ជាមួយនឹងទេសភាពល្អប្លែកសម្បូរទៅដោយល្អាងភ្នំមិនចាញ់បរទេស នៅពេលនេះ កំពង់ត្រាច ត្រូវបានអាជ្ញាធរខេត្តបញ្ជាក់ថា តំបន់នោះជាកន្លែងស័ក្តិសមបំផុតសម្រាប់ការថតខ្សែភាពយន្ត និងភាពយន្តខ្នាតធំ លំដាប់ជាតិ និងអន្តរជាតិខណៈកន្លងមកទើបតែមានផលិតកម្មបរទេសតិចបំផុតបាន ទៅដល់។
រមណីយដ្ឋានកំពង់ត្រាច
ភ្នំកំពង់ត្រាច គឺជារមណីយដ្ឋានទេសចរណ៍ធម្មជាតិដ៏ល្បីមួយ ស្ថិតក្នុងស្រុកកំពង់ត្រាច ចម្ងាយប្រមាណ ៥០គីឡូម៉ែត្រពីទីរួមខេត្តកំពត។ ភ្នំកំពង់ត្រាច លាក់ទុករឿងរ៉ាវគួរឲ្យចាប់អារម្មណ៍ជាច្រើន។ ភ្នំថ្មកំបោរមួយនេះ មានល្អាងតូចធំរាប់សិបកន្លែង និងមានរូងភ្នំធំ២ គឺរូងឋានព្រះចន្ទ និងរូងឋានព្រះអាទិត្យ ដែលមានលក្ខណៈពិសេសរៀងៗខ្លួន ដូចបញ្ជាក់ក្នុងវីដេអូនៅផ្នែកខាងក្រោមនៃអត្ថបទនេះ។ នៅជាប់ជើងភ្នំ មានបង្កប់ល្អាងមួយ ដែលមានទឹកថ្លាឈ្វេង គឺល្អាងព្រះចន្ទ ដែលភ្ញៀវទេសចរអាចងូតទឹកលេងបានយ៉ាងសប្បាយ។ គោលដៅទេសចរណ៍មួយទៀត ដែលយើងមិនគួររំលង គឺការធ្វើដំណើរឡើងភ្នំ ដើម្បីមើលទេសភាពដ៏ស្រស់ត្រកាលពីលើអាកាស។
រមណីយដ្ឋានកំពង់ត្រាច
កំពង់ត្រាច ដែលជារមណីយដ្ឋានប្រវត្តិសាស្ត្រមួយស្ថិតក្នុងទឹកដីខេត្តកំពត ត្រង់ភូមិឃុំដំណាក់កន្ទួតខាងត្បូង ស្រុកកំពង់ត្រាច ដោយអ្នកខ្លះហៅ «ភ្នំកំពង់ត្រាច» ឯខ្លះទៀតហៅ «ភ្នំបាក់»។ តំបន់ទេសចរណ៍នេះ គឺជាស្រុកមួយដែលមានព្រំប្រទល់ជាប់ប្រទេសវៀតណាម។ នៅពេលលោកអ្នកធ្វើដំណើរពីខេត្តកំពតទៅស្រុកកំពង់ត្រាច លោកអ្នកនឹងបានឃើញជនបទស្រុកស្រែចម្ការ ដែលមានទេសភាពគួរជាទីគយគន់។
រមណីយដ្ឋាននេះក៏សម្បូរដោយប្រវត្តិជាច្រើនផងដែរ។ មានផ្លូវមួយខ្សែកាត់តាមតំបន់ភ្នំវល្លិ៍ ដែលជាអតីតតំបន់ខ្មែរក្រហម។ កាលពីឆ្នាំ១៩៩៤ មានជនបរទេសមួយចំនួន ត្រូវបានពួកខែ្មរក្រហមចាប់ធ្វើជាចំណាប់ខ្មាំងនៅតំបន់នេះផងដែរ។
នៅ អមសងខាងនៃទីវាលបាតភ្នំគេឃើញមានល្អាងជាច្រើនប្រកប ដោយរូបសំណាកសត្វ ឬឧបករណ៍ជាច្រើនប្រភេទកើតឡើង ដោយសារសំណឹកជាយូលង់របស់ផ្ទាំងថ្មធំៗ ហើយអ្នកទស្សនាទាំងឡាយអាចមើលសណ្ឋានកាត់យល់តាមការផ្គូផ្គង ពីសំណាក់មគ្គុទ្ទេសក៍ដែលរង់ចាំជូនដំណើរ ។
រមណីយដ្ឋានកំពង់ត្រាច
លោក សយ ស៊ីណុល ប្រធានមន្ទីរទេសចរណ៍ខេត្តកំពតបានរៀបរាប់ប្រាប់សារព័ត៌មានថា រមណីយដ្ឋានភ្នំកំពង់ត្រាច ឬភ្នំបាក់នេះ មានបរិមាត្រប្រមាណប្រហែល ៤ គីឡូម៉ែត្រ និងកម្ពស់ពី ១៥០ ទៅ ២០០ ម៉ែត្រ។ ទីតាំងនៃតំបន់ភ្នំនេះមានអំណោយផលល្អ សម្រាប់ការថតខ្សែភាពយន្តផ្សេងៗជាមួយនឹងទេសភាពស្រស់ត្រកាល ប្រកបដោយសោភ័ណភាពប្រណីតៗ ។
លោកបានបន្តថា ងាកមកខាងមុខផ្លូវចូលទៅក្នុងភ្នំវិញ មានវត្តមួយឈ្មោះថា វត្តគិរីសិលា ដែលតាជីយាយជី និងព្រះសង្ឃកំពុងគង់នៅដូចបណ្តាទីអារាមដទៃៗទៀតដែរ ។ ក្នុងភ្នំមានល្អាងជាច្រើនព័ទ្ធជុំវិញទីវាលមួយ ដែលទទួលពន្លឺព្រះអាទិត្យដ៏ភ្លឺចិញ្ចាច ហើយពេលភ្ញៀវទាំងឡាយងើបសម្លឹងមើលទៅលើឃើញផ្ទៃមេឃនៅកៀកបង្កើយ គ្របពីលើរាងជារង្វង់មូលដូចខ្ទះ ដែលធ្វើឲ្យអារម្មណ៍ហាក់នៅទីឋានមួយពោរពេញដោយភាពសុខដុមគ្មាន ពីរ។ នៅតាមល្អាងនីមួយៗមានសំណាកជារូប ឬឧបករណ៍ប្រើប្រាស់ផ្សេងៗ ដែលរូប និងឧបករណ៍ទាំងនោះពេលភ្ញៀវចូលទស្សនានឹងមានមគ្គុទេ្ទសក៍ ពន្យល់ប្រាប់តាមលំដាប់លំដោយយ៉ាងស្ទាត់ជំនាញ
រមណីយដ្ឋានកំពង់ត្រាច
ដើម្បីទៅដល់ កំពង់ត្រាច លោកអ្នកត្រូវធ្វើដំណើរតាមផ្លូវកែប បន្ទាប់មកបត់ឆ្វេងដោយកាត់តាមរូបសំណាកសេះស។ បច្ចុប្បន្ននេះ ផ្លូវទៅកាន់កំពង់ត្រាចត្រូវបានត្រូវបានជួសជុលនិងកែលម្អ ដើម្បីផ្តល់ភាពងាយស្រួលក្នុងការធ្វើដំណើរ។
រមណីយដ្ឋានកំពង់ត្រាច
កំពង់ត្រាចជា ទីប្រជុំជនដ៏តូចមួយ ប៉ុន្តែមានរមណីយដ្ឋានទេសចរណ៍ជាច្រើន។ នៅទីនោះ លោកអ្នកអាចទស្សនាល្អាងថ្មកំបោរ និងភ្នំមួយនៅក្បែរនោះផងដែរ។ កាលពីដើមឡើយ ទីនេះធ្លាប់ជាល្អាងមួយយ៉ាងធំនៅចំកណ្តាលភ្នំ ប៉ុន្តែក្រោយមកមានថ្មមួយផ្ទាំងយ៉ាងធំបាក់ហើយបិទកន្លែងនោះបាត់ ទៅ។ នៅក្នុងល្អាងភ្នំនោះ លោកអ្នកអាចឃើញទីសក្ការបូជា ដែលជាទីចាប់អារម្មណ៍បំផុត។ ពេលដែលលោកអ្នកទៅទស្សនាក្នុងគុហានេះ សូមកុំភ្លេចដាក់ពិលនិងទ្រនាប់ជើងទៅតាម។
ជាងនេះទៅទៀត លោកអ្នកអាចប្រទះភ្នែកឃើញអណ្តូងទឹកតូចៗនៅជើងភ្នំកំពង់ត្រាច។ អណ្តូងទឹកនេះ ជាទីគោរពសក្ការៈពីពលរដ្ឋខ្មែរ ចិននិងវៀតណាមក្នុងមូលដ្ឋាន។ អណ្តូងមួយមានវិជ្ជមាត្រប្រហែលជា៣០ម៉ែត្រ ហើយលោកអ្នកអាចឃើញដីប្រាំពីរពណ៌។ អណ្តូងតូចៗមានថ្ម ដែលមានរាងដូចសត្វផ្សេងៗ។ អណ្តូងដែលធំជាងគេ មានស្នាមភ្លោះមួយអាចទៅដល់វាលស្រែមួយរយ និងកន្លែងដទៃទៀតដូចជាអន្លុងថ្មដុះជាដើម។
ទិដ្ឋភាពមើលពីចម្ងាយទៅកាន់ភ្នំ កំពង់ត្រាច ដែលជាកន្លែងមានទេសភាពល្អប្លែកសម្រាប់ថតភាពយន្ត។
គួរបញ្ជាក់ផងដែរថា សម្រាប់ឆ្នាំ២០១៣កន្លងមកនេះ តាមស្ថិតិបានឲ្យដឹងថា មានភ្ញៀវទេសចរជាតិ២៧៨៥៦នាក់ និង បរទេស១៩៦៣នាក់បានធ្វើដំណើរទៅលេងកម្សាន្តនៅទីរមណីយដ្ឋានភ្នំ ប្រវត្តិសាស្ត្រភ្នំកំពង់ត្រាចនាទឹកដីខេត្តកំពត៕
(សរុបដោយ ហេង វុធ្ធី)
មតិពីមិត្តអ្នកអាន