សហគមន៍ទេសចរណ៍ភ្នំជម្រកសត្វភូមិឆ្វាំង ឃុំសំអាង ស្រុកថាឡាបរិវ៉ាត់ខេត្តស្ទឹងត្រែង បានបើកបម្រើសេវាកម្ម ជូនភ្ញៀវទេសចរចាប់ពីរដូវបុណ្យភ្ជុំបិណ្ឌនេះទៅ ដើម្បីបានប្រាក់ចំណូល បន្តរៀបចំអភិរក្សធនធានធម្មជាតិនៅតំបន់នោះឱ្យបានគង់វង្ស។
សហគមន៍ទេសចរណ៍ភ្នំជម្រកសត្វនៅខេត្តស្ទឹងត្រែង បើកបម្រើសេវាកម្ម ជូនភ្ញៀវទេសចរចាប់ពីរដូវបុណ្យភ្ជុំបិណ្ឌនេះទៅ
ក្នុងឱកាស ចុះពង្រឹងសេវាកម្មទេសចរណ៍របស់សហគមន៍ ភ្នំជម្រកសត្វនៅ កាលពីថ្ងៃទី០៧កញ្ញាឆ្នាំ ២០២០ លោកអ៊នប៉ោសឿន ប្រធានមន្ទីរទេសចរណ៍ខេត្តនេះ បញ្ជាក់ថា សមាជិកសហគមន៍ត្រូវរួមគ្នារៀបចំគ្រប់គ្រងសេវាកម្មជូនភ្ញៀវដែលមកកម្សាន្តនៅភ្នំជម្រកសត្វនេះឱ្យបានល្អ ដើម្បីផ្តល់ឱកាសឱ្យប្រជាពលរដ្ឋមានលទ្ធភាពបង្កើតរបរលក់ដូរនៅក្នុងមូលដ្ឋានរបស់ខ្លួនកាន់តែច្រើន។
លោកបន្តថា ដោយសារតែផលប៉ះពាល់ពីឥទ្ធិពលជំងឺកូវីដ-១៩ទើបការបើកដំណើរការមានភាពយឺតយ៉ាវ តែទោះជាយ៉ាងណាក៏ដោយ ត្រូវតែប្រឹងប្រែងរួមគ្នាអភិវឌ្ឍន៍ និងអភិរក្សធនធានធម្មជាតិ ដើម្បីបម្រើឱ្យភ្ញៀវទេសចរក្នុងស្រុក ហើយផ្នែកសុខភាពក៏ត្រូវតែអនុវត្តតាមការណែនាំរបស់ក្រសួងសុខាភិបាលផងដែរ។
លោកញាន ផុនប្រធានសហគមន៍នេះបានបញ្ជាក់ថាតំបន់ភ្នំជម្រកសត្វមានសក្តានុពលសម្រាប់ភ្ញៀវទេសចរមកទស្សនាព្រោះសម្បត្តិធម្មជាតិ មានព្រៃឈើ សត្វព្រៃ ល្អាងថ្ម ដូចរូបចម្លាក់ នៅតំបន់ភ្នំឈ្ងូគ ភ្នំក្ងោកមាស ភ្នំដំរីជល់ មានទេសភាពល្អប្រណិតផ្សេងៗទៀត ។
សហគមន៍ទេសចរណ៍ភ្នំជម្រកសត្វនៅខេត្តស្ទឹងត្រែង បើកបម្រើសេវាកម្ម ជូនភ្ញៀវទេសចរចាប់ពីរដូវបុណ្យភ្ជុំបិណ្ឌនេះទៅ
លោកបន្តថាការអភិវឌ្ឍសហគមន៍នេះអាជ្ញាធរពាក់ព័ន្ធបានឯកភាពជាមួយមន្ទីរទេសចរណ៍និងអង្គការដៃគូ រៀបចំឱ្យមានជណ្តើរឡើង មានមគ្គុទេសក៍ ទេសចរណ៍ មានកន្លែងលក់ចំណីអាហារ កន្លែងចតរថយន្ត ម៉ូតូ និងមានអ្នកយាមត្រឹមត្រូវផងដែរ។
លោកផល លុយប្រធានប្រតិបត្តិនៃសមាគមថែរក្សាបរិស្ថាន និងវប្បធម៌ប្រចាំខេត្តស្ទឹងត្រែងបញ្ជាក់ថា អង្គការដៃគូ នៅបន្តគាំទ្រការរៀបចំផែនការអភិវឌ្ឍវិស័យទេសចរណ៍នេះឱ្យចប់ចុងចប់ដើម ។លោកបន្ថែមថា៖ក្នុងពេលឆាប់ៗនេះគម្រោងនឹងរៀបចំដាក់ផ្ទាំង សូឡាភ្លើងបំភ្លឺតាមល្អាងកែសម្រួលផ្លូវឡើង តាមតំបន់នីមួយៗ និងរៀបចំផ្នែកបរិស្ថាន ដើម្បីលើកស្ទួយសោភណ្ឌភាពបន្ថែម។
សូមបញ្ជាក់ថាតំបន់ភ្នំជម្រកសត្វនេះ ស្ថិតនៅចម្ងាយពីទីរួមខេត្តប្រមាណជាង៥០គីឡូម៉ែត្រ ។ រមណីយដ្ឋានអេកូទេសចរណ៍ធម្មជាតិនេះ បានបើកឱ្យភ្ញៀវទេសចរជាតិនិងអន្តរជាតិចូលទស្សនាចាប់ពីរដូវបុណ្យភ្ជុំនេះតទៅហើយ៕
（ហេង វុធ្ធ）
（ប្រភពព័ត៌មាន: information.gov.kh）
មតិពីមិត្តអ្នកអាន