ព្រឹកថ្ងៃទី២៨ខែមិថុនាឆ្នាំ២០១៩នេះ គណបក្សប្រជាជនកម្ពុជាបានប្រារព្ធខួបទី ៦៨ នៃការបង្កើតគណបក្សប្រជាជនកម្ពុជា(២៨ មិថុនា ១៩៥១-២៨ មិថុនា ២០១៩ ) ដោយមានសមាជិកចូលរួមប្រមាណបីម៉ឺននាក់។ព្រឹត្តិការណ៍ដ៏ធំនេះប្រព្រឹត្តទៅទៅក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជានិងជាប្រធានគណបក្សប្រជាជនកម្ពុជា ។ នេះបើតាមការបញ្ជាក់របស់លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជា។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
តាមកម្មវិធីគ្រោងទុក សមាជិក សមាជិកាបក្ស និងអ្នកគាំទ្រគណបក្សប្រជាជនកម្ពុជាជួបជុំគ្នាពីព្រលឹមដើម្បីរង់ចាំទទួលស្វាគមន៍ថ្នាក់ដឹកនាំគណបក្សប្រជាជនកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ប្រមុខគណបក្ស ,សម្តេចអគ្គមហាពញាចក្រី ហេង សំរិន ប្រធានកិត្តិយសគណបក្ស ,សម្តេចវិបុលសេនាភក្តី សាយ ឈុំ ,សម្តេចក្រឡាហោម ស ខេង អនុប្រធានគណបក្សនិងមន្ត្រីជាន់ខ្ពស់គណបក្ស ។ ក៏មានវត្តមានបណ្តាអង្គទូតប្រទេសជាមិត្តប្រចាំនៅកម្ពុជាចូលរួមផងដែរ។
តាមកម្មវិធីគ្រោងទុក អង្គពិធីបានចាប់ផ្តើមនៅម៉ោង ៧ គត់ ។អង្គមិទ្ទីងចាប់ផ្តើមជាមួយសំឡេងជយឃោស និងស្នូរទះដៃ ។ បន្ទាប់ពីព្រះសង្ឃស្វាធ្យាយន៍ជយន្តោ ពិធីគោរពភ្លេងជាតិ និងភ្លេងបក្ស និងការច្រៀងបទនគររាជរួចមកក៏មានពីធីសម្ដែងសិល្បៈរបាំអមដោយបទចម្រៀងសម្រាប់ខួប ៦៨ នៃថ្ងៃបង្កើតគណបក្សប្រជាជនកម្ពុជា ។ សម្តេចតេជោហ៊ុន សែន ថ្លែងនូវសុន្ទរកថាដ៏មានសារសំខាន់ទៅកាន់អ្នកចូលរួមនិងប្រជាជនក្នុងនិងក្រៅប្រទេស។ លោក ឈឹម ផលវរុណ បានបញ្ជាក់ថា គណបក្សប្រជាជនកម្ពុជាទទួលស្គាល់ប្រវត្តិសាស្ត្រពិតគឺថាគណបក្សត្រូវបានបង្កើតឡើងរួមជាមួយនឹងបក្សកុម្មុយនីស្តវៀតណាមនិងគណបក្សប្រជាជនបដិវត្តន៍ឡាវដើម្បីប្រឆាំងនឹងអាណានិគមន៍បារាំងកាលពីឆ្នាំ១៩៥១។ ប៉ុន្តែក្រោយពេលប្រទេសទាំងបីបានទទួលឯករាជ្យរៀងៗខ្លួនគណបក្សទាំងបី ត្រូវបានផ្ដាច់ចេញពីគ្នានិងមានស្វ័យភាពរៀងៗខ្លួន ។ គណបក្សប្រជាជនកម្ពុជាឆ្លងកាត់ព្យុះភ្លៀងជាច្រើន ប៉ុន្តែទទួលបានជោគជ័យរួមមានការចូលរួមរំដោះកម្ពុជាពីអាណានិគមបារាំង ចក្រពត្តិអាម៉េរិក និង ការផ្ដួលរំលំរបបខ្មែរក្រហម ។
រយៈពេលជាង ៤០ ឆ្នាំ នៃសករាជថ្មីនេះគណបក្សប្រជាជនកម្ពុជា បានដឹកនាំក្នុងការការពារជាតិ និងការស្តារ កសាងប្រទេសឡើងវិញពីលេខសូន្យនៅក្នុងស្ថានភាពមានសន្តិភាពផងនិងសង្គ្រាមផងហើយ ថែមទាំងត្រូវគេហ៊ុមព័ទ្ធខាងនយោបាយ និងសេដ្ឋកិច្ចពីខាងក្រៅយ៉ាងអមនុស្សធម៌ និងអយុត្តិធម៌ថែមទៀត។ ទោះបីត្រូវឆ្លងកាត់នូវឧបសគ្គធំៗនិងការលំបាករាប់ម៉ឺនជំពូកយ៉ាងណាក៏ដោយក៏គណបក្សប្រជាជនកម្ពុជាបានរក្សាការពារនូវបុព្វហេតុដ៏ត្រឹមត្រូវរបស់ខ្លួនជានិច្ចដោយបានទប់ស្កាត់មិនឲ្យរបបប្រល័យពូជសាសន៍ដ៏យង់ឃ្នងអាចវិលត្រឡប់មកវិញ ការពារនូវការរស់ឡើងវិញរបស់ប្រជាជាតិ , បាននាំមកជូនប្រជាជនវិញនូវសិទ្ធិ សេរីភាព លទ្ធិប្រជាធិបតេយ្យ កិត្តិយសនិងសេចក្តីថ្លៃថ្នូរដែលត្រូវបាត់បង់ទាំងស្រុងក្នុងរបបប៉ុលពត, បានស្តារនិងកសាងវិស័យសេដ្ឋកិច្ចសង្គមកិច្ចឲ្យមានការប្រែប្រួលនិងរីកចម្រើនជាបន្តបន្ទាប់ ធ្វើឲ្យជីវភាពរស់នៅរបស់ប្រជាជនមានស្ថិរភាពជាជំហានៗ៕
（ប្រភព៖ rasmeinews.com សរុបដោយហេង វុធ្ធី）
（ប្រភពព័ត៌មាន: rasmeinews.com）
មតិពីមិត្តអ្នកអាន