ឃើញពណ៌លឿងឆើតឆាយ នៃផ្កាលឿងរាជ ធ្វើឱ្យចិត្តយើងរីករាយ រសាយក្តីនឿយហត់ពីការងារ ដ្បិតវារំឭកយើងពីពេលវេលាដ៏សប្បាយរីករាយនៃបុណ្យចូលឆ្នាំថ្មីប្រពៃណីជាតិ ដែលជិតឈានចូលមកដល់ ។ ក្នុងអំឡុងខែមេសាជារៀងរាល់ឆ្នាំ ផ្កាលឿងរាជនៅតាមដងវិថី តាមសួនច្បារ ឬនៅតាមទីសាធារណៈនានា រីកបង្អួតសម្រស់ស្រស់ប្រណីត ។
ផ្កាលឿងរាជ
លឿងរាជ ឬហៅម្យ៉ាងទៀតថា រាជព្រឹក្ស ។ ខណៈថ្ងៃបុណ្យចូលឆ្នាំថ្មី ដ៏គួរឱ្យរីករាយជិតឈានចូលមកដល់នេះ កោះសន្តិភាពសូមនាំអារម្មណ៍ប្រិយមិត្តអ្នកអានស្វែងយល់ពីដើមរាជព្រឹក្ស ។ រាជព្រឹក្ស ជាដើមឈើដែលគេសន្មតឱ្យឈ្មោះថា ស្តេចឈើ ឬឈើរបស់ស្តេច ឈើមានផ្កាល្អរុងរឿង ។
លឿងរាជ ច្រើនដុះជាលក្ខណៈធម្មជាតិនៅលើដីទួល ឬលើក្បាលដំបូក ។ ដោយសារសម្រស់ពណ៌លឿងឆើយឆាយនៃផ្កាលឿងរាជ ដូច្នេះគេនិយមដាំលម្អនៅទីសាធារណៈនានា ដូចជាដងវិថី សួនច្បារ និងវត្តអារាម ជាដើម ។
ផ្កាលឿងរាជ
លឿងរាជ មានកម្ពស់ចាប់ពី១០ ទៅ២០ម៉ែត្រ មានស្លឹក ធំៗ រាងជមស្រួច ។ ចំពោះផ្ការបស់ដើមឈើប្រភេទនេះ មានលក្ខណៈជាទងរំយោល ប្រវែងពី២០ ទៅ៤០សង្ទីម៉ែត្រ ។ ផ្កា នីមួយៗ មានសរសៃចំកណ្តាល៤ ទៅ៧សង្ទីម៉ែត្រ មានត្របកពណ៌លឿងចំនួន៥ ទំហំ ប៉ុនៗគ្នា ។ ផ្លែលឿងរាជ មានប្រវែងពី៣០ ទៅ៦២សង្ទីម៉ែត្រ និងទំហំ១,៥ ទៅ២,៥សង្ទីម៉ែត្រ ។ ក្រៅពីនៅប្រទេសកម្ពុជាយើង ដើមលឿងរាជភាគច្រើន មាននៅអាសុីខាងត្បូងនៃប្រទេសប៉ាគីស្ថាន រហូតដល់ឥណ្ឌា ភូមា និងស្រីលង្កា ។
ផ្កាលឿងរាជ
លឿងរាជ រីកលូតលាស់ល្អនៅកន្លែងវាលស្រឡះល្អ ហើយវាធន់នឹងអាកាសធាតុក្តៅ និងដីប្រៃ ប៉ុន្តែមិនធន់នឹងអាកាសធាតុត្រជាក់ខ្លាំងទេ ព្រោះអាចទៅជាដុះផ្សិត និងរោគស្លឹក ប្រហោងៗ ។
ក្នុងពេលដាំដំបូង ដើមលឿងរាជរីកលូតលាស់យឺត ប៉ុន្តែចាប់ពីអាយុ១ឆ្នាំ ដល់៣ឆ្នាំ វារីកលូតលាស់លឿន ។ ដើមឈើនេះមានសម្បកពណ៌ត្នោតរលោង ឫសកែវវែងពណ៌លឿង និងមានឫសខ្នែងច្រើន ។ នៅពេលមានអាយុពី៤ ទៅ៥ឆ្នាំ លឿងរាជ ចាប់ផ្តើមបង្ហាញភាពប្រណីតរុងរឿង គឺចេញផ្កាពណ៌លឿងខ្ចី ។
ផ្កាលឿងរាជតាមដងផ្លូវនានា
ក្រៅពីគុណប្រយោជន៍ផ្នែកសម្រស់ លឿងរាជមានប្រយោជន៍សម្រាប់សុខភាពមនុស្សយើងផងដែរ ។ ផ្លែលឿងរាជ ចាស់មានរសជាតិផ្អែម អាចយកទៅធ្វើជាថ្នាំព្យាបាលជំងឺទល់លាមក ។ វិធីប្រើ គឺយកផ្លែនេះដាក់ដាំទឹក និងដាក់អំបិលបន្តិច ហើយផឹកមុនពេលគេង ឬមុនពេលទទួលទានអាហារ ។ ចំណែកផ្កាលឿងរាជ ជួយបំបាត់ដំបៅរលួយ ។ ផ្កាលឿងរាជ ពណ៌លឿងស្រស់ញញឹម ហាក់អបអរសាទរបុណ្យចូលឆ្នាំថ្មីប្រពៃណីជាតិ យើង ។
ផ្កាលឿងរាជដែលដាំអមសងខាងផ្លូវកូម៉ៃ ចាប់ពីក្រោយស្តាតចាស់ ឆ្ពោះទៅប្រាសាទអង្គរវត្ត បានផ្តើមរីក និងបញ្ចេញសម្រស់គួរឱ្យគយគន់សម្រាប់អ្នកដំណើរ។ ផ្កានេះមានពណ៌លឿង និងរីកជាចង្កោមៗ វែងៗ ហើយក្នុងរដូវចេញផ្កានេះ វាមិនសូវមានស្លឹកប៉ុន្មានទេ៕
(សរុបដោយ ហេង វុធ្ធ)
មតិពីមិត្តអ្នកអាន