ខួបទី១៥៧នៃទិវាពិភពលោកកាកបាទក្រហម អឌ្ឍចន្ទក្រហម ដែលគ្រោងរៀបចំនៅថ្ងៃទី៨ខែឧសភាឆ្នាំ២០២០នេះ នឹងត្រូវផ្អាក ដោយសារតែស្ថានភាពនៃការឆ្លងរាលនៃជំងឺកូវីដ-១៩។
សម្តេច ប៊ុន រ៉ានី ប្រធានកាកបាទក្រហមកម្ពុជា។
សម្តេច ប៊ុន រ៉ានី ប្រធានកាកបាទក្រហមកម្ពុជាបានសរសេរលិខិតទូលអំពីសេចក្តីសម្រេចផ្អាកការរៀបចំទិវាពិភពលោកកាកបាទក្រហម អឌ្ឍចន្ទក្រហមនេះថ្វាយសម្តេចព្រះមហាក្សត្រី នរោត្តម មុនិនាថ សីហនុ។
នៅក្នុងព្រះរាជសារលិខិតឆ្លើយតបជូនសម្តេចប្រធានកាកបាទក្រហមកម្ពុជា ដែលសារព័ត៌មានថ្មីៗទទួលបាន សម្តេចព្រះមហាក្សត្រី នរោត្តម មុនិនាថ សីហនុ បានមានព្រះរាជបន្ទូលយ៉ាងដូច្នេះ៖«ខ្ញុំបានទទួលលិខិតចុះថ្ងៃទី៣ ខែមីនាឆ្នាំ២០២០ ស្តីអំពីការសម្រេចផ្អាកការប្រារព្ធមេទ្ទីងថ្នាក់ជាតិដើម្បីអបអរសាទរខួបទី១៥៧ ទិវាពិភពលោកកាកបាទក្រហម អឌ្ឍចន្ទក្រហម ដែលគ្រោងនឹងរៀបចំនៅថ្ងៃទី៨ខែឧសភាឆ្នាំ២០២ នៅទីស្នាក់ការកណ្តាលកាកបាទក្រហមកម្ពុជានៅក្នុងពេលដែលពិភពលោក ក៏ដូចព្រះរាជាណាចក្រកម្ពុជា កំពុងខិតខំប្រឹងប្រែងគ្រប់គ្រងផលប៉ះពាល់ពីជំងឺរលាកផ្លូវដង្ហើមធ្ងន់ធ្ងរ កូវីដ-១៩ មកលើសង្គម និងសេដ្ឋកិច្ចជាតិ។»។
បើយោងតាមព្រះរាជសារលិខិតរបស់សម្តេចម៉ែដដែល សម្តេច ប៊ុន រ៉ានី ប្រធានកាកបាទក្រហម បានបញ្ជាក់ទូលថ្វាយសម្តេចម៉ែ អំពីការបន្តរៀបចំកម្មវិធីសំដែងសិល្បៈ ដើម្បីអបអរសាទរព្រះរាជពិធីបុណ្យចម្រើនព្រះជន្មរបស់ព្រះអង្គដូចរៀងរាល់ឆ្នាំដដែល។ ថ្ងៃពិធីចម្រើនព្រះជន្មរបស់សម្តេចព្រះមហាក្សត្រី ព្រះវររាជមាតា គឺថ្ងៃទី១៨ខែមិថុនា។
(ប្រភពព័ត៌មាន: thmey thmey.com)
មតិពីមិត្តអ្នកអាន