ធម្មជាតិជាផ្កាកើតមកគឺសម្រាប់លម្អភពផែនដីយើងឱ្យមានភាពស្រស់បំព្រង ហើយក៏អាចធ្វើឱ្យយើងមានអារម្មណ៍ស្រស់ស្រាយនៅពេលផ្កាបញ្ចេញសម្រស់របស់វា ។ សម្រាប់អ្នកស្រឡាញ់ផ្កា ដឹងទេថាបើចង់ឃើញចម្កាផ្កាធំៗ ល្វឹងល្វើយប្រៀបដូចផ្ទាំងគំនូរគួរទៅទស្សនានៅទីណា? តស់! សូមមកស្គាល់ទាំងអស់គ្នាដូចខាងក្រោមនេះ៖
១. ចម្កាផ្កាពណ៌ស៊ីជម្ពូរដ៏ស្រស់បំព្រងនៅស្រុកបន្ទាយស្រី
ប្រសិនបើប្រិយមិត្តបានធ្វើដំណើរកម្សាន្តទៅកាន់ស្រុកបន្ទាយស្រី ខេត្តសៀមរាប កុំភ្លេចចូលថតរូបនៅចម្កាផ្កា នៅឃុំឃុនរាម ពិតជាស្រស់ស្អាតក្រៃលែង ។ អ្វីដែលអំណោយផលនាំឱ្យទីនោះ រំលេចទេសភាពកាន់តែស្រស់ត្រកាលប្រៀបដូចជាផ្ទាំងគំនូរនោះ គឺហ៊ុមព័ទ្ធដោយព្រៃភ្នំបង្កើនសម្រស់ឱ្យកាន់តែទាក់ទាញថែមទៀត ។ សួនផ្កាថ្មីនេះស្ថិតនៅក្នុងឃុំឃុនរាម ស្រុកបន្ទាយស្រី ខេត្តសៀមរាប ដោយធ្វើដំណើរហួស រមណីយដ្ឋានក្បាលស្ពាន បន្តិចហើយមានដីឡូតិ៍មួយកន្លែងខាងឆ្វេងដៃ ដល់ហើយ ។
២.ចម្ការផ្កាឈូករ័ត្ន និងស្បៃរឿងនៅខេត្តត្បូងឃ្មុំ
ចម្ការផ្កាឈូករ័ត្ន និងស្បៃរឿងដែលស្ថិតនៅក្នុងឃុំជីរោទ៍ទី១ ស្រុកត្បូងឃុំ ខេត្តត្បូងឃ្មុំ ចាប់ផ្ដើមដល់រដូវរីកជាថ្មីម្ដងទៀត បង្អួតសម្រស់យ៉ាងស្រស់បំព្រងនៅលើផ្ទៃដីជាង ៥ហិកតា ។
ចម្ការផ្ដាដ៏ល្វឹងល្វើយនេះ បានក្លាយជាទីកន្លែងដ៏ទាក់ទាញបំផុតសម្រាប់យុវវ័យ និងភ្ញៀវទេសចរទូទៅឱ្យទៅថតរូបលេងកម្សាន្ត និងគយគន់សម្រស់ផ្កា ចោលក្លិនក្រអូបភាយធ្វើឱ្យរំសាយអស់នូវរាល់ទុកកង្វល់ ។ ដោយសារការដាំយ៉ាងមានរបៀបរៀបរយ បានរំលេចឱ្យចេញជាទេសភាពដូចក្នុងរូបគំនូរ ធ្វើឱ្យយុវជនប្រុសស្រី ក្មេងចាស់ នាំគ្នាទៅទស្សនាភ្លូកទឹកភ្លូកដី ។
ផ្កាឈូករ័ត្នធំៗពណ៌លឿងខ្ចីកំពុងរីកយ៉ាងធំៗ ដំណាលគ្នានឹងផ្កាស្បៃរឿងកំពុងក្រពុំពេញទីបានធ្វើឱ្យទេសភាពនៅទីនោះស្អាតរកថាមិនត្រូវ ថតរូបមិនចេះជិនណាយ ។ ដោយឡែកដើម្បីអាចចូលទស្សនាចម្កាផ្កាដ៏ស្រស់ស្អាតនេះ មិនតម្រូវឱ្យទិញសំបុត្រចូលទស្សនាអ្វីឡើយ គ្រាន់តែបង់ថ្លៃម៉ូតូ ១០០០រៀល និងរថយន្ត ៣០០០រៀល ។
ដើម្បីអាចទៅដល់ទីនោះ ប្រិយមិត្តត្រូវធ្វើដំណើរចុះពីស្ពានគីហ្សូណាត្រើយខាងកើតតាមផ្លូវបេតុងចម្ងាយ៦គីឡូម៉ែត្រ ជិតដល់វត្តជីរោទ៍បត់ស្ដាំដៃបន្តិច នឹងទៅដល់ទីនោះហើយ ។
៣.ចម្កាផ្កាលឿងនៅកំពង់ស្ពឺ
ចំណែកឯចម្កាផ្កាលឿង ដែលអ្នកស្រុកហៅថាផ្កាចង្ក្រងផ្កា នៅតាមផ្លូវទៅទឹកជ្រោះជ្រាវ ក្នុងភូមិអូរដា ឃុំអមលាំង ស្រុកថ្ពង ខេត្តកំពង់ស្ពឺ បានក្លាយជាទីតាំងដ៏ពេញនិយមបំផុតទាក់ទាញទេសចររាប់ពាន់នាក់ឱ្យទៅទស្សនាកម្សាន្ត ។ រដូវនេះផ្កាលឿងនេះចាប់ផ្ដើមរីកទៀតហើយ បញ្ចេញសម្រស់យ៉ាងស្រស់ស្អាតលាតសន្ធឹងជាប់ជើងភ្នំ ពិតជាស្អាតរកអ្វីប្រៀបប្រដូចមិនបាន ។ ចំណែកឯផ្លូវធ្វើដំណើរទៅទីនោះ ក៏ងាយស្រួលធ្វើដំណើរ មានចម្ងាយប្រមាណ ៥០គីឡូម៉ែត្រប៉ុណ្ណោះពីទីរួមខេត្ត ៕
(ប្រភពព័ត៌មាន: popular.com.kh)
មតិពីមិត្តអ្នកអាន