ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាព្រឹកថ្ងៃទី ២២ខែកក្កដាឆ្នាំ២០១៩នេះ បានសម្ដែងប្រតិកម្មភ្លាមៗ តបជាមួយការផ្សព្វផ្សាយព័ត៌មានស្តីអំពីកម្ពុជាចុះហត្ថលេខាជាសម្ងាត់ជាមួយចិនប្រើប្រាស់មូលដ្ឋានយោធា។ សម្តេចតេជោនាយករដ្ឋមន្ត្រី បានចាត់ទុកថាព័ត៌មាននេះគឺជាព័ត៌មានប្រឌិតដ៏អាក្រក់បំផុតប្រឆាំងជាមួយកម្ពុជា ។
សម្តេចតេជោ ហ៊ុន សែន (រូបថត៖ rasmeinews.com)
សម្តេចតេជោ ហ៊ុន សែន បានផ្តល់កិច្ចសម្ភាសន៍ជាមួយអង្គភាពព័ត៌មាន Fresh News នាព្រឹកថ្ងៃទី២២ ខែកក្កដាឆ្នាំ២០១៩ ជាមួយខ្លឹមសារថា «នេះជាព័ត៌មានប្រឌិតដ៏អាក្រក់បំផុតប្រឆាំងជាមួយកម្ពុជា ។ គ្មានរឿងបែបនេះកើតឡើងនោះទេព្រោះមូលដ្ឋានយោធាបរទេសវាបានប្រឆាំងនឹងរដ្ឋធម្មនុញ្ញរបស់កម្ពុជា»។
ប្រតិកម្មរបស់សម្តេចតេជោហ៊ុន សែន ធ្វើឡើងបន្ទាប់ពីសារព័ត៌មានបរទេសមួយចំនួន ព្រមទាំងសារព័ត៌មាន VOA បានចេញផ្សាយដកស្រង់តាមសារព័ត៌មាន The Wall Street Journal ថា៖ «ប្រទេសចិនបានចុះហត្ថលេខាលើកិច្ចព្រមព្រៀងជាសម្ងាត់មួយដើម្បីអនុញ្ញាតឲ្យកងទ័ពរបស់ខ្លួនប្រើប្រាស់មូលដ្ឋានទ័ពជើងទឹកកម្ពុជា។ កិច្ចព្រមព្រៀងនោះគឺកម្ពុជាផ្តល់ឲ្យភាគីចិននូវសិទ្ធិផ្តាច់មុខធ្វើជាមូលដ្ឋានទាហានជើងទឹកចិនជាផ្នែកមួយនៅឈូងសមុទ្រខ្មែរ ហើយនៅជិតព្រលានយន្តហោះធំមួយដែលកសាងដោយចិននឹងអនុញ្ញាតឲ្យចិនប្រើជាមូលដ្ឋានយោធារយៈពេល៣០ឆ្នាំ ដាក់ទ័ព ដាក់គ្រឿងសព្វាវុធ កន្លែងចតជាដើម»។
សម្តេចតេជោហ៊ុន សែន មានប្រសាសន៍ដោយភាពច្បាស់លាស់បន្តថា៖ «តើកម្ពុជាត្រូវការវត្តមានយោធាចិនលើទឹកដីរបស់ខ្លួនដើម្បីអ្វី? យើងមិនដែលបានពិភាក្សាណាមួយជាមួយមេដឹកនាំចិននោះឡើយ កុំថាឡើយដល់មានចុះហត្ថលេខាលើកិច្ចព្រមព្រៀង។ល្មមឈប់ប្រើព័ត៌មានក្លែងបន្លំអំពីវត្តមានកងទ័ពចិនលើទឹកដីកម្ពុជាដើម្បីប្រឆាំងនឹងយើងហើយ»។
គួរជម្រាបជូនដែរថា កន្លងមកសម្តេចតេជោហ៊ុន សែន ព្រមទាំងមន្ត្រីយោធាកំពូលៗរបស់កម្ពុជាធ្លាប់បានចេញសេចក្តីប្រកាសបដិសេធជាសាធារណៈច្រើនដងរួចហើយថា ៖ កម្ពុជាមិនមានការចាំបាច់ដើម្បីនឹងរំលោភលើរដ្ឋធម្មនុញ្ញរបស់ខ្លួនទេ។រដ្ឋធម្មនុញ្ញរបស់កម្ពុជាដែលចែងថាកម្ពុជាមិនអនុញ្ញាតឲ្យមានវត្តមានកងទ័ពបរទេសលើទឹកដីកម្ពុជាទេ ហើយកម្ពុជាក៏មិនអនុញ្ញាតឲ្យកងទ័ពរបស់ខ្លួនមានវត្តមានលើទឹកដីបរទេសដែរ ក្រៅពីការចូលរួមបេសកកម្មរបស់អង្គការសហប្រជាជាតិ។តើកម្ពុជាត្រូវការកងទ័ពបរទេសនៅ លើទឹកដីរបស់ខ្លួនដើម្បីអ្វីទៅ? តើកម្ពុជាត្រូវការច្បាំងជាមួយអ្នកណា? កម្ពុជាមានកម្លាំងគ្រប់គ្រាន់ដើម្បីការពារឯករាជ្យ អធិបតេយ្យភាពរបស់ខ្លួនរួចទៅហើយ។មិនមានការចាំបាច់ដើម្បីដាក់កងទ័ពបរទេសមកជំនួយទេ។ប្រសិនបើមានការត្រូវការណាមួយនោះក៏គ្មានការចាំបាច់ដើម្បីនឹងត្រូវអន្តរាគមន៍ដោយកងទ័ពបរទេសទេ។សម្តេចតេជោនាយករដ្ឋមន្ត្រីថ្លែងថា កម្ពុជានឹងមិនមែនជាទីលានសាកល្បងមនោគមន៍វិជ្ជាឬអាវុធនោះទេ ។ យើងបដិសេធដាច់ខាតការប្រកួតប្រជែងខាងមនោគមន៍វិជ្ជាដើម្បីបំបែកបំបាក់ខ្មែរ និងសម្លាប់ខ្មែរដូចកាលពីអតីតកាល។ យើងទាត់ចោលដាច់ខាតនូវការប្រកួតប្រជែងយកកម្ពុជាធ្វើជាទីលានសាកល្បងអាវុធរបស់ខ្លួនឬលក់អាវុធរបស់ខ្លួនមកឲ្យកម្ពុជា ៕
（យោងតាម rasmeinews.com សរុបដោយហេង វុធ្ធី）
មតិពីមិត្តអ្នកអាន