លោក ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានមាប្រសាសន៍ថា រាជរដ្ឋាភិបាលកម្ពុជានៅតែប្រកាន់គោលជំហរក្នុងការអនវុត្តច្បាប់ស្តីពីចរាចរណ៍ផ្លូវគោក ដោយពុំមានការដកថយនោះទេ ដើម្បីការពារអាយុជីវិត និងសុខមាលភាពរបស់ប្រជាពលរដ្ឋ។
រាជរដ្ឋាភិបាលកម្ពុជារឹតបន្តឹងច្បាប់ចរាចរណ៍ដើម្បីការពារអាយុជីវិតប្រជាពលរដ្ឋ។
ថ្លែងមតិនៅក្នុងពិធីប្រកាសចូលកាល់ដំណែងអភិបាល និងអភិបាលរងនៃគណៈអភិបាលខេត្តកែប នៅសាលាខេត្តកែប កាលពីថ្ងៃទី ២៩ ខែឧសភាថា ក្រោយពីរាជរដ្ឋាភិបាល បានធ្វើការរឹតបន្តឹងច្បាប់ចរាចរណ៍ផ្លូវគោក ជាមួយននឹងការអនុវត្តការផាកពិន័យខ្ពស់ជាងមុននេះ ឃើញថា ប្រជាពលរដ្ឋទូទាំងប្រទេសបានចូលរួមគោរពច្បាប់ ហើយអត្រាគ្រោះថ្នាក់ចរាចរណ៍ក៏មានការថយចុះជាលំដាប់ផងដែរ។
ទន្ទឹមនឹងនោះ ក៏មានបុគ្គលមួយចំនួនបានឆ្លៀតឱកាសរិះគន់ការអនុវត្តរឹតបន្តឹងច្បាប់នេះ ថាជាការដាក់បន្ទុកទៅលើប្រជាពលរដ្ឋ ស្របពេលដែលកម្ពុជាជួបបញ្ហាជំងឺកូវីដ១៩ និងថា ការអនុវត្តច្បាប់នេះធ្វើទៅលឿនពេកទៅវិញ។
តែទោះជាយ៉ាងណា លោកថា៖ "យើងបានប្រកាសហើយថា ឆ្នាំ២០២០ជាឆ្នាំរឹតបន្តឹងចរាចរណ៍ផ្លូវគោក ហើយមុននឹងរឹតបន្តឹងនេះ យើងក៏បានធ្វើកិច្ចការងារជាច្រើន ជាពិសេសទាក់ទងនឹងការអប់រំ និងការផ្សព្វផ្សាយអំពីច្បាប់ស្តីពីចរាចរណ៍ផ្លូវគោក ប៉ុន្តែដល់ពេលយើងកំណត់ធ្វើ មានអ្នកមួយចំនួនថា ឆាប់ពេក អត់បានអប់រំ អត់បានផ្សព្វផ្សាយ តាមពិតមិនមែនទេ"។
លោក រដ្ឋមន្ត្រី បានគូសបញ្ជាក់ថា ការអនុវត្តការរឹតបន្តឹងច្បាប់នេះ គឺធ្វើឡើងដើម្បីការពារអាយុជីវិត និងសុខមាលភាពរបស់ប្រជាពលរដ្ឋ ពុំមែនជាការដាក់បន្ទុកលើប្រជាពលរដ្ឋនោះទេ។
លោកបានថ្លែងថា៖ "អ្នកណាតិះទៀនយ៉ាងម៉េច យើងមិនត្រូវខ្វល់ទេ ឲ្យតែយើងមានទឹកចិត្តស្នេហាជាតិ មានឧត្តមគតិបម្រើប្រជាពលរដ្ឋពិតប្រាកដ ទោះបីអ្នកណាថាម៉េចក៏ដោយ យើងត្រូវតែធ្វើ…មិនអាចដកថយទេ ត្រូវធ្វើតទៅទៀត បើកាលណាយើងដកថយ លើកក្រោយទៅគ្មានអ្នកណាស្តាប់ទេ ដូច្នេះត្រូវទៅមុខ"។
ស្របពេលគ្នានេះដែរ លោកក៏បានណែនាំដល់មន្ត្រីអនុវត្តច្បាប់ ត្រូវប្រកាន់ខ្ជាប់នូវសីលធម៌ វិជ្ជាជីវៈ និងត្រូវឃាត់អ្នកធ្វើដំណើរទាំងឡាយណា ដែលល្មើសច្បាប់ប៉ុណ្ណោះ ដោយមិនត្រូវដាក់ប៉ារ៉ាស់ ដើម្បីឆែករកឯកសាររបស់អ្នកដែលធ្វើដំណើរតាមផ្លូវនោះឡើយ។ លោកថា៖ "មន្ត្រីអនុវត្តច្បាប់របស់យើង ត្រូវមានអាកប្បករិយា ទន់ភ្លន់ សុភាពរាបសារ គោរពវិជ្ជាជីវៈ មិនមែនថាបានឱកាសហ្នឹងឆែកឆេរត្រួតពិនិត្យ យកលុយយកកាក់ផ្តេសផ្តាស អាហ្នឹងអត់បានទេ"។
បើតាមលោករដ្ឋមន្ត្រី ដដែល ក្នុងរយៈពេលមួយខែឧសភា នៃការរឹតបន្តឹងច្បាប់ចរាចរណ៍នេះ ឃើញថា ចំនួនអ្នកស្លាប់ដោយសារគ្រោះថ្នាក់ចរាចរណ៍ មានការថយចុះ ១៥នាក់ និងអ្នករងរបួស ថយចុះជាង ៨០នាក់ បើប្រើធៀបនឹងខែមេសា។
លោក សោម ពិសិដ្ឋ អភិបាលខេត្តកែប ដែលទើបនឹងឡើងកាន់ដំណែង ក៏បានបង្ហាញឆន្ទៈក្នុងការពង្រឹងការអនុវត្តច្បាប់ចរាចរណ៍ផ្លូវគោក រួមនឹងច្បាប់ផ្សេងៗទៀត ដោយគ្មានការលើកលែង និងលុបបំបាត់នូវបាតុភាពអសកម្មនានាដែលធ្វើឲ្យប៉ះពាល់ និងបង្កការថ្នាំងថ្នាក់ដល់ប្រជាពលរដ្ឋ។ លោកថា៖ "នឹងបន្តខិតខំអនុវត្តច្បាប់ លិខិតបទដ្ឋានគតិយុត្ត និងគោលការណ៍ណែនាំនានារបស់រាជរដ្ឋាភិបាលដែលបានដាក់ចេញ ឲ្យមានប្រសិទ្ធិភាព…ជាពិសេសអនុសាសន៍របស់សម្តេចតេជោ ពង្រឹងការអនុវត្តច្បាប់ដោយគ្មានការលើកលែង"។
យោងតាមរបាយការណ៍របស់អ្នកនាំពាក្យអគ្គស្នងការដ្ឋនានគរបាលជាតិ លោកឧត្តមសេនយ៍ឯក ឆាយ គឹមខឿន បានឲ្យដឹងថា គិតចាប់ពីថ្ងៃទី១ខែឧសភា ដែលជាថ្ងៃចាប់ផ្តើមរឹតបន្តឹងច្បាប់ចរាចរណ៍ផ្លូវគោក ជាមួយនឹងការអនុវត្តការផាកពិន័យខ្ពស់ជាងមុន រហូតដល់ថ្ងៃទី៣០ខែឧសភា នគរបាលចរាចរណ៍ទូទាំងប្រទេស បានត្រួតពិនិត្យ និងផាកពិន័យយានយន្តសរុបចំនួន ៤៣៥៣០គ្រឿង ក្នុងនោះមានម៉ូតូ ៣១៧៥៥គ្រឿង និងរថយន្ត ១១៧៧៥គ្រឿង។
លោកបន្តថា បទល្មើសគួរឲ្យកត់សម្គាល់សម្រាប់ម៉ូតូ និងរថយន្ត រួមមាន អត់ពាក់មួកសុវត្ថិភាព ល្មើសស្លាកសញ្ញា គ្មានស្លាកលេខ ដឹកលើសទម្ងន់កំណត់ លើសល្បឿនកំណត់ អត់ពាក់ខ្សែក្រវ៉ាត់សុវត្ថិភាព បើកបរក្នុងស្ថានភាពស្រវឹង និងប្រើប្រាស់ទូរស័ព្ទដោយគ្មានឧបករណ៍ភ្ជាប់សំឡេងជាដើម។ លោកថា រយៈពេល៣០ថ្ងៃនៃការរឹតបន្តឹងការអនុវត្តច្បាប់ បានដំណើរការទៅយ៉ាងល្អប្រសើរ៕
（សរុបដោយសាមេត）
មតិពីមិត្តអ្នកអាន