អភិបាលរាជធានីភ្នំពេញ ឱ្យដឹងថា គិតចាប់តាំងពីផ្ទុះឡើងនូវព្រឹត្តិការណ៍សហគមន៍២០កុម្ភៈមក មានមនុស្សជាង ១០ ០០០ នាក់ហើយ ត្រូវបានអាជ្ញាធរនិងគ្រូពេទ្យយកសំណាកទៅធ្វើតេស្តនិងដាក់ឱ្យធ្វើចត្តាឡីស័ក។
មនុស្សជាង១ម៉ឺននាក់នៅភ្នំពេញត្រូវបានយកសំណាកនិងដាក់ឱ្យធ្វើចត្តាឡីស័ក
អភិបាលរាជធានីភ្នំពេញ លោក ឃួង ស្រេង ប្រាប់ វីអូឌី នៅថ្ងៃនេះថា អាជ្ញាធរបានរកឃើញទីតាំងចំនួន៧៤កន្លែង និងមនុស្សជាង១០ ០០០នាក់ ដែលមានជាប់ពាក់ព័ន្ធនឹងអ្នកឆ្លងជំងឺកូវីដ១៩ នៅក្នុងព្រឹត្តិការណ៍សហគមន៍២០កុម្ភៈ ដែលត្រូវតម្រូវឱ្យធ្វើចត្តាឡីស័ក ខណៈទីតាំងដែលពាក់ព័ន្ធត្រូវបានអាជ្ញាធរបិទជាបណ្តោះអាសន្ន និងយកធ្វើជាកន្លែងសម្រាប់ធ្វើចត្តាឡីស័កតែម្តង។
លោកបញ្ជាក់ថា មូលហេតុដែលអាជ្ញាធរយកទីតាំងផ្ទះនិងសណ្ឋាគារដែលមានជាប់ពាក់ព័ន្ធនឹងករណីឆ្លងក្នុងសហគមន៍នេះ ទៅធ្វើជាទីតាំងមណ្ឌលចត្តាឡីស័ក គឺដើម្បីផ្ដល់ភាពងាយស្រួលដល់ពួកគេ និងកាត់បន្ថយហានិភ័យឆ្លងដល់អ្នកដទៃទៀត។ លោកថា៖ «នៅពេលគណៈកម្មការឱ្យគាត់ធ្វើចត្តាឡីស័ក គណៈកម្មការកូវីដ១៩មិនបានឱ្យគាត់ធ្វើដំណើរទៅតំបន់ប្រមូលផ្ដុំណាមួយទេ ចៀសវាងគាត់ជួបគ្នាជាមួយអ្នកដទៃដែលធ្វើចត្តាឡីស័ក។ អ៊ីចឹងទេ បានជាយើងទុកឱ្យគាត់ធ្វើចត្ដាឡីស័កតាមអគារឬសណ្ឋាគារដែលគាត់ស្នាក់នៅតែម្ដង នេះជាគោលនយោបាយកាត់បន្ថយហានិភ័យ»។
លោក ឃួង ស្រេង បានបន្ថែមថា ចំពោះមនុស្សជាង១០ ០០០នាក់ដែលជាប់ពាក់ព័ន្ធនឹងព្រឹត្តិការណ៍២០កុម្ភៈនេះ អាជ្ញាធរនិងក្រុមគ្រូពេទ្យនឹងយកសំណាករបស់ពួកគាត់ទៅធ្វើតេស្តជាលើកទី២ ចាប់ពីថ្ងៃទី៣ ខែមីនា ឆ្នាំ២០២១ ស្អែកនេះទៅ។
បើតាមអភិបាលរាជធានីភ្នំពេញរូបនេះ បច្ចុប្បន្ន ទីតាំងព្យាបាលអ្នកជំងឺកូវីដ១៩ ក្នុងរាជធានីភ្នំពេញ មានចំនួន៤កន្លែង ក្នុងនោះមានមណ្ឌលសុខភាពចាក់អង្រែលើ មជ្ឈមណ្ឌលជាតិកំចាត់រោគរបេងនិងហង់សិន មន្ទីរពេទ្យមិត្តភាពខ្មែរ-សូវៀត និងមណ្ឌលចត្តាឡីស័កភ្នំពេញ។លោកបន្ថែមថា៖ «យើងក៏ត្រៀមមណ្ឌលសុខភាពផ្សេងៗទៀត បើសិនជាមានផ្ទុះច្រើនឬក៏អ្នកផ្ទុកវីរុសនេះច្រើន។ យើងអាចរកមណ្ឌលសុខភាពផ្សេងៗទៀតដែលយើងបានតៀមរួចហើយ»។
ពាក់ព័ន្ធនឹងករណីឆ្លងជំងឺកូវីដ១៩ក្នុងសហគមន៍នេះដែរ កាលពីថ្ងៃម្សិលមិញ ក្រសួងសុខាភិបាលក៏បានអំពាវនាវដល់ប្រជាពលរដ្ឋដែលបានទៅផ្សារម៉ាក្រូ រាជធានីភ្នំពេញ នៅថ្ងៃទី២០ ខែកុម្ភៈ ឆ្នាំ២០២១ ចន្លោះពីម៉ោង៥និង៤១នាទី ដល់ម៉ោង៦និង៤៨នាទីល្ងាច ទៅធ្វើតេស្តរកវីរុសកូវីដ១៩ផងដែរ ប្រសិនបើមានរោគសញ្ញាសង្ស័យ ខណៈក្រសួងរកឃើញថា មានអ្នកជំងឺកូវីដ១៩ម្នាក់បានចូលផ្សារនោះ។
ចំណែកអ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ មានប្រសាសន៍ថា គិតត្រឹមថ្ងៃនេះ អាជ្ញាធរបានបិទទីតាំងចំនួន៣២កន្លែង ក្នុងនោះមានសណ្ឋាគារ ភោជនីយដ្ឋាន អគារស្នាក់នៅរួម ផ្សារទំនើប និងមន្ទីរពេទ្យឯកជន ក្រោយរកឃើញថា មានការពាក់ព័ន្ធនឹងអ្នកជំងឺកូវីដ-១៩។
（ប្រភពព័ត៌មាន: vodkhmer）
