកសិកម្ម វប្បធម៌ និងតំបន់ទេសចរណ៍ធម្មជាតិ ជនជាតិដើមភាគតិចបានចងក្រងគ្នាបង្កើតជាសហគមន៍មួយ ដែលបានរៀបចំជាផ្ទះស្នាក់ សម្រាប់បម្រើសេវាកម្មទេសចរណ៍ថែមទៀតផង៕
(សរុបដោយ ហេង វុធ្ធី)
(ប្រភពព័ត៌មាន: postkhmer និង news.sabay.com.kh)
មតិពីមិត្តអ្នកអាន