ប្រមុខការទូតអាមេរិកប្រចាំកម្ពុជាបានអះអាងថា សហរដ្ឋអាមេរិកនឹងផ្តល់ហិរញ្ញប្បទានដែលមានអត្រាការប្រាក់ទាបបន្ថែមទៀតដល់កម្ពុជា ជាពិសេសសហគ្រាសធុនតូច និងមធ្យមក្នុងការជួយស្តារសេដ្ឋកិច្ចដែលរងផលប៉ះពាល់ដោយសារវិបត្តិនៃជំងឺកូវីដ ១៩។
លោក Patrick Murphy ឯកអគ្គរដ្ឋទូតអាមេរិកប្រចាំកម្ពុជា និងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងជំនួបពិភាក្សាកាលពីថ្ងៃពុធ។ រូបថត ក្រសួងសេដ្ឋកិច្ច
សេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃពុធ បានឲ្យដឹងថា ការអះអាងរបស់លោក Patrick Murphy ឯកអគ្គរដ្ឋទូតអាមេរិកប្រចាំកម្ពុជាត្រូវបានធ្វើឡើងនៅក្នុងជំនួបពិភាក្សាជាមួយ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅទីស្តីការក្រសួងសេដ្ឋកិច្ច។
ក្នុងជំនួបនេះ លោក Murphy បានថ្លែងថា សាជីវកម្មហិរញ្ញវត្ថុសម្រាប់ការអភិវឌ្ឍអន្តរជាតិ (DFC) របស់សហរដ្ឋអាមេរិក នឹងផ្តល់ហិរញ្ញប្បទានដែលមានអត្រាការប្រាក់ទាបដល់វិស័យឯកជននៅកម្ពុជា ពិសេសសហគ្រាសធុនតូច និងមធ្យម (SMEs) ដើម្បីកាត់បន្ថយបន្ទុកនៃការលំបាកក្នុងអំឡុងពេលប្រឈមនឹងវិបត្តិនៃជំងឺកូវីដ លោកថ្លែងថា៖ «ដោយមើលឃើញពីបរិស្ថានវិនិយោគនៅកម្ពុជាមានភាពទាក់ទាញ ហើយអ្នកវិនិយោគអាមេរិកជាច្រើនកំពុងមានចំណាប់អារម្មណ៍ដាក់ទុនវិនិយោគនៅកម្ពុជា ដូច្នេះអាមេរិកនឹងលើកទឹកចិត្តឱ្យអ្នកវិនិយោគអាមេរិកឱ្យមកវិនិយោគនៅកម្ពុជាក្នុងគោលបំណង ដើម្បីពង្រីកទំហំពាណិជ្ជកម្មទ្វេភាគីរវាងប្រទេសទាំង ២ រួមចំណែកជួយដល់ជីវភាពរបស់ប្រជាជនកម្ពុជា»។
តាមរយៈសេចក្តីប្រកាសព័ត៌មាន លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងថា ការផ្តល់់ហិរញ្ញប្បទានរបស់អាមេរិកបានរួមចំណែកដល់ការអភិវឌ្ឍនៅកម្ពុជា ពិសេសក្នុងវិស័យសុខាភិបាល អប់រំ កសិកម្ម បរិស្ថាន និងអភិបាលកិច្ច។ លោកថ្លែងថា៖ «សហរដ្ឋអាមេរិក ក៏ដូចដៃគូអភិវឌ្ឍន៍ដទៃទៀតបានរួមចំណែកយ៉ាងសកម្មជាមួយរដ្ឋាភិបាលកម្ពុជាក្នុងការប្រយុទ្ធប្រឆាំងនឹងជំងឺកូវីដ ១៩»។
លោកបន្តថា សព្វថ្ងៃរដ្ឋាភិបាលកម្ពុជាកំពុងអនុវត្តវិធានការអន្តរាគមន៍សំដៅរក្សាលំនឹងសេដ្ឋកិច្ច សង្គម និងការជំរុញសេដ្ឋកិច្ចឡើងវិញ។ ទន្ទឹមនឹងនេះ រដ្ឋាភិបាលនឹងប្រែក្លាយបញ្ហាប្រឈមនៃវិបត្តិជំងឺកូវីដ ១៩ ទៅជាកាលានុវត្តភាពក្នុងការធ្វើកំណែទម្រង់ និងត្រៀមខ្លួនសម្រាប់ការបើកសេដ្ឋកិច្ចឡើងវិញ។ លោកបញ្ជាក់ថា៖ «កិច្ចសហប្រតិបត្តិការពាណិជ្ជកម្ម និងវិនិយោគរវាងប្រទេសទាំង ២ បានដំណើរការយ៉ាងរលូន និងប្រកបដោយវឌ្ឍនភាពគួរឱ្យកត់សម្គាល់»។
សេចក្តីប្រកាសព័ត៌មានរបស់ DFC ឱ្យដឹងថា កាលពីខែមិថុនា ឆ្នាំនេះ ក្រុមប្រឹក្សាភិបាលរបស់ DFC បានអនុម័តនូវទឹកប្រាក់វិនិយោគ ១ ពាន់លានដុល្លារ ក្នុងការអភិវឌ្ឍពិភពលោក។ ស្ថានទូតអាមេរិកប្រចាំកម្ពុជាបានប្រាប់ភ្នំពេញ ប៉ុស្តិ៍ កាលពីថ្ងៃម្សិលមិញថា DFC និង សាជីវកម្មវិនិយោគឯកជនក្រៅប្រទេស (OPIC) បានផ្តល់ហិរញ្ញប្បទានចំនួន ១៥០ លានដុល្លារ ដល់កម្ពុជាជាពិសេសសម្រាប់ប្រជាជនដែលមានឱកាសតិចតួចទទួលបានសេវាហិរញ្ញវត្ថុនិង SMEs។ DFC ឱ្យដឹងថា គម្រោងនេះផ្តោតជាពិសេសទៅលើផលប៉ះពាល់នៃការអភិវឌ្ឍ ដោយជិត ៦០ ភាគរយ នៃការវិនិយោគនៅក្នុងប្រទេសដែលមានប្រាក់ចំណូលទាប និងមធ្យម។
អាមេរិក គឺជាទីផ្សារនាំចេញឈានមុខគេរបស់កម្ពុជា ដោយការនាំចេញកាលពីឆ្នាំ ២០១៩ មានតម្លៃជិត ៥,៤ ពាន់លានដុល្លារ កើនឡើងពី ៣ ពាន់លានដុល្លារ កាលពីឆ្នាំ ២០១៥។ អាមេរិកបានផ្ដល់ឱ្យកម្ពុជានូវភាពអនុគ្រោះពាណិជ្ជកម្មស្ថិតក្រោមប្រព័ន្ធ GSP ដែលផ្ដល់លទ្ធភាពឱ្យកម្ពុជាអាចនាំទំនិញចូលទៅទីផ្សារខ្លួនដោយរួចពន្ធសម្រាប់ផលិតផលជាង ៥ ០០០ មុខ។ ទំនិញធ្វើដំណើរជិត ១ ពាន់លានដុល្លារ ត្រូវបាននាំចេញទៅអាមេរិកកាលពីឆ្នាំ ២០១៩ ដោយស្ថិតក្រោមប្រព័ន្ធ GSP នេះ៕
（សរុបដោយ ហេង វុធ្ធ）
（ប្រភពព័ត៌មាន: postkhmer និង cen）
មតិពីមិត្តអ្នកអាន