កម្ពុជាបានកំណត់យកខែមិថុនា ឆ្នាំ២០២៣ ជាថ្ងៃរៀបចំការប្រកួតកីឡាជនមានពិការភាពប្រចាំតំបន់អាស៊ីអាគ្នេយ៍ ASEA Para Games 2023។ ការកំណត់នេះ ធ្វើឡើងក្នុងកិច្ចប្រជុំបូកសរុបការងារប្រចាំឆមាសទី១ និងលើកទិសដៅអនុវត្តបន្តរបស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍កម្ពុជា(CAMSOC)កាលពីពេលថ្មីៗ។
សម្តេច ទៀ បាញ់ ពេលចូលរួមកិច្ចប្រជុំបូកសរុបឆមាសទី១របស់ CAMSOC កន្លងមក។ (រូបថត៖ CAMSOC)
សម្តេច ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC បានឯកភាពយកថ្ងៃទី១ ដល់ថ្ងៃទី១០ មិថុនា ឆ្នាំ២០២៣ ដើម្បីរៀបចំការប្រកួតកីឡា ASEAN Para Games 2023 លើកទី១២ ដែលកម្ពុជាធ្វើជាម្ចាស់ផ្ទះ។ ពោលគឺ១៥ថ្ងៃបន្ទាប់ពីការរៀបចំព្រឹត្តិការណ៍កីឡា SEA Games លើកទី៣២ ដែលធ្វើឡើងចាប់ពីថ្ងៃទី៥-១៧ ខែឧសភា ឆ្នាំ២០២៣។
ការកំណត់យកកាលបរិច្ឆេទខាងលើ ធ្វើឡើងក្នុងកិច្ចប្រជុំបូកសរុបការងារប្រចាំឆមាសទី១ និងដាក់ផែនការយុទ្ធអនុវត្តសម្រាប់ឆមាសទី២របស់គណៈកម្មការ CAMSOC តាមសំណើររបស់លោក យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា។
CAMSOC ដែលទទួលបន្ទុករៀបចំការប្រកួតកីឡា ASEAN Para Games ផងនោះ មិនទាន់កំណត់ពីចំនួនប្រភេទកីឡាដែលត្រូវដាក់ឲ្យប្រកួតប្រជែងក្នុងព្រឹត្តិការណ៍នេះនៅឡើយទេ។ ប៉ុន្តែបើតាមលោក យី វាសនា កម្ពុជាគ្រោងដាក់កីឡាចន្លោះពី១៦ទៅ១៧ប្រភេទកីឡាឲ្យប្រកួតប្រជែង។
សូមរំលឹកថា ព្រឹត្តិការណ៍កីឡាជនពិការប្រចាំតំបន់អាស៊ីអាគ្នេយ៍ ASEAN Para Games លើកទី ១០ ដែលគ្រោងធ្វើនៅប្រទេសហ្វីលីពីន ត្រូវបានក្រុមប្រឹក្សាភិបាល និងសមាជិកនៃគណៈកម្មាធិការប៉ារ៉ាឡាំពិកអាស៊ីអាគេ្នយ៍ ឯកភាពគ្នាលុបចោលហើយ ដោយសារវិបត្តិជំងឺកូវីដ-១៩ (Covidi-19)។
ការសម្រេចលុបចោលព្រឹត្តិការណ៍ ២ឆ្នាំម្ដងនេះ បន្ទាប់ពីមានកិច្ចប្រជុំបន្ទាន់មួយកាលពីចុងសប្ដាហ៍មុន ដោយមានការចូលរួមទាំងអស់ ពីសមាជិកគណៈកម្មាធិការប៉ារ៉ាឡាំពិកអាស៊ីអាគេ្នយ៍ ដើម្បីពិភាក្សាគ្នា ក្រោយម្ចាស់ផ្ទះហ្វីលីពីន បានស្នើលុបចោលព្រឹត្តិការណ៍នេះ។ ជាលទ្ធផលសមាជិកទាំងអស់ បានឯកភាពគ្នាតាមសំណើម្ចាស់ផ្ទះ ដ្បិតប្រទេសនីមួយៗសុទ្ធតែមានការព្រួយបារម្ភពីបញ្ហាកូវីដ-១៩ ដូចគ្នា។ នេះបើតាមការឲ្យដឹងពីលោក យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា./.
(បូកសរុបដោយឌីណា)
មតិពីមិត្តអ្នកអាន