លោក Lin Zhi Qiang នាយកក្រុមហ៊ុន Q-Port Investments (Cambodia) Co Ltd ថ្លែងថា ឧស្សាហកម្មកាត់ដេរនៅកម្ពុជាគួរតែផ្លាស់ប្តូរធ្វើឲ្យមានលក្ខណៈចម្រុះ ដោយសន្សឹមៗងាកទៅផលិតសម្លៀកបំពាក់ដែលមានតម្លៃមធ្យម និងការលក់រាយ។
គំរូមជ្ឈមណ្ឌល E-Port Center ដ៏ស្រស់ស្អាត។
ក្រុមហ៊ុន Q-Port Investments គឺជាក្រុមហ៊ុនបុត្រសម្ព័ន្ធនៃក្រុមហ៊ុន E-Port Enterprise (HK) Co Ltd ដែលមានមូលដ្ឋាននៅហុងកុង។ សហគ្រាសកាត់ដេរ ផលិតសម្លៀកបំពាក់ម៉ាក E-Port ការបង្កើតមូលដ្ឋានផលិតកម្មរបស់ខ្លួននៅកម្ពុជាតាមរយៈក្រុមហ៊ុន Q-Port Investments, Q-Port Enterprise ផលិត និងនាំចេញនូវផលិតផលជាបន្តបន្ទាប់ទៅអ៊ឺរ៉ុប អាមេរិក ជប៉ុន និងកាណាដា។
Q-Port Investments បានប្រតិបត្តិការរោងចក្រកាត់ដេរចំនួន ២ និងកន្លែងបោកគក់គំរូមួយ ដែលបម្រើដល់រោងចក្រផលិតម៉ាក Denim នៅកម្ពុជា។ សមត្ថភាពផលិតសម្លៀកបំពាក់ប្រចាំខែរបស់ក្រុមហ៊ុន Q-Port Investments មានចំនួនប្រមាណ ៣៥០,០០០ ខោអាវ។
លោក Lin បានបង្កើតរោងចក្រដំបូងរបស់ខ្លួននៅកម្ពុជាតាំងពីឆ្នាំ ២០០២។ ចាប់តាំងពីពេលនោះមក Q-Port Investments បានបង្កើតឱកាសការងារជាច្រើនសម្រាប់ប្រជាជនក្នុងស្រុក ដែលបានប្រើប្រាស់កម្មករប្រហែល ២,៨០០ នាក់ ក្នុងឆ្នាំ ២០១២ ប៉ុន្តែបច្ចុប្បន្នមានកម្មករ ១ ៣០០ នាក់។
លោកបានសង្កត់ធ្ងន់ថា ឧស្សាហកម្មកាត់ដេរបានចូលរួមចំណែកយ៉ាងសំខាន់ដល់កំណើនសេដ្ឋកិច្ចរបស់កម្ពុជា និងជាសសរទ្រូងនៃសេដ្ឋកិច្ចរបស់ប្រទេសសម័យក្រោយសង្គ្រាម។
ទោះយ៉ាងណា ការបង្កើនតម្លៃពលកម្ម និងការប្រកួតប្រជែងពីបណ្តាប្រទេសនាំចេញសម្លៀកបំពាក់កំពុងលេចធ្លោបានជំរុញឱ្យក្រុមហ៊ុន Q-Port Investments ផ្ទេរខ្សែសង្វាក់ផលិតកម្មរបស់ខ្លួនមួយចំនួនទៅប្រទេសផ្សេងទៀតដូច បង់ក្លាដេសជាដើម។
លោក Lin បន្តថា៖ «តម្លៃពលកម្មនៅកម្ពុជាបានកើនឡើងជាលំដាប់ក្នុងរយៈពេលប៉ុន្មានឆ្នាំនេះ ឡើងពី ៤៥ ដុល្លារ ដល់ ១៩០ ដុល្លារអាមេរិកនៅឆ្នាំនេះ។ ការសម្រេចរបស់សហភាពអ៊ឺរ៉ុបក្នុងការដកផ្នែកខ្លះនៃការអនុគ្រោះពន្ធអ្វីៗទាំងអស់លើកលែងតែអាវុធ (EBA) ចេញពីកម្ពុជាក៏បានជះឥទ្ធិពលដល់ក្រុមហ៊ុនផលិតសម្លៀកបំពាក់ផងដែរ។
«បន្ថែមពីនេះផលប៉ះពាល់ដ៏ធំធេងដែលបង្កឡើងដោយជំងឺកូវីដ ធ្វើឱ្យការបញ្ជាទិញសរុបរបស់យើងពីអតិថិជនបានធ្លាក់ចុះ ៤០ ភាគរយ។ ក្រឡេកមើលតម្រូវការទីផ្សាររបស់ប្រទេសនានាក្នុងតំបន់ ឬការបញ្ជាទិញរបស់យើងពីសហរដ្ឋអាមេរិក អ៊ឺរ៉ុប និងកាណាដា បានធ្លាក់ចុះ ៣០ ទៅ ៥០ ភាគរយ។
ប៉ុន្តែលោកថ្លែងថា ក្រុមហ៊ុន Q-Port Investments កំពុងមើលឃើញការបញ្ជាទិញកើនឡើងដល់ ៨០ ភាគរយ នៃបរិមាណកាលពីឆ្នាំមុន។ លោកមានទំនុកចិត្តចំពោះការងើបឡើងវិញនូវបរិមាណអាជីវកម្មនៃក្រុមហ៊ុនរបស់ខ្លួន។
លោកបញ្ជាក់ថា ឧស្សាហកម្មកាត់ដេរនៅកម្ពុជាធ្លាប់បានផលិតផលិតផលដែលមានគុណភាពទាប និងមធ្យមអស់រយៈពេលជាយូរមកហើយ។ វាដល់ពេលវេលាដែលឧស្សាហកម្មមួយនេះផ្តោតសំខាន់លើការផលិតផលិតផលដែលមានគុណភាពមធ្យម ឬផលិតផលដែលមានគុណភាពខ្ពស់។ មូលហេតុដែលគួរផលិត ផលិតផលដែលមានគុណភាពខ្ពស់ គឺក្រុមហ៊ុនផលិតអាចទទួលបានប្រាក់ចំណេញខ្ពស់ជាងនេះ។
«តាមគំនិតរបស់ខ្ញុំ កម្មករនៅក្នុងប្រទេសកម្ពុជា បានត្រៀមខ្លួនរួចជាស្រេចក្នុងការផលិតផលិតផលលំដាប់ខ្ពស់»។
លោក Lin ក៏បានផ្តួចផ្តើមផែនការសម្រាប់ Q-Port Investments ផងដែរ សម្រាប់ការលក់រាយតាមរយៈការជួសជុល និងផ្លាស់ប្តូរផ្នែកខ្លះនៃរោងចក្ររបស់ក្រុមហ៊ុនទៅជាកន្លែងលក់ទំនិញដែលមានឈ្មោះ E-Port Center។
ការទាក់ទាញសំខាន់របស់មជ្ឈមណ្ឌលលក់រាយ គឺជាការផ្តល់ជូននូវសម្លៀកបំពាក់យីហោអន្តរជាតិ។ កន្លែងទំនេរផ្សេងទៀត នឹងត្រូវជួលសម្រាប់កន្លែងធ្វើការរួមគ្នា បើកហាងលក់អាហារ ភេសជ្ជៈ និងហាងលក់វត្ថុផ្សេងៗទៀត។
លោក Lin ថ្លែងថា ដោយមានប្រជាជនវ័យក្មេងច្រើន និងអ្នកដែលមានជីវភាពមធ្យមកំពុងកើនឡើងឧស្សាហកម្មលក់រាយនៅកម្ពុជានៅមានសក្តានុពលយ៉ាងច្រើន៕
(ប្រភពព័ត៌មាន: postkhmer.com)
មតិពីមិត្តអ្នកអាន