ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានមានប្រសាសន៍ថា ការប្រារព្ធពិធីបុណ្យសមុទ្រលើកទី៨ ជុំទី២ នៅខេត្តកំពត ក្រោមប្រធានបទ«ទីក្រុងស្អាត-ឆ្នេរល្អ-ទេសចរណ៍រុងរឿង» នឹងក្លាយជាកាលានុវត្តភាពដ៏ប្រសើរមួយសម្រាប់កម្ពុជា ក្នុងការធ្វើឱ្យទីក្រុងជាប់មាត់ឆ្នេរ និងឆ្នេរសមុទ្រកម្ពុជាក្លាយជាគោលដៅទេសចរណ៍ប្រកបដោយគុណភាព ស្របនឹងពាក្យស្លោក«ឆ្នេរសមុទ្រកម្ពុជា៖ តារារះនាទិសនារតី» ព្រមទាំងបង្កើនស្មារតីស្រឡាញ់ជាតិមាតុភូមិ សាមគ្គីភាព និងមិត្តភាពផងដែរ។
សម្ដេចតេជោ ហ៊ុន សែន អញ្ជើញកាត់ខ្សែពរសម្រោធពិធីបុណ្យសមុទ្រលើកទី៨ នៅខេត្តកំពត
ក្នុងសារលិខិតអបអរសាទរពីធីបុណ្យសមុទ្រលើកទី៨ ជុំទី២ នៅខេត្តកំពត សម្ដេចតេជោគូសបញ្ជាក់ថា ការប្រារព្ធពិធីបុណ្យសមុទ្រ មិនត្រឹមតែចូលរួមចំណែកក្នុងការផ្សព្វផ្សាយពីសក្ដានុពលទេសចរណ៍នៃខេត្តជាប់មាត់ឆ្នេរសមុទ្រប៉ុណ្ណោះទេ ប៉ុន្តែថែមទាំងចូលរួមគាំទ្រនយោបាយរបស់រាជរដ្ឋាភិបាលកម្ពុជា ក្នុងការអភិវឌ្ឍទេសចរណ៍ប្រកបដោយនិរន្តរភាព និង ការទទួលខុសត្រូវខ្ពស់ដោយឈរលើការប្ដេជ្ញាចិត្តរួមមួយច្បាស់លាស់ ក្នងការក្សាតុល្យភាពរវាងផលប្រយោជន៍សេដ្ឋកិច្ច សង្គម បរិស្ថាន និងវប្បធម៌ប្រជាពលរដ្ឋមូលដ្ឋាន ដូចដែលត្រូវឆ្លុះបញ្ចាំងតាមរយៈប្រធានបទនៃពិធីបុណ្យសមុទ្រលើកទី៨នេះ គឺ«ទីក្រុងស្អាត-ឆ្នេរល្អ-ទេសចរណ៍រុងរឿង»។ ជាក់ស្ដែងតំបន់ឆ្នេរសមុទ្រទទួលបានភ្ញៀវទេសចរអន្តរជាតិប្រមាណ ជាង១៥ភាគរយ នៃចំនួនទេសចរសរុបមកកម្ពុជា ដែលចំណែកទីផ្សារនេះបាននិងកំពុងកើនឡើងជាលំដាប់ពីមួយឆ្នាំទៅមួយឆ្នាំ។ សម្ដេចតេជោបានបន្តថា ឈរលើមូលដ្ឋាននៃកំណើននេះ ក៏ទាមទារឱ្យមានការគិតគូរ និងគ្រប់គ្រងឱ្យហ្មត់ចត់ ដោយត្រូវមានផែនការអភិវឌ្ឍន៍ និងគ្រប់គ្រងទេសចរណ៍ ពិសេសស្របពេលដែលពិភពលោកទាំងមូលបាននិងកំពុងប្រឈមនឹងវិបត្តិថ្មីៗឥតឈប់ឈរទាំងផ្នែកសេដ្ឋកិច្ច សង្គម និងបរិស្ថាន។ ដើម្បីឆ្លើយតបនឹងបញ្ហាប្រឈម ការយកចិត្តទុកដាក់ដល់ទស្សនទាននៃភាពស្អាត និងបៃតង គឺពិត ជាមានភាពចាំបាច់ ខណៈដែលពិភពលោកកំពុងបោះជំហានទៅមុខក្នុងសម័យកាលបៃតង។
សម្ដេចតេជោ ហ៊ុន សែនអញ្ជើញចូលរួមធពិធីបុណ្យសមុទ្រលើកទី៨នៅខេត្តកំពត
ជាមួយគ្នានេះ ការអភិវឌ្ឍទេសចរណ៍តំបន់ឆ្នេរទាមទារចាំបាច់ឱ្យមានការ អភិវឌ្ឍទីក្រុងស្អាត ទីក្រុងបៃតង ឆ្នេរស្អាត និងកោះបៃតង ដែលជាការគិតគូរខ្ពស់ដល់ការអភិរក្ស ថែរក្សាសម្បត្តិវប្បធម៌ ធនធានធម្មជាតិ និងបរិស្ថានប្រកបដោយនិរន្តរភាព។ ទីក្រុងជាប់ឆ្នេរគួរតែជា ទីក្រុងបៃតង-ទីក្រុងស្អាត មានន័យថាទីក្រុងដែលមានបរិស្ថាន អនាម័យ និងសណ្ដាប់ធ្នាប់ល្អ គួបផ្សំនឹងហេដ្ឋារចនាសម្ព័ន្ធទ្រទ្រង់គ្រប់គ្រាន់ ដែលផ្ដល់នូវភាពកក់ក្ដៅ និងមជ្ឈដ្ឋានរស់នៅល្អប្រសើរដល់ប្រជាជន និងភ្ញៀវទេសចរជាតិ និងអន្តរជាតិ។ សម្ដេចតេជោបានបន្ដទៀតថា ការអភិវឌ្ឍទីក្រុងតំបន់ឆ្នេរឱ្យក្លាយជាទីក្រុងបៃតង មិនត្រឹមតែកាត់បន្ថយផលប៉ះពាល់ជាអវិជ្ជមានដល់និរន្តរភាពនៃធនធានតំបន់ឆ្នេរប៉ុណ្ណោះទេ តែថែមទាំងជួយបង្កើនភាពទាក់ទាញដល់ភ្ញៀវទេសចរឱ្យមកទស្សនា និងកម្សាន្តកាន់តែរុងរឿងថែមទៀត។ ដូច្នេះចាំបាច់ត្រូវ «រួមគិត រួមធ្វើ រួមទទួលខុសត្រូវ» ក្នុងការអភិវឌ្ឍវិស័យទេសចរណ៍តំបន់ឆ្នេរសមុទ្រកម្ពុជាឱ្យមាននិរន្តរភាព ហើយទីក្រុងជាប់ឆ្នេរត្រូវតែជាជ័យលាភីទីក្រុងស្អាត និងជ័យលាភីទីក្រងស្អាតអាស៊ាន ស័ក្ដិសមជា «ឆ្នេរសមុទ្រកម្ពុជា៖ តារារះនាទិសនារតី»។ សម្ដេចតេជោនាយករដ្ឋមន្ត្រីបានអំពាវនាវដល់គ្រប់ស្ថាប័នពាក់ព័ន្ធ អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ វិស័យឯកជន និងបងប្អូនជនរួមជាតិទាំងអស់ ចូលរួមឱ្យផុលផុសប្រកបដោយស្មារតីទទួលខុសត្រូវខ្ពស់ ដើម្បីធ្វើឱ្យពិធីបុណ្យសមុទ្រឆ្នាំនេះប្រព្រឹត្តទៅប្រកបដោយភាពជោគជ័យ និងអំពាវនាវដល់វិនិយោគិន ប្រតិបត្តិករទេសចរណ៍ ទេសចរជាតិនិងអន្តរជាតិ អាជ្ញាធរមូលដ្ឋាន និងបងប្អូនប្រជាពលរដ្ឋចូលរួមឱ្យកាន់តែសកម្មចលណាប្រឡងប្រណាំង«ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» និងសហការថែរក្សាសោភណភាព អនាម័យ បរិស្ថាន ដែលជាកត្តាចម្បងមិនអាចខ្វះបាន ក្នុងការថែរក្សាតំបន់ឆ្នេរសមុទ្រឱ្យស្រស់ស្អាតគង់វង្សយូរអង្វែង ដើម្បីបន្តទុកជាមរតកដល់កូនចៅជំនាន់ក្រោយ។
សម្ដេចតេជោ ហ៊ុន សែន អញ្ជើញទស្សនាស្តង់លក់ផលិតផលវៀតណាមនៅឯពិធីនេះ
ឯកឧត្ដម ថោង ខុន រដ្ឋមន្ត្រីក្រសួងទេសចរណ៍បានឱ្យដឹងថា ពិធីបុណ្យសមុទ្រត្រូវបានធ្វើឡើងលើកដំបូងនៅខេត្តព្រះសីហនុ ឆ្នាំ២០១១ ក្នុងគោលបំណងអបអរសាទរការចូលជាសមាជិកក្លឹបឆ្នេរសមុទ្រដែលស្អាតបំផុតលើសកលលោក និងរួមចំណែកក្នុងការផ្សព្វផ្សាយពីសក្តានុពលទេសចរណ៍នៃខេត្តតំបន់ឆ្នេរសមុទ្រ និងគាំទ្រគោលនយោបាយរបស់រាជរដ្ឋាភិបាលក្នុងការអភិវឌ្ឍទេសចរណ៍ប្រកបដោយនិរន្តរភាព។ ឯកឧត្ដមបានបញ្ជាក់ថា ព្រឹត្តិការណ៍បុណ្យសមុទ្រឆ្នាំនេះ មានការតាំងពិព័រណ៍សមិទ្ធផល មហោស្រពម្ហូបអាហារ និងភេសជ្ជៈ និងគម្រោងអភិវឌ្ឍន៍តំបន់ឆ្នេរ សរុបចំនួន ៤៦១ស្តង់ ក្នុងនោះរួមមាន ស្តង់គម្រោងអភិវឌ្ឍន៍ទេសចរណ៍សំខាន់ៗនៅតំបន់ឆ្នេរ ផលិតផលទេសចរណ៍ផលិតផលក្នុងស្រុក និងសហគ្រាសធុនតូច និងមធ្យម ស្តង់ពិព័រណ៍បរទេស ហើយពិសេសការរៀបចំវិថីម្ហូបអាហារ (Food Street) អាចសម្រាប់ជាគំរូដល់ខេត្តដទៃ។ ក្រៅពីនេះ ក៏មានការសម្តែងទស្សនីយភាពសិល្បៈចម្រុះបូរាណ-សម័យ ដែលមានការចូលរួមពីសិល្បករ-សិល្បការិនីជាតិ និងបណ្តាប្រទេសជាមិត្ត រួមមានប្រទេសចិន ថៃ ឥណ្ឌូណេស៊ី ឥណ្ឌា និងវៀតណាម។ ឯសកម្មភាពកីឡាវិញ រួមមាន កីឡារត់កម្សាន្ត ការប្រណាំងកង់ បាល់ទះលើឆ្នេរខ្សាច់ ចំបាប់លើឆ្នេរខ្សាច់ កីឡាប្រណាំងម៉ូតូទឹកលក្ខណៈអន្តរជាតិ ប្រដាល់គុនខ្មែរអន្តរជាតិដណ្តើមខ្សែក្រវ៉ាត់អន្តរជាតិ គុនល្បុក្កតោ ការប្រកួតអុកចត្រង្គ និងកីឡាផ្សងព្រេងលើភ្នំ។ល។ ឯកឧត្ដមរដ្ឋមន្ត្រីបានឱ្យដឹងទៀតថា ក្នុងព្រឹត្តិការណ៍បុណ្យសមុទ្រនៅខេត្តកំពតនេះ ក៏មានការរៀបចំសកម្មភាពមុនព្រឹត្តិការណ៍ (Pre-Event) មួយចំនួនផងដែរដូចជា សិក្ខាសាលា និងការចែកជ័យលាភីជូនដល់អាជីវកម្ម ទេសចរណ៍ដែលមានស្នាដៃឆ្នើម រួមមានសេវាស្នាក់នៅ ម្ហូបអាហារ ការដឹកជញ្ជូន និងឆ្នេរខ្សាច់កម្សាន្តគំរូនៅខេត្តតំបន់ឆ្នេរទាំង៤ និងពិធីដាំដើមឈើអនុស្សវរីយ៍ រួមជាមួយព្រឹត្តិការណ៍អបអរសាទរជាច្រើនផ្សេងទៀត។
សូមបញ្ជាក់ថា ពិធីបុណ្យសមុទ្រលើកទី៨ជុំទី២នៅខេត្តកំពត ក្រោមប្រធានបទ «ទីក្រុងស្អាត-ឆ្នេរល្អ-ទេសចរណ៍រុងរឿង» ត្រូវបានប្រារព្ធពិធីបើកក្រោមអធិបតីភាពដ៏ខ្ពង់ខ្ពស់ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាល្ងាចថ្ងៃសៅរ៍ ១០រោច ខែមិគសិរ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២១ ខែធ្នូ ឆ្នាំ២០១៩៕
រូបថត៖ information.gov.kh
(សរុបដោយ ហេង វុធ្ធី)
(ប្រភពព័ត៌មាន: information.gov.kh)
មតិពីមិត្តអ្នកអាន