អាជ្ញាធរខេត្តព្រះសីហនុគ្រោងនឹងបង្កើតផែនការមេដើម្បីអភិវឌ្ឍតំបន់ឆ្នេរនៅក្នុងខេត្តនេះជាពិសេសឆ្នេរខ្សាច់ថ្មីដែលមានទីតាំងពីកំពង់ផែស្វយ័តក្រុងព្រះសីហនុទៅកាន់តំបន់ថ្មីមួយដែលហៅថា «ឆ្នេរជំទាវម៉ៅ»។ នេះបើយោងតាមការឲ្យដឹងពីមន្ត្រីទេសចរណ៍ជាន់ខ្ពស់ខេត្តព្រះសីហនុ។
ផែនការមេដើម្បីអភិវឌ្ឍឆ្នេរសមុទ្រក្នុងខេត្តព្រះសីហនុ។
ប្រធានមន្ទីរទេសចរណ៍ ខេត្តព្រះសីហនុ លោក តាំង សុចិត្រគ្រឹស្នា បានថ្លែងថាឆ្នេរសមុទ្រភាគច្រើននៅក្នុងទីក្រុងគឺមានភាពកកកុញដែលជាបញ្ហាប្រឈមដល់ការអភិវឌ្ឍបន្ថែមទៀត។ឆ្នេរថ្មី ដែលមានឈ្មោះថា «ឆ្នេរជំទាវម៉ៅ» មានទំហំធំ ដូច្នេះ អាជ្ញាធរខេត្តអាចធ្វើការអភិវឌ្ឍបាន។
ទោះយ៉ាងណា លោក តាំង សុចិត្រគ្រឹស្នា មិនអាចផ្តល់ព័ត៌មានលម្អិតអំពីគម្រោងដែលនឹងត្រូវសាងសង់លើឆ្នេនេះនោះទេ។
លោក តាំង សុចិត្រគ្រឹស្នា បានបន្តឲ្យដឹងថា៖ «យើងកំពុងតែធ្វើការសិក្សាពីហេដ្ឋារចនាសម្ព័ន្ធដូចជាផ្លូវថ្នល់ បន្ទប់សម្រាក កន្លែងចតឡាន សួនច្បារ និងទីលានបាល់ទះនៅលើឆ្នេរក្នុងចំណោមកន្លែងផ្សេងៗទៀត។ នៅពេលដែលយើងបញ្ចប់ការសិក្សា យើងនឹងបញ្ជូនគម្រោងទៅកាន់ក្រុមប្រឹក្សាខេត្តព្រះសីហនុនិងគណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជាដើម្បីអនុម័ត។»
ក្នុងកិច្ចប្រជុំស្តីពីការអភិវឌ្ឍន៍តំបន់ឆ្នេរអូរត្រេះ២ ដោយមានការចូលរួមពីអ្នកពាក់ព័ន្ធក្នុងខេត្តលោក គួច ចំរើន អភិបាលខេត្តព្រះសីហនុបានមានប្រសាសន៍ថាខេត្តក៏នឹងរៀបចំសួនកម្សាន្តសម្រាប់ឆ្នេរអូរត្រេះ ២ សម្រាប់បម្រើដល់សាធារណជនផងដែរ។
គម្រោងសម្រាប់ឆ្នេរអូត្រេះ ២ ត្រូវបានរចនានិងសាងសង់ដោយក្រុមហ៊ុន Otres 2 Management Company។
គួរបញ្ជាក់ឲ្យដឹងផងដែរថា ឆ្នេរអូរត្រេះ ២ មានប្រវែង ១,៧៤៦ ម៉ែត្រ ខណៈដែលផែនការនេះគឺដើម្បីចូលរួមលើកស្ទួយមុខមាត់និងភាពស្រស់ស្អាតនៃតំបន់នេះដើម្បីទាក់ទាញភ្ញៀវទេសចរ បង្កើនសោភ័ណភាពឆ្នេរសាធារណៈ ការពារបរិស្ថាននិងសណ្តាប់ធ្នាប់សង្គម ផ្តល់អនាម័យល្អជំរុញសេវាកម្ម និងធ្វើឱ្យផលិតផលទេសចរណ៍មាននិរន្តរភាព។
លោក គួច ចំរើន បានមានប្រសាសន៍ឲ្យដឹងផងដែរថា ក្រុមហ៊ុននឹងរៀបចំកន្លែងចតរថយន្ត បង្កើតសួនច្វារ ដាំដើមឈើបន្ថែម រៀបចំផ្លូវសម្រាប់អ្នកថ្មើរជើង ដាក់កន្លែងអង្គុយ បង្គន់អនាម័យ កន្លែងហាត់ប្រាណតាមបែបធម្មជាតិលើឆ្នេរ សួនកុមារនិងរថយន្តលក់អាហារចល័ត។
លោក គួច ចំរើន បានបន្ថែមថា លោកក៏បានជំរុញក្រុមហ៊ុនឱ្យបន្តធ្វើការសិក្សាឆ្នេរផ្សេងៗទៀតពីកំពង់ផែស្វយ័តក្រុងព្រះសីហនុដល់ឆ្នេរជំទាវម៉ៅដែលមានចម្ងាយប្រហែល ១៥ គីឡូម៉ែត្រដើម្បីស្វែងរកគំនិតកែលម្អថ្មីៗនិងធ្វើឱ្យវាកាន់តែមានភាពងាយស្រួលសម្រាប់សាធារណជន។
លោកបានថ្លែងថា៖ «នៅពេលដែលយើងបាត់បង់ឆ្នេរ យើងនឹងបាត់បង់ភ្ញៀវទេសចរ។» លោកបានបន្ថែមទៀតថាតំបន់ឆ្នេរសមុទ្រត្រូវតែរៀបចំឱ្យបានត្រឹមត្រូវទាំងឆ្នេរខ្សាច់និងឆ្នេរដែលមានថ្ម។ប្រភេទសត្វបក្សីកម្រដូចជាសត្វក្ងោកនិងសត្វដទៃទៀតនឹងត្រូវបានណែនាំដើម្បីទាក់ទាញភ្ញៀវទេសចរ។
លោកបានមានប្រសាសន៍ថា៖ «មិនគួរគិតថ្លៃសេវាបន្ថែមសម្រាប់អ្នកទេសចរដែលយកតុ កៅអី និងកន្ទេលមកកាន់ឆ្នេរនោះទេ ព្រោះវាជាទីសាធារណៈ។ យើងត្រូវការអ្នកអភិវឌ្ឍន៍រួមគ្នាដើម្បីសម្អាតនិងថែរក្សាសោភ័ណភាពរបស់ឆ្នេរតាមរយៈការសំអាតយកកាកសំណល់ចេញ»។
យោងតាមមន្ទីរទេសចរណ៍ខេត្តព្រះសីហនុ ចាប់ពីខែមករាដល់ខែមេសា ភ្ញៀវអន្តរជាតិដែលមកកម្សាន្តនៅតាមឆ្នេរសមុទ្រខេត្តព្រះសីហនុស្ទើរតែមិនមានទាល់តែសោះ។
ខណៈដែលអ្នកដែលមកកាន់ខេត្តនេះគឺជាប្រជាពលដ្ឋក្នុងស្រុកឬភ្ញៀវទេសចរបរទេសដែលរស់នៅនិងធ្វើការនៅក្នុងប្រទេសកម្ពុជា។ ប៉ុន្តែ ចំនួននៃអ្នកមកលេងកម្សាន្តមានការកើនឡើងវិញនៅក្នុងខែនេះ។ ចំនួនភ្ញៀវទេសចរបរទេសមានចំនួន ១៦១.៧៥០ នាក់ ថយចុះ ១៨ ភាគរយបើធៀបនឹងឆ្នាំ ២០១៩ ៕
（ប្រភពព័ត៌មាន: khmertimeskh.com）
មតិពីមិត្តអ្នកអាន