សត្វត្មាតភ្លើងដែលជាប្រភេទរងគ្រោះជិតផុតពូជបំផុតនៅលើពិភពលោក ចំនួន ៣សំបុក ត្រូវបានក្រុមអ្នកអភិរក្សរបស់ក្រសួងបរិស្ថាន អង្គការWCS និងសហគមន៍ រកឃើញនៅក្នុងដែនជម្រកសត្វព្រៃឆែប នៃខេត្តព្រះវិហារ។ នេះបើតាមសេចក្តីប្រកាសព័ត៌មានរបស់អង្គការ WCS នៅថ្ងៃទី២៩ ខែមករានេះ។
សត្វត្មាតភ្លើង។ (ប្រភព៖ Wonders of the Mekong)
អង្គការ WCS បញ្ជាក់ថា ចំនួនសត្វត្មាតនៅលើសកលលោក មានការធ្លាក់ចុះខ្លាំងគួរឲ្យព្រួយបារម្ភ។ដោយឡែកនៅកម្ពុជា មានវត្តមានសត្វនេះ មិនដល់ ៥០ក្បាលឡើយ។ ការរកឃើញសំបុកនេះ គឺជាក្តីសង្ឃឹមដ៏ធំមួយដើម្បីអភិរក្សប្រភេទ នេះកុំឲ្យបាត់បង់នៅពេលខាងមុខដ៏ខ្លី។
សូមជម្រាបថា សត្វត្មាតនៅកម្ពុជាមានចំនួន ៣ប្រភេទ គឺត្មាតភ្លើង ត្មាតត្នោត និងត្មាតផេះ។ សត្វត្មាតទាំង៣ប្រភេទនេះ ស្ថិតនៅក្នុងបញ្ជីក្រហមរបស់អង្គការ IUCN ជាប្រភេទរងគ្រោះជិតផុតពូជបំផុតលើសកលលោក។ នៅក្នុងប្រទេសកម្ពុជា សត្វត្មាតទាំង៣ប្រភេទនេះមានចំនួន ២០០-៣០០ក្បាលប៉ុណ្ណោះ ដែលជាចំនួនច្រើនជាងគេបង្អស់នៅក្នុងតំបន់អាស៊ីអាគ្នេយ៍។
ការកើនឡើងនៃការបាត់បង់ព្រៃឈើ និងការផ្លាស់ប្តូរដីព្រៃតាមរយៈដីសម្បទានសេដ្ឋកិច្ច និងការកាប់ឆ្ការដីព្រៃ បានជះឥទ្ធិពលដល់ការបាត់បង់ទីជម្រកពងកូន និងកាត់បន្ថយប្រភេទសត្វជាចំណីរបស់ហ្វូងត្មាតផងដែរ។ សត្វត្មាតយ៉ាងតិចចំនួន៣០ក្បាលនៅក្នុងប្រទេសកម្ពុជា ត្រូវបានគេសម្លាប់នៅក្នុងរយៈពេល ៥ឆ្នាំចុងក្រោយនេះ ដោយសារការប្រើប្រាស់ថ្នាំពុលដាក់តាមត្រពាំងក្នុងព្រៃដើម្បីចាប់សត្វស្លាប និងថនិកសត្វ មាឌតូច។ បញ្ហានេះបានបង្កការគំរាមកំហែងដ៏ធ្ងន់ធ្ងរដល់ចំនួន សត្វត្មាតនៅកម្ពុជា។
លោក តាន់ សុផាន់ មន្ត្រីសម្របសម្រួលគម្រោងអភិរក្សសត្វត្មាត របស់អង្គការWCS ប្រចាំដែនជម្រកសត្វព្រៃឆែប បាននិយាយថា ត្មាតភ្លើងគឺជាប្រភេទដ៏កម្របំផុតនៅកម្ពុជា ហើយចំនួនរបស់ពួកវាមានតិចតួចណាស់នាពេលបច្ចុប្បន្ននេះ និងប្រឈមខ្ពស់នឹងការផុតពូជ។ ក្រៅពីកម្មវិធីការពារសំបុក អង្គការនេះ ក៏បានរៀបចំជាអាហារដ្ឋានត្មាតដើម្បីផ្តល់ចំណីឲ្យពួកវាជារៀងរាល់ខែផងដែរ៕
（សរុបដោយវិច្ឆិកា）
មតិពីមិត្តអ្នកអាន