យុគសម័យ - ព្រះករុណា សម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពង់បំផុត ព្រះអង្គបានសព្វព្រះរាជហឫទ័យ ស្ដេចយាងជាព្រះរាជាអធិបតី ភាព ក្នុងថ្ងៃទីមួយ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលត្រូវបានគណៈកម្មាធិការជាតិរៀបចំបុណ្យជាតិ និងអន្តរជាតិ ប្រារព្ធធ្វើឡើងនាថ្ងៃពុធ ទី ២១ ខែ វិច្ឆិកា ឆ្នាំ២០១៨ នៅព្រះពន្លាជ័យ ខាងមុខព្រះបរមរាជវាំង។
យាងនិងអញ្ជើញចូលរួមក្នុងព្រះរាជពិធីនោះដែរ មានវត្តមាន សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា សម្ដេចអគ្គមហាពញាចក្រី ហេង សំរិន ប្រធានរដ្ឋសភា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ព្រមទាំងសមាជិក សមាជិកាព្រឹទ្ធសភា រដ្ឋសភា រាជរដ្ឋាភិបាល មន្ត្រីរាជការ នាម៉ឺនសព្វមុខមន្ត្រី រាជវង្សានុវង្ស ឧត្ដមទីប្រឹក្សាព្រះមហាក្សត្រ អង្គទូតនៃបណ្ដាប្រទេសជាមិត្តប្រចាំនៅព្រះរាជាណាចក្រកម្ពុជា ភ្ញៀវជាតិ-អន្តរជាតិ និងប្រជាពលរដ្ឋមកពីបណ្ដាខេត្ត និងរាជធានីយ៉ាងច្រើនកុះករ។
បន្ទាប់ពីការប្រកួតពេញមួយថ្ងៃ ដោយធ្វើការផ្លាស់ប្ដូរខ្សែទឹកក្នុង និងក្រៅរួចមក នៅ រាត្រីថ្ងៃដដែលនេះដែរ ជាមួយនឹងការសម្ដែងព្រះទ័យទុកដាក់អបអរសាទរចំពោះកីឡាករ កីឡាការិនី ដែលបានចូលរួមក្នុងការប្រណាំងទូកថ្ងៃទីមួយនេះមក ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា ព្រះអង្គ បានសព្វព្រះរាជហឫទ័យ ស្ដេចយាងប្រទានភ្លើងទៀនជ័យ លើប្រទីបព្រះបរមរាជវាំង ដើម្បីឱ្យប្រទីបដែលមកពីស្ថាប័នចំនួន១៥ទៀត ចាប់ផ្ដើមចេញដំណើរបណ្ដែតឡើងតាមដង ទន្លេ សាប ពីត្បូងទៅជើង ដែលអមដោយពិធីអុជកាំជ្រួច អបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅថ្ងៃទីមួយនេះផងដែរ។ ទន្ទឹមនឹងនេះដែរ នៅ រាត្រីថ្ងៃទីមួយនៃព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុកនេះដែរ ក៏មានការសម្ដែងសិល្បៈ និងការប្រគំតន្ត្រីជូនប្រជាពលរដ្ឋទស្សនាកម្សាន្តនៅតាមទីធ្លាសាធារណៈ មួយចំនួនទៀតដែរ។
ដោយឡែកនៅលើបណ្ដាញទំនាក់ទំនងសង្គមផ្លូវការរបស់សម្ដេចតេជោនាយករដ្ឋ មន្ត្រី ថ្ងៃទី២១ ខែវិច្ឆិកា ឆ្នាំ២០១៨ ក៏បានសរសេរថា អបអរសាទរ និងសប្បាយរីករាយក្នុង ថ្ងៃទី១ នៃព្រះរាជពិធីបុណ្យអុំទូក ហើយពិធីប្រណាំងទូក ង គឺបានចាប់ផ្តើមតាំងពីម៉ោង ១១:០០ ព្រឹកមកម៉្លេះនៅមុខព្រះបរមរាជវាំង។ សម្ដេចតេជោបានលើកឡើងថា នៅពេលនេះ ធាតុអាកាសនៅមាត់ទន្លេអំណោយផល មេឃស្រឡះល្អ ហើយនៅពេលនេះដែរគឺបងប្អូន ប្រជាពលរដ្ឋកំពុងធ្វើដំណើរមកចូលរួមទស្សនាការប្រណាំងទូកកាន់តែច្រើនឡើងៗ ក្នុងនោះ រួមទាំងភ្ញៀវទេសចរបរទេសផងដែរ។ នៅពេលនេះដែរ គឺមានវត្តមានមន្ត្រីជាន់ខ្ពស់ ដែលជាសមាជិកព្រឹទ្ធសភា រដ្ឋសភា រាជរដ្ឋភិបាល ភ្ញៀវជាតិ និងភ្ញៀវអន្តរជាតិ យ៉ាងច្រើនកុះ ករ កំពុងរង់ចាំព្រះរាជវត្តមានដ៏ខ្ពង់ខ្ពស់បំផុតរបស់ ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដែលនឹងយាងទតការប្រណាំងទូកងថ្ងៃដំបូង នៅក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅរសៀលនេះផងដែរ។
ក្រៅពីកម្មវិធីប្រណាំងទូក បងប្អូនប្រជាពលរដ្ឋអាចចូលរួមទស្សនាកម្សាន្តការប្រគំតន្រ្តី និងទស្សនាការតាំងពិព័រណ៍និងទិញទំនិញនៅតាមស្តង់ជាច្រើនដែលបានរៀបចំនៅកោះពេជ្រ សួនច្បារមុខវត្តបុទុម ត្រើយម្ខាងស្ពានជ្រោយចង្វារ នាពេលល្ងាចផងដែរ។ ក្នុងនោះ បងប្អូនអាចនាំកូនចៅតូចៗមកកម្សាន្តនៅកន្លែងសួនកុមារកោះពេជ្រផងដែរ។ សម្ដេចតេជោក៏សូមអរគុណដល់អាជ្ញាធរ សមត្ថកិច្ចគ្រប់ជាន់ថ្នាក់ដែលបានយកចិត្តទុក ដាក់ខ្ពស់ ក្នុងការថែរក្សាសន្តិសុខ សណ្តាប់ធ្នាប់ឱ្យបានល្អ ដើម្បីប្រជាពលរដ្ឋ និងទេសចរ បរទេសមានឱកាសបានសប្បាយរីករាយនៅក្នុងពិធីបុណ្យអុំទូក ទាំងនៅក្នុងរាជធានីភ្នំពេញ និងតាមបណ្តាខេត្តនានា។
គួរបញ្ជាក់ដែរថា ព្រះរាជពិធីបុណ្យអុំទូក បណ្តែតប្រទីបនិងសំពះព្រះខែ អកអំបុក នឹង ប្រព្រឹត្តទៅមានរយៈពេលបីថ្ងៃ គឺចាប់ផ្តើមពីថ្ងៃ ១៤-១៥កើត និង១រោច ខែកក្តិក ត្រូវនឹងថ្ងៃទី ២១-២៣ ខែវិច្ឆិកា ឆ្នាំ២០១៨ នៅតាមដងទន្លេសាប និងទន្លេចតុមុខ នៅខាងមុខព្រះបរមរាជ វាំង។ ព្រះរាជពិធីបុណ្យអុំទូកឆ្នាំ២០១៨នេះ មានទូក ង ចូលរួមប្រកួត ចំនួន២៩៨ទូក ខណៈឆ្នាំ២០១៧ មានទូក ង ត្រឹមតែ២៧០ទូក និងមានកីឡាករ កីឡាការិនីជិត២ម៉ឺននាក់។ សម្រាប់ប្រទីបវិញមានចំនួន១៥ កើនលើសពីឆ្នាំមុន៕
（យោងតាម http://akpnews.info）
