តាមប្រភពព័ត៌មានពីក្រសួងការពារជាតិបានឱ្យដឹងថា ក្នុងឱកាសអញ្ជើញចូលរួមក្នុងកិច្ចប្រជុំរដ្ឋមន្ត្រីការពារជាតិអាស៊ានលើកទី១៣ នៅទីក្រុងបាងកក ប្រទេសថៃ កាលពីរសៀលថ្ងៃទី១១ ខែកក្កដា ឆ្នាំ២០១៩ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា បានជួបពិភាក្សាការងារជាមួយ ឯកឧត្តម យ៉ាមីហ្ស៊ាដ យ៉ាគូឌូ រដ្ឋមន្ត្រីការពារជាតិ នៃសាធារណរដ្ឋឥណ្ឌូណេស៊ី។ ក្នុងជំនួបនាឱកាសនោះ រដ្ឋមន្ត្រីក្រសួងការពារជាតិនៃប្រទេសទាំងពីរ បានរម្លឹកឡើងវិញពីអនុស្សាវរីយ៍ ដែលកងទ័ពឥណ្ឌូណេស៊ីបានមកបំពេញបេសកកម្មថែរក្សាសន្តិភាព ក្នុងក្របខ័ណ្ឌអង្គការសហប្រជាជាតិ ដែលកងទ័ពឥណ្ឌូណេស៊ី បានបោះទីតាំងនៅក្នុងខេត្តកំពង់ធំ។
ឯកឧត្តម យ៉ាមីហ្ស៊ាដ យ៉ាគូឌូ រដ្ឋមន្ត្រីការពារជាតិ នៃសាធារណរដ្ឋឥណ្ឌូណេស៊ី និង សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា
សម្ដេចពិជ័យសេនា ទៀ បាញ់ បានបញ្ជាក់ថា ប្រជាជនខេត្តកំពង់ធំបានចងចាំ អំពីការបំពេញភារកិច្ចអន្តរជាតិរបស់កងទ័ពឥណ្ឌូណេស៊ីនៅលើទឹកដីខេត្តកំពង់ធំ។ សម្ដេចពិជ័យសេនា ទៀ បាញ់ បានថ្លែងអំណរគុណ ដល់កងទ័ពឥណ្ឌូណេស៊ី ដែលនៅតែបន្តជួយបណ្តុះបណ្តាលដល់កងយោធពលខេមរភូមិន្តជាបន្តបន្ទាប់ ដូចជានៅបញ្ជាការដ្ឋានអង្គរក្ស និងកងពលទ័ពពិសេសឆត្រយោងលេខ៩១១។
សម្ដេចបានបញ្ជាក់ថា ក្នុងដំណើរទស្សនកិច្ចរបស់រដ្ឋមន្ត្រីការពារជាតិឥណ្ឌូណេស៊ី ទៅកម្ពុជាលើកនេះ នឹងនាំមកនូវមនោសញ្ជេតនាមិត្តភាព និងទំនាក់ទំនង កិច្ចសហប្រតិបត្តិការ ល្អប្រសើរ រវាងកងទ័ព និងប្រជាជន នៃប្រទេសទាំងពីរកម្ពុជា និងឥណ្ឌូណេស៊ី។
ឯកឧត្តមរដ្ឋមន្ត្រីក្រសួងការពារជាតិឥណ្ឌូណេស៊ីបានបញ្ជាក់ថា ក្នុងដំណើរទស្សនកិច្ចទៅកាន់ប្រទេសកម្ពុជា ជាពិសេសនៅខេត្តកំពង់ធំនាពេលខាងមុខនេះ គឺដើម្បីរម្លឹកឡើងវិញនូវអនុស្សាវរីយ៍កាលពីឆ្នាំ១៩៩២ ដែលកងទ័ពឥណ្ឌូណេស៊ីបានបំពេញភារកិច្ចថែរក្សាសន្តិភាព ក្នុងក្របខ័ណ្ឌកងកម្លាំងរក្សាសន្តិភាពរបស់អង្គការសហប្រជាជាតិ ក្នុងខេត្តកំពង់ធំ។
ឯកឧត្តមរដ្ឋមន្ត្រីក្រសួងការពារជាតិឥណ្ឌូណេស៊ីបានបញ្ជាក់ថាទំនាក់ទំនងកិច្ចសហប្រតិបត្តិការរវាងកងទ័ពនៃប្រទេសទាំងពីរកម្ពុជា - ឥណ្ឌូណេស៊ីមានភាពល្អប្រសើរ
ឯកឧត្តមបានបញ្ជាក់ថា ក្នុងអំឡុងពេលបំពេញបេសកកម្មនៅកំពង់ធំ កងទ័ពឥណ្ឌូណេស៊ី បានចូលរួមចរចារំដោះចំណាប់ខ្មាំង កម្លាំងអ៊ុនតាក់ចំនួន៩នាក់ ដែលត្រូវបានអតីតក្រុមខ្មែរក្រហមចាប់ឃាត់ខ្លួន ក្នុងភូមិសាស្ត្រខេត្តកំពង់ធំ។
ឯកឧត្តមបានសង្កត់ធ្ងន់ថា ទំនាក់ទំនងកិច្ចសហប្រតិបត្តិការ រវាងកងទ័ព នៃប្រទេសទាំងពីរ កម្ពុជា-ឥណ្ឌូណេស៊ី មានភាពល្អប្រសើរ ហើយដំណើរទស្សនកិច្ចទៅកាន់កម្ពុជាលើកនេះ និងទទួលបានលទ្ធផលល្អ៕
(យោងតាម akp និង freshnewsasia សរុបដោយវិច្ឆិកា)
មតិពីមិត្តអ្នកអាន