ទៅខេត្តកោះកុង កុំភ្លេចទៅលេង ចេតិយ ឃុនឆាង ឃុនផែន

ចេតិយ ឃុនឆាង ឃុនផែន

ចេតិយឃុនឆាង ឃុនផែន ស្ថិតនៅកណ្តាល នៃដៃសមុទ្រ ដែលមានជាប់ទាក់ទងទៅនឹងរឿងរ៉ាវបែបប្រវត្តិសាស្ត្រផងនោះ បានធ្វើឱ្យទេសចរទាំងឡាយមានចិត្តចង់ ទស្សនា និង ចង់ដឹងពីរឿងរ៉ាវប្រវត្តិសាស្រ្ត ខ្លះៗទាក់ទងនឹងទីនោះ ។

បើយើងធ្វើដំណើរចេញពីទីក្រុងខេមរៈ ភូមិន្ទឆ្ពោះទៅច្រកអន្តរជាតិខ្មែរ ថៃចាំយា ដោយឆ្លងកាត់ស្ពានលីយ៉ុងផាត់ ឆ្លងដៃ សមុទ្រនោះ ពេលទៅដល់ពាក់កណ្តាលស្ពាន ក្រឡេកមើលនៅផ្នែកខាងឆ្វេងដៃ យើងនឹងបានឃើញចេតិយដែលមានកំពូលស្រួច ផុសចេញកណ្តាលដៃសមុទ្រ ធ្វើឱ្យអ្នក ដំណើរទាំងឡាយមានចម្ងល់ និងចង់ទៅទស្សនានៅទីនោះតែម្តង។ អ្នកខ្លះទៅព្រោះតែចង់ដឹងពីរឿងរ៉ាវប្រវត្តិសាស្ត្រពីអតីតកាល និង អ្នកខ្លះទៀតទៅក្នុងនាមជាអ្នកទេសចរក៏មាន ។

ចេតិយឃុនឆាង ឃុនផែនស្ថិតនៅក្នុង ស្រុកមណ្ឌលសីមា គឺជាចេតិយ៍មួយស្ថិតនៅលើផ្ទាំងថ្មកណ្តាលដៃសមុទ្រ ដែល មានទីតាំងស្ថិតនៅចំពីមុខក្រុងខេមរភូមិន្ទ ខេត្តកោះកុងមានចម្ងាយ១គីឡូម៉ែត្រពីក្រុង។ ផ្ទាំងសិលាដែលចេតិយស្ថិតនៅនោះ មានបណ្តោយប្រហែល ២០ ម៉ែត្រ និងទទឹងប្រហែល ១០ ម៉ែត្រ និង មានសភាពជាផែនៗខ្ពស់ទាបត្រួតលើគ្នា និង មានទ្រនាប់ខ្សាច់នៃចេតិយ៣ម៉ែត្រ ឯតួចេតិយចាប់ពីចង្កេះឡើងទៅលើមានរាង មូលស្រួច មានក្បាច់ព័ទ្ធជុំវិញជាថ្នាក់ៗ បួនជាន់ និង មានកម្ពស់ប្រហែល៥ម៉ែត្រ ។

តួចេតិយទាំងមូលកសាងអំពីឥដ្ឋកំពូលកសាងអំពីឈើ ។ ឥដ្ឋដែលកសាង នោះមានបណ្តោយប្រហែល ០,៣០ ម៉ែត្រ និងទទឹងប្រហែល ០,១៥ ខាងក្រៅមាន បូកកំបោរពណ៌ស កំបោរនោះមានឃើញកម្ទេចសម្បកលៀស គ្រំដែលអាចឱ្យយល់ បានថា គេយកសម្បកលៀស គ្រំទៅដុត ធ្វើជាកំបោរ ដូចជាកំពែងស្រះសារពើយុត្តនៅឧដុង្គដែរ ។ ចេតិយនេះក៏មានរឿងរ៉ាវទាក់ទងនឹងប្រវត្តិ ឃុនឆាង ឃុនផែន ផង ដែរ ៕​

（ប្រភពព័ត៌មាន: popular.com.kh）