សហរដ្ឋអាមេរិកតាមរយៈទីភ្នាក់ងារជំនួយអាម៉េរិក(USAID)បានផ្តល់ជំនួយមនុស្សធម៌បន្ថែមចំនួន ៦០០ ០០០ ដុល្លាអាម៉េរិក សម្រាប់ជួយដល់ការខិតខំក្នុងការឆ្លើយតបនឹងគ្រោះ ទឹកជំនន់នៅកម្ពុជា បណ្តាលមកពីព្យុះត្រូពិកដែលមានជាបន្តបន្ទាប់គ្នា និងភ្លៀងខ្លាំងដែលមានរយៈពេលយូរតាំងពីដើមខែតុលា ឆ្នាំ២០២០កន្លងមក។ នេះបើតាមសេចក្ដី ប្រកាសព័ត៌មានរបស់ស្ថានទូតអាម៉េរិកប្រចាំនៅកម្ពុជាក្នុងកម្មវិធីផ្ដល់ជំនួយបន្ថែមនេះ បានធ្វើឡើងកាលពីព្រឹកថ្ងៃទី២៤ ខែវិច្ឆិកា ឆ្នាំ២០២០ ដោយឯកឧត្ដម ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា W. Patrick Murphy បានមានប្រសាសន៍ថា “យើងមានការអាណិតដោយមានប្រជាជនកម្ពុជាដែលងាយរងគ្រោះ ជាច្រើនមានការខ្វះខាតដោយសារតែគ្រោះទឹកជំនន់នៅឆ្នាំនេះ។
សហរដ្ឋអាមេរិកផ្តល់ជំនួយបន្ថែមចំនួន៦០ម៉ឺនដុល្លារ ដើម្បីឆ្លើយតបទៅនឹងគ្រោះទឹកជំនន់នៅកម្ពុជា
សហរដ្ឋអាមេរិក នឹងផ្តល់ជំនួយសង្គ្រោះជាបន្ថែមក្នុងស្មារតីសាមគ្គីភាពជាមួយសហគមន៍ដែលរងគ្រោះដោយគ្រោះ ទឹកជំនន់ទាំងនេះ”។ ឯកឧត្ដម ឯកអគ្គរដ្ឋទូតបានបន្ដថា ជាមួយនឹងថវិកាបន្ថែមនេះការិយាល័យផ្តល់ជំនួយមនុស្សធម៌របស់ទីភ្នាក់ងារ ជំនួយអាម៉េរិក USAID នឹងជួយដល់អង្គការកម្មវិធីស្បៀងអាហារពិភពលោក(WFP) ក្នុងការផ្តល់ជំនួយក្នុងគ្រាបន្ទាន់ដើម្បីជួយគ្រួសារចំនួន ៣ ៧២៥ គ្រួសារ ដែលរងផលប៉ះពាល់ដើម្បីឱ្យគេទិញស្បៀងអាហារ។ ឯកឧត្ដមបានបន្ថែមថា ជំនួយនេះ បានបន្ថែមទៅលើទឹកប្រាក់ចំនួន ១០០ ០០០ ដុល្លារ ដែលទីភ្នាក់ងារ USAID បានផ្តល់ឱ្យដំបូងដល់អង្គការ WFP បន្ទាប់ពីមានគ្រោះទឹកជំនន់ភ្លាមសម្រាប់ជួយក្នុងការចែកចាយស្បៀងជាបន្ទាន់ដល់គ្រួសារចំនួនជាង ២ ៥៦០ គ្រួសារនៅក្នុងតំបន់ដែលរងគ្រោះខ្លាំងជាងគេក្នុងខេត្តពោធិ៍សាត់។
លោកស្រី Claire Conan តំណាងអង្គការស្បៀងអាហារពិភពលោក(WFP) បានគូសបញ្ជាក់ថា “យើងសូមអរគុណដល់ទីភ្នាក់ងារ USAID ចំពោះជំនួយបន្ថែមនេះសម្រាប់គ្រួសារខ្សត់ខ្សោយដែលរងគ្រោះដោយទឹកជំនន់។ ជំនួយនេះមានសារៈសំខាន់ណាស់សម្រាប់ស្តារស្ថានភាពរបស់គេពិសេសដោយពួកគេជាច្រើនក៏រងគ្រោះផងដែរដោយសារបញ្ហាជំងឺរាតត្បាតជាសកល។ អង្គការ WFP នឹងធ្វើការជិតស្និទ្ធជាមួយរដ្ឋាភិបាលនិងដៃគូនៅក្នុងដំណាក់កាលថ្មីនេះនៃការឆ្លើយតបនឹងគ្រោះទឹកជំនន់”។ ក្រៅពីនេះទៀតជាមួយ នឹងជំនួយរបស់ទីភ្នាក់ងារ USAID អង្គការ WFP បានជួយពង្រឹងប្រព័ន្ធព័ត៌មានលើការគ្រប់គ្រងគ្រោះមហន្តរាយថ្នាក់ជាតិរបស់គណៈកម្មាធិការជាតិគ្រប់គ្រងគ្រោះមហន្តរាយ។ ចំពោះការជួយនេះបានរួមចំណែកធ្វើឱ្យគណៈកម្មាធិការជាតិគ្រប់គ្រងគ្រោះមហន្ដរាយ អាចតាមដានហានិភ័យនិងផលប៉ះពាល់នៅពេលមានគ្រោះទឹកជំនន់ ហើយអាច កៀរគរធនធានបានឆាប់រហ័ស សម្រាប់ធ្វើការឆ្លើយតបនៅតាមតំបន់ដែលរងផលប៉ះពាល់។
លោកស្រីបានលើកឡើងថា ដោយមានជំនួយរបស់ទីភ្នាក់ងារ USAID អង្គការ WFP បានជួយដល់វេទិកាឆ្លើយតបមនុស្សធម៌ដោយជួយធ្វើការសម្របសម្រួលការឆ្លើយតបនឹងគ្រោះទឹកជំនន់នៅក្នុងវិស័យនានា ហើយធ្វើសេចក្តីរាយការណ៍អំពីស្ថានភាពទឹកជំនន់នៅក្នុងពេលមានវិបត្តិកើតឡើង។
សូមបញ្ជាក់ផងដែរថា តាំងពីឆ្នាំ២០០០មក ទីភ្នាក់ងារ USAID បានផ្តល់ថវិកាចំនួនជិត១៣លានដុល្លារ ជាជំនួយសម្រាប់កាត់បន្ថយហានិភ័យសម្រាប់ការត្រៀមបម្រុងនិងសម្រាប់ការឆ្លើយតបនឹងគ្រោះមហន្តរាយនៅកម្ពុជា។ ក្នុងឆ្នាំ២០២០នេះ សហរដ្ឋអាមេរិក កំពុងធ្វើការរម្លឹកខួបលើកទី៧០នៃការបង្កើតទំនាក់ទំនងការទូតរវាងប្រទេសទាំងពីរ៕
（ប្រភពព័ត៌មាន: AKP）
មតិពីមិត្តអ្នកអាន