យុគសម័យ - នៅក្នុងឱកាសបុណ្យចូលឆ្នំាប្រពៃណីវៀតណាម ឆ្នាំ២០១៩ ក្នុងរយៈពេល៣ថ្ងៃ (ពោលគឺពីថ្ងៃទី៥ដល់ថ្ងៃទី៧ខែកុម្ភៈ) មានភ្ញៀវទេសចរជាតិនិងអន្តរជាតិជាច្រើនបានមកកម្សាន្តនៅតាមរមណីយដ្ឋានធម្មជាតិ និងប្រាសាទបុរាណនានានៅក្នុងខេត្តសៀមរាប។
យោងតាមរបាយការណ៍របស់មន្ទីរទេសចរណ៍ខេត្តសៀមរាបបានបង្ហាញថា នៅក្នុងថ្ងៃបុណ្យចូលឆ្នាំប្រពៃណីវៀតណាម ឆ្នាំ២០១៩នេះ មានភ្ញៀវទេសចរមកកម្សាន្តនៅខេត្តសៀមរាប ប្រមាណ៩៣.៦០៥ នាក់ មានការកើនឡើង ៣.៩៨ភាគរយ បើប្រៀបធៀបរយៈពេលដូចគ្នាកាលពីឆ្នាំ២០១៨ ដែលមានចំនួនប្រមាណ ៩០.៨២៦នាក់ ។ ក្នុងនោះ ភ្ញៀវទេសចរអន្តរជាតិមាន ចំនួន៤១.៦០៥ នាក់ គឺមានការកើនឡើង២២.២៧ភាគរយ; ភ្ញៀវទេសចរជាតិ មានចំនួន ប្រមាណ៥២.០០០នាក់ មានការថយចុះ ៧.១៤ភាគរយ បើប្រៀបធៀបរយៈពេលដូចគ្នាកាលពីឆ្នាំ២០១៨ ពោលគឺចំនួនប្រមាណ ៥៦.០០០នាក់ ។
ក្នុងពេលជាមួយគ្នានោះ ភ្ញៀវទេសចរមកទស្សនានៅខេត្តមណ្ឌលគិរីក្នុងឱកាសបុណ្យចូលឆ្នាំថ្មីប្រពៃណីវៀតណាមក៏មានការកើនឡើងផងដែរ។ ពោលគឺ ក្នុងរយៈពេល៣ថ្ងៃ ខេត្តមណ្ឌលគិរីទទួលបានភ្ញៀវទេសចរជាត អន្តរជាតិជិត ២ម៉ឺននាក់ ដែលបានមកលេងកម្សាន្ត ដោយចំនួននេះ នៅបានកើនឡើង ១២,៤២ភាគរយ បើធៀបនឹងរយៈពេលដូចគ្នាកាលពីឆ្នាំមុន។
យោងតាម លោក ងិន សុវិមាន ប្រធានមន្ទីរទេសចរណ៍ខេត្តមណ្ឌលគិរី បានឱ្យដឹងថា កត្តាដែលទាក់ទាញភ្ញៀវទេសចរមកលេងកម្សាន្តក្នុងខេត្តមណ្ឌលគិរីកាន់តែច្រើនឡើងបែបនេះ ដោយសារតែខេត្តមណ្ឌលគិរីជាខេត្តមួយដែលមានសក្កានុពលធម្មជាតិល្អប្រសើរ ដូចជាអាកាសធាតុត្រជាក់ វិសាលភាពព្រៃភ្នំ និងមានរមណីយដ្ឋានស្អាតៗជាច្រើន ជាពិសេសនោះខេត្តមួយនេះ បានរឹតបន្តឹងនូវសន្តិសុខ សុវត្ថិភាពជូនភ្ញៀវទេសចរជាតិ-អន្តរជាតិ បានយ៉ាងល្អប្រសើរ មានប្រព័ន្ធផ្លូវថ្នល់ល្អងាយស្រួលក្នុងការធ្វើដំណើរ។
លោកប្រធានមន្ទីរទេសចរណ៍ខេត្តមណ្ឌលគិរីបានបន្តថា ភ្ញៀវទេសចរដែលមកកម្សាន្តនៅខេត្តមណ្ឌលគិរី តែងតែទៅលេងកម្សាន្តនៅរមណីយដ្ឋានទឹកជ្រោះប៊ូស្រា រមណីយដ្ឋានវប្បធម៌ភ្នំដោះក្រមុំ ដែលជាទីសក្ការ:របស់បងប្អូនជនជាតិដើមភាគតិច ដើម្បីបួងសួង សុំសេចក្តីសុខ និងទៅទស្សនារមណីយដ្ឋានសមុទ្រឈើមើលទេសភាព និងស្រូបយកខ្យល់អាកាសបរិសុទ្ធផងដែរ។
សូមបញ្ជាក់ថា គិតត្រឹមរយៈពេល០៣ថ្ងៃ នៃឱកាសបុណ្យចូលឆ្នាំប្រពៃណីវៀតណាម ខេត្តមណ្ឌលគិរី មានភ្ញៀវទេសចរមកលេងកម្សាន្តចំនួន ១៩.៥២៨នាក់ ក្នុងនោះភ្ញៀវទេសចរជាតិមានចំនួន ១៩.២១៦នាក់ ភ្ញៀវទេសចរអន្តរជាតិមានចំនួន ៣១២នាក់ បើធៀបរយៈពេលដូចគ្នាកាលពីឆ្នាំ២០១៨ សម្រាប់ភ្ញៀវទេសចរសរុប ១៧.៣៧០នាក់ ក្នុងនោះភ្ញៀវទេសចរជាតិមានចំនួន១៧.១០៥នាក់ ភ្ញៀវទេសចរអន្តរជាតិ២៦៥នាក់ មានការកើនឡើងសរុប ១២,៤២ភាគរយ ភ្ញៀវទេសចរជាតិកើន ១២,៣៤ភាគរយ ភ្ញៀវទេសចរអន្តរជាតិកើន ១៧,៧៣ភាគរយ៕
（ប្រភពព័ត៌មាន: akp.gov.kh សរុបព័ត៌មានដោយស្រី ពេជ្រ）
