នាព្រឹកថ្ងៃទី ៣ ខែមិថុនាឆ្នាំ ២០២០នេះ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានដឹកនាំ គណ:ប្រតិភូ អញ្ចើញទៅទស្សនកិច្ចនៅស្ថានីយ៍ទូរទស្សន៍ PNN។ នៅទីនេះ ឯកឧត្តម ខៀវ កាញារីទ្ធ បានបង្ហាញការចាប់អារម្មណ៍ចំពោះស្ថានីយទូរទស្សន៍ PNN ដែលបានប្រើប្រាស់នូវបច្ចេកវិទ្យាទំនើប លំដាប់ស្តង់ដារអន្តរជាតិ និងការផ្សាយតាមប្រព័ន្ធឌីជីថលមុនគេ នៅក្នុងប្រទេសកម្ពុជា។
ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានដឹកនាំ គណ:ប្រតិភូ អញ្ចើញទៅទស្សនកិច្ចនៅស្ថានីយ៍ទូរទស្សន៍ PNN
បើតាមការបញ្ជាក់របស់អ្នកគ្រប់គ្រងទូទៅនៃស្ថានីយទូរទស្សន៍ ភីអិនអិន បានបង្ហាញដល់គណៈប្រតិភូក្រសួងព័ត៌មាន និងដឹកនាំទៅទស្សនាទីតាំងសំខាន់ៗ នៅក្នុងស្ថានីយ រួមមាន បន្ទប់បច្ចេកទេសបំពាក់ដោយឧបករណ៍ទំនើបៗចុងក្រោយ បន្ទប់កាត់តសំឡេង បន្ទប់បញ្ចូលសំឡេង បន្ទប់ថតកម្មវិធី ស្ទូតឌីយោ កន្លែងបញ្ចូលសំឡេងភាពយន្តបរទេស រថយន្តផ្សាយចល័ត រួមនឹងទីតាំងសំខាន់ៗជាច្រើនទៀត។ ទន្ទឹមនេះ ទូរទស្សន៍ ភីអិនអិន បានប្រមូលផ្តុំដោយអ្នកជំនាញដែលមានបទពិសោធន៍ច្រើនឆ្នាំ ក្នុងវិស័យសោតទស្សន៍ និងវិស័យសារព័ត៌មាន ខណៈពេលដែលទូរទស្សន៍នេះទើបតែបង្កើតថ្មីក្ដី ប៉ុន្តែបានក្លាយជាប្រព័ន្ធផ្សព្វផ្សាយមួយឈានមុខគេនៅកម្ពុជាដែលបានផ្តល់ជូន សាធារណជននូវព័ត៌មានប្រកបដោយវិជ្ជាជីវៈ និងការកម្សាន្តដ៏សម្បូរបែប។ ស្ថានីយទូរទស្សន៍ ភីអិនអិន បានក្លាយជាកន្លែងទទួលស្វាគមន៍ដំណើរទស្សនកិច្ច ពីសំណាក់សិស្ស និស្សិត មន្ត្រីរាជការ ក្រុមហ៊ុនឯកជន រួមទាំងភ្ញៀវអន្តរជាតិជាបន្តបន្ទាប់។
លោក ប៉ែន បូណា និពន្ធនាយកផ្នែកព័ត៌មានរបស់ទូរទស្សន៍ ភីអិនអិន បានបញ្ជាក់ប្រាប់គណៈប្រតិភូថា ស្ថានីយទូរទស្សន៍បានបង្កើតឡើងមកដល់ពេលនេះមានរយៈពេលជិត៥ ឆ្នាំហើយ ដោយបច្ចុប្បន្នមានបុគ្គលិកកំពុងបំពេញការងារប្រមាណជាង ៣០០នាក់។ លោកបានបន្ដថា ក្នុងស្ថានីយទូរស្សន៍នេះ មានស្ទូតឌីយោថតចំនួន០៥ ក្នុងនោះធំៗចំនួន ០៣ មានរថយន្តចល័ត០១ គ្រឿង ដែលអាចបំពាក់កាមេរ៉ា ថតផ្សាយបានចំនួន ៣២ គ្រឿង ដែលមានភាពងាយស្រួលក្នុងការថតនូវរាល់កម្មវិធីធំៗ រួមទាំងព្រឹត្តការណ៍កីឡាផ្សេងៗបាន។ លោកបានបន្ថែមថា ទូរទស្សន៍នេះបានធ្វើការផ្សាយជាមួយនឹងបណ្តាញគ្របដណ្តប់ការផ្សាយធំទូលាយរហូតដល់ ៩៥ ភាគរយ នៃផ្ទៃប្រទេសកម្ពុជា ដែលមានគុណភាពរូបភាពច្បាស់ល្អ និងធ្វើការផ្សព្វផ្សាយតាមបច្ចេកទេស ស្តង់ដារ ដែលមិនធ្លាប់មានពីមុនមក។
ឯកឧត្ដម ខៀវ កាញារីទ្ធ រដ្ឋមន្រ្ដីក្រសួងព័ត៌មានបានមានប្រសាសន៍ថា ប្រមុខរាជ រដ្ឋាភិបាលកម្ពុជាបានប្រគល់ភារកិច្ចជូនក្រសួងព័ត៌មាន ជាអ្នករៀបចំធ្វើការផ្លាស់ប្តូរប្រព័ន្ធផ្សាយទូរទស្សន៍ ពីអាណាឡូក ទៅជា ឌីជីថល ដែលជាកិច្ចការងារចាំបាច់សម្រាប់កម្ពុជាត្រូវធ្វើ ជាពិសេសដោយសារនៅឆ្នាំ២០២៣ខាងមុខ កម្ពុជា នឹងធ្វើជាម្ចាស់ផ្ទះនៃការប្រកួតកីឡាស៊ីហ្គេម ក្នុងនោះក៏ធានាឱ្យមានការផលិតឯកសារមួយចំនួន ដែលមានគុណភាពច្បាស់ប្រភេទ 4K ផងដែរ។
សូមបញ្ជាក់ថា ស្ថានីយទូរទស្សន៍ PNN មានទីតាំងស្ថិតនៅភូមិព្រែកតារ័ត្ន សង្កាត់ ព្រែកតាសេក ខណ្ឌជ្រោយចង្វារ រាជធានីភ្នំពេញ ដោយបានកសាងឡើងនៅលើផ្ទៃដីប្រមាណជាង ៥ ហិកតា ដែលមានបង្គោលអង់តែន កម្ពស់ ១៦០ ម៉ែត្រ កម្លាំងការផ្សាយ ១០ គីឡូវ៉ាត់ ហើយទូរទស្សន៍នេះ ដោយបំពាក់នូវបច្ចេកវិទ្យាប្រើប្រាស់ទំនើបៗ ទាន់ សម័យចុងក្រោយជាពិសេសការផ្សាយតាមប្រព័ន្ធឌីជីថលមុនគេនៅក្នុងប្រទេសកម្ពុជា៕
ស្ថានីយ៍ទូរទស្សន៍ PNN
(សរុនដោយសាមេត)
មតិពីមិត្តអ្នកអាន